ໃນຕອນເຊົ້າຂອງວັນທີ 05 ກໍລະກົດ 2019, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ອີໂວ ຊີເບີ (Ivo Sieber), ເອກອັກຄະລັດຖະທູດ ສະວິດເຊີແລນ ປະຈຳ ສປປ ລາວ, ພາຍຫຼັງສໍາເລັດການປະຕິບັດໜ້າທີ່ການທູດ ຢູ່ ສປປ ລາວ.
ໃນໂອກາດນີ້, ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ໄດ້ສະແດງຄວາມຊົມເຊີຍ ຕໍ່ຜົນງານການເຄື່ອນໄຫວຢ່າງຫ້າວຫັນຂອງທ່ານທູດ ໃນການຊຸກຍູ້ການພົວພັນຮ່ວມມື ລະຫວ່າງ ລາວ-ສະວິດເຊີແລນ ໂດຍສະເພາະແມ່ນດ້ານການພັດທະນາເສດຖະກິດ-ສັງຄົມຂອງລາວ ໃຫ້ມີປະສິດທິຜົນ ແລະ ການຂະຫຍາຍຕົວຢ່າງຕໍ່ເນື່ອງ, ການຄຸ້ມຄອງລັດ ແລະ ການສົ່ງເສີມການມີສ່ວນຮ່ວມຂອງປະຊາຊົນ ໃນລະດັບທ້ອງຖິ່ນ, ການຄໍ້າປະກັນສະບຽງອາຫານ ແລະ ກະສິກໍາ, ການສຶກສາວິຊາຊີບ ແລະ ການຝຶກອົບຮົມ. ນອກຈາກນີ້, ທ່ານຮອງລັດຖະມົນຕີ ຍັງໄດ້ສະເໜີໃຫ້ສະວິດເຊີແລນ ເພີ່ມທະວີການສະໜັບສະໜູນການຊ່ວຍເຫຼືອໃນດ້ານຕ່າງໆ ໃຫ້ແກ່ ສປປ ລາວ ແລະ ຊ່ວຍໂຄສະນາຊຸກຍູ້ຂົນຂວາຍເອົານັກລົງທຶນ, ນັກທຸລະກິດ ແລະ ນັກທ່ອງທ່ຽວຂອງ ສະວິດເຊີແລນ ເຂົ້າມາລົງທຶນ ແລະ ທ່ອງທ່ຽວ ຢູ່ ສປປ ລາວ ໃຫ້ນັບມື້ນັບຫຼາຍຂຶ້ນ, ພ້ອມທັງສະເໜີໃຫ້ມີການແລກປ່ຽນຄະນະຜູ້ແທນນຳກັນຫຼາຍຂຶ້ນໃນອະນາຄົດ ເພື່ອຖອດຖອນບົດຮຽນ ແລະ ຂໍ້ມູນຂ່າວສານ ລະຫວ່າງສອງປະເທດ.
ໃນໂອກາດດຽວກັນ, ທ່ານເອກອັກຄະລັດຖະທູດ ອີໂວ ຊີເບີ ກໍໄດ້ສະແດງຄວາມຂອບໃຈເປັນຢ່າງສູງຕໍ່ ລັດຖະບານ ແລະ ປະຊາຊົນລາວ ກໍຄື ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປລາວ ໃນຄັ້ງນີ້ ຈົນໄດ້ຮັບຜົນສໍາເລັດອັນຈົບງາມ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍການພົວພັນຮ່ວມມືສອງຝ່າຍ ໃຫ້ກວ້າງຂວາງ ແລະ ແຕກດອກອອກຜົນຍິ່ງໆຂຶ້ນ.
ສປປ ລາວ ແລະ ສະວິດເຊີແລນ ໄດ້ສ້າງຕັ້ງສາຍພົວພັນການທູດນໍາກັນ ແຕ່ວັນທີ 11 ພະຈິກ 1962. ໃນໄລຍະຜ່ານມາ ສະວິດເຊີແລນ ໄດ້ໃຫ້ການຊ່ວຍເຫຼືອ ສປປ ລາວ ຜ່ານອົງການຈັດຕັ້ງສາກົນ ຫຼື ຮ່ວມທຶນກັບປະເທດອື່ນ ເພື່ອສ້າງເປັນໂຄງການລະດັບອະນຸພາກພື້ນ, ຊຶ່ງລັດຖະບານ ສະວິດເຊີແລນ ໄດ້ສືບຕໍ່ໃຫ້ການຊ່ວຍເຫຼືອ ສປປ ລາວ ຕາມຍຸດທະສາດການຮ່ວມມື ກັບບັນດາປະເທດອະນຸພາກພື້ນແມ່ນໍ້າຂອງ ໃນສົກປີ 2013-2017 (Swiss Cooperation Strategy in the Mekong Region 2013-2017), ຊຶ່ງລວມມີ ລາວ, ຫວຽດນາມ, ກໍາປູເຈຍ ແລະ ມຽນມາ. ສຳລັບການຊ່ວຍເຫຼືອຂອງສະວິດເຊີແລນ ໃນສົກປີ 2018-2021 ແມ່ນມີມູນຄ່າ 64 ລ້ານ ຝຣັງສະວິດ ເພື່ອສະໜັບສະໜູນການພັດທະນາແບບຍືນຍົງ ແລະ ສົ່ງເສີມການຄຸ້ມຄອງພາກລັດ ໃນ ສປປ ລາວ.