ໃນວັນທີ 21 ມິຖຸນາ 2019, ທີ່ ບາງກອກ, ປະເທດໄທ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 34 (ASEAN Senior Officials’ Preparatory Meeting).
ກອງປະຊຸມດັ່ງກ່າວ ໄດ້ຮັບຊາບຄວາມຄືບໜ້າການຈັດຕັ້ງປະຕິບັດກິດຈະກຳບູລິມະສິດຂອງ ໄທໃນນາມປະທານອາຊຽນ ປີ 2019 ແລະ ໄດ້ສືບຕໍ່ປຶກສາຫາລືກ່ຽວກັບເນື້ອໃນຮ່າງຖະແຫຼງການວິໄສທັດຂອງຜູ້ນໍາອາຊຽນ ວ່າດ້ວຍການເປັນຄູ່ຮ່ວມເພື່ອຄວາມຍືນຍົງ ກ່ອນຈະນຳສະເໜີໃຫ້ລັດຖະມົນຕີຕ່າງປະເທດອາຊຽນພິຈາລະນາ ແລະ ນຳສະເໜີໃຫ້ຜູ້ນຳອາຊຽນຮັບຮອງເອົາໃນໂອກາດກອງປະຊຸມສຸດຍອດອາຊຽນ ຄັ້ງທີ 34. ພ້ອມກັນນີ້, ກອງປະຊຸມ ຍັງໄດ້ປຶກສາຫາລືເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ (AMM), ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 19 (19th APSC Council), ແລະ ກອງປະຊຸມສະພາປະສານງານອາຊຽນ ຄັ້ງທີ 23 (23rd ACC) ແລະ ກອງປະຊຸມສຸດຍອດອາຊຽນ ຄັ້ງທີ 34 ເຊິ່ງຈະຈັດຂຶ້ນໃນວັນທີ 22-23 ມິຖຸນາ 2019.
ກອງປະຊຸມຄັ້ງນີ້ ຍັງໄດ້ແລກປ່ຽນຄຳຄິດເຫັນກ່ຽວກັບການສະໝັກເຂົ້າເປັນພາຄີຂອງສົນທິສັນຍາ ໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC) ຂອງປະເທດນອກພາກພື້ນອາຊຽນ, ພ້ອມທັງປຶກສາຫາລືຄວາມຄືບໜ້າກ່ຽວກັບການສ້າງເຄືອຂ່າຍຕົວເມືອງອັດສະລິຍະອາຊຽນ, ເຊີ່ງສືບຕໍ່ປະຕິບັດຂໍ້ລິເລີ່ມຂອງເປັນປະທານອາຊຽນ ສິງກະໂປ 2018. ນອກນັ້ນ, ກໍ່ໄດ້ປຶກສາຫາລືເພື່ອ ຮັດແໜ້ນການຮ່ວມມື ລະຫວ່າງອາຊຽນ ກັບ ປະເທດຄູ່ເຈລະຈາຂອງອາຊຽນ ແລະ ບັນຫາອື່ນໆ ທີ່ມີຄວາມສົນໃຈຮ່ວມກັນ.