ໃນວັນທີ 22 ສິງຫາ 2019, ທີ່ ໂຮງແຮມຄຣາວພຣາຊາ, ນະຄອນຫຼວງວຽງຈັນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ໃຫ້ກຽດເປັນປະທານກ່າວເປີດກອງປະຊຸມປຶກສາຫາລື ກ່ຽວກັບ ການສົ່ງເສີມຄວາມຮັບຮູ້ ວ່າດ້ວຍອັນຕະລາຍຂອງລະເບີດບໍ່ທັນແຕກ ຫຼື ສິ່ງເສດເຫຼືອໃນປາງສົງຄາມ ຢູ່ບັນດາປະເທດສະມາຊິກອາຊຽນ (ARMAC Consultative Meeting on Enhancing Awareness Programs on the Danger of Mine/Explosive Remnants of War among ASEAN Member States).
ກອງປະຊຸມດັ່ງກ່າວ ຈັດຂຶ້ນໂດຍການເປັນປະທານຮ່ວມ ລະຫວ່າງ ກະຊວງການຕ່າງປະເທດ ສປປ ລາວ, ສູນປະຕິບັດງານກ່ຽວກັບລະເບີດບໍ່ທັນແຕກໃນອາຊຽນ (ARMAC), ແລະ ກອງທຶນຮ່ວມ ຍີ່ປຸ່ນ-ອາຊຽນ (JAIF) ໂດຍມີຜູ້ເຂົ້າຮ່ວມຈາກພາກສ່ວນກ່ຽວຂ້ອງຂອງ ສປປ ລາວ ແລະ ບັນດາອົງການຈັດຕັ້ງສາກົນທີ່ກ່ຽວຂ້ອງ ຢູ່ ສປປ ລາວ ຢ່າງພ້ອມພຽງ. ຈຸດປະສົງຫຼັກຂອງກອງປະຊຸມຄັ້ງນີ້ ແມ່ນເພື່ອປຶກສາຫາລືຊອກຫາວິທີການເຂົ້າເຖິງການສຶກສາ ເພື່ອເຜີຍແຜ່ກ່ຽວກັບຄວາມສ່ຽງ ແລະ ອັນຕະລາຍຈາກສິ່ງເສດເຫຼືອໃນປາງສົງຄາມ ໃຫ້ແກ່ຊຸມຊົນທີ່ໄດ້ຮັບຜົນກະທົບໃນທຸກປະເທດອາຊຽນ; ສົ່ງເສີມຊ່ອງທາງເຜີຍແຜ່ຂໍ້ມູນຜ່ານສິ່ງພິມຕ່າງໆຂອງສູນ ARMAC; ແລະ ສົ່ງເສີມຄວາມຮັບຮູ້ຂອງ ວັນທີ 4 ເມສາ ເປັນວັນທາງການຂອງອາຊຽນ ເພື່ອສະເຫຼີມສະຫຼອງວັນປູກຈິດສໍານຶກກ່ຽວກັບລະເບີດບໍ່ທັນແຕກ.
ການຈັດກອງປະຊຸມດັ່ງກ່າວ ແມ່ນໝູນວຽນກັນໃນບັນດາປະເທດສະມາຊິກອາຊຽນ, ໂດຍສະເພາະໃນປະເທດທີ່ມີຄວາມສ່ຽງສູງຕໍ່ບັນຫາລະເບີດທີ່ບໍ່ທັນແຕກ ເຊັ່ນ: ກໍາປູເຈຍ, ມຽນມາ, ໄທ ແລະ ຫວຽດນາມ ແນໃສ່ແລກປ່ຽນປະສົບການທີ່ດີທີ່ສຸດຂອງແຕ່ລະປະເທດ, ການສົ່ງເສີມຄວາມຮັບຮູ້ຂອງປະຊາຊົນຜູ້ທີ່ມີຄວາມສ່ຽງ ໃຫ້ເຂົ້າໃຈ ແລະ ຫຼີກລ້ຽງ ຈາກການຕົກເປັນຜູ້ເຄາະຮ້າຍຂອງລະເບີດບໍ່ທັນແຕກ.