ໃນວັນທີ 07 ສິງຫາ 2020,ທີ່ ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ມີພິທີປິດ ຊຸດຝຶກອົບຮົມພະນັກງານການທູດ ແລະ ພະນັກງານຊ່ວຍວຽກ ກ່ອນໄປປະຈຳການ ປະຈໍາປີ 2020,ໂດຍການໃຫ້ກຽດເປັນປະທານຂອງ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ, ພ້ອມດ້ວຍບັນດາຫົວໜ້າກົມ, ຮອງກົມ ຂອງກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ຜູ້ເຂົ້າຮັບການຝຶກອົບຮົມ ລວມທັງໝົດຫຼາຍກວ່າ 60 ທ່ານ.ເຊິ່ງຊຸດຝຶກອົບຮົມໄດ້ດຳເນີນມາເປັນເວລາ 10ວັນ, ນັບແຕ່ວັນທີ 27 ກໍລະກົດ 2020 ເປັນຕົ້ນມາ.

ໃນພິທີດັ່ງກ່າວ, ທ່ານ ໄມ ໄຊຍະວົງສ໌, ຫົວໜ້າສະ​ຖາ​ບັນ​ການ​ຕ່າງປະ​ເທດໄດ້​ຂື້ນອ່ານບົດ​ສະຫຼຸບລາຍ​ງານ​ຜົນສໍາເລັດຂອງ​ການ​ຝຶກ​ອົບຮົມ ​ຊຶ່ງ​ທ່ານໄດ້​ກ່າວ​ວ່າຜູ້​ເຂົ້າ​ຮ່ວມຝຶກ​ອົບຮົມໄດ້​ຜ່ານການຮຽນຮູ້​​ພື້ນຖານທາງດ້ານວຽກງານການທູດ ເຊິ່ງກວມເອົາຄວາມຮູ້ກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ, ນະໂຍບາຍການຕ່າງປະເທດ ຂອງພັກ ແລະ ລັດຖະບານ ໃນແຕ່ລະໄລຍະ, ການ​ພົວພັນ​ການທູດສອງ​ຝ່າຍແລະຫຼາຍຝ່າຍ​, ວຽກງານຊາຍ​ແດນ, ວຽກງານ​ກົງ​ສຸນ, ວຽກງານພິທີ​ການ ​ແລະອື່ນໆ. ຕະຫລອດໄລຍະເວລາດັ່ງກ່າວໄດ້ມີອາຈານຮັບເຊີນ ຈາກຫຼາຍພາກສ່ວນມາຂຶ້ນຫ້ອງບັນຍາຍເປັນຕົ້ນ: ກະຊວງອຸດສາຫະກຳ ແລະ ການຄ້າ,ກະຊວງແຜນການ ແລະ ການລົງທຶນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທູດອາວຸໂສບຳນານ ແລະ ກົມ​ຕ່າງໆພາຍ​ໃນ​ກະຊວງ​ການ​ຕ່າງປະ​ເທດ. ນອກຈາກນັ້ນ, ກໍໄດ້ຮັບຟັງປາຖະກະຖາ ຈາກຄະນະນຳກະຊວງການຕ່າງປະເທດ ໃນຫົວຂໍ້: ​"ການເພີ່ມທະວີການຈັດຕັ້ງປະຕິບັດວຽກງານການຕ່າງປະເທດ ໃຫ້ເປັນຮູບປະທໍາ ຕາມແບບຢ່າງ ປະທານ ໄກສອນ ພົມວິຫານ" ໂດຍໄດ້ຮັບກຽດຂຶ້ນຫ້ອງບັນຍາຍຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ.

ການ​ຝຶກ​ອົບຮົມໃນ​ເທື່ອ​ນີ້ໄດ້​ຮັບ​ຜົນສຳ​ເລັດ​ເປັນ​ຢ່າງ​ດີ ກໍຍ້ອນມີ​ການ​ຊີ້​ນຳ​ຢ່າງ​ໃກ້​ຊິດຈາກ​ ຄະນະ​ພັກ, ຄະນະນໍາກະຊວງ​ການ​ຕ່າງປະ​ເທດ, ສາມາດບັນລຸໄດ້ຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ທັງເປັນການເສີມສ້າງຂີດຄວາມສາມາດທາງດ້ານການເຮັດວຽກການທູດ ໃນການພັດທະນາທັກສະການເຈລະຈາການທູດ ແລະ ການແລກປ່ຽນບົດຮຽນ ຈາກປະສົບການຕົວຈິງຂອງການເຄື່ອນໄຫວການທູດ. ພ້ອມທັງ, ຍົກລະດັບຄວາມຮັບຮູ້ຂອງພະນັກງານການທູດ ໃຫ້ເຂົ້າໃຈເຖິງໜ້າທີ່, ພາລະບົດບາດ ແລະ ຄວາມຮັບຜິດຊອບ ຂອງ​ການ​ເປັນ​ພະນັກງານ​ການທູດທີ່ປະສົບຜົນສໍາເລັດ ແລະ ສາມາດສ້າງຊື່ສຽງໃຫ້ແກ່ປະເທດຊາດ.

       ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດກໍ່ໄດ້ໃຫ້ກຽດໂອ້ລົມ, ເຊິ່ງທ່ານໄດ້ສະແດງຄວາມຊົມເຊີຍ ຕໍ່ຜົນສຳເລັດການຈັດຕັ້ງຊຸດຝຶກອົບຮົມ ແລະ ໃຫ້ທິດຊີ້ນຳແກ່ຜູ້ເຂົ້າຮັບການຝຶກອົບຮົມຈົ່ງເອົາໃຈໃສ່ ແລະ ສືບຕໍ່ນຳເອົາຄວາມຮູ້ທີ່ໄດ້ຈາກການຝຶກອົບຮົມຄັ້ງນີ້ ໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນໜ້າທີ່ວຽກງານໃນການເຄື່ອນໄຫວການທູດ ເພື່ອຍາດແຍ່ງການພົວພັນຮ່ວມມືກັບສາກົນ, ດຶງດູດເອົາການລົງທຶນຈາກພາຍນອກໃຫ້ຫຼາຍເທົ່າທີ່ຈະຫຼາຍໄດ້. ພ້ອມທັງ, ສະກັດກັ້ນ ແລະ ຕ້ານທຸກປະກົດການຫຍໍ້ທໍ້ທີ່ອາດເກີດຂຶ້ນ ເພື່ອພ້ອມກັນປະຕິບັດແນວທາງ ຂອງພັກປະຊາຊົນປະຕິວັດລາວ ໃຫ້ມີຜົນສຳເລັດຢ່າງຈົບງາມ.