ໃນວັນທີ 20 ມີນາ 2019, ທີ່ ກະຊວງການຕ່າງປະເທດ, ໄດ້ມີພິທີລົງນາມໃນເອກະສານແລກປ່ຽນໂຄງການຊ່ວຍເຫຼືອ ຈາກ ລັດຖະບານຍີ່ປຸ່ນ ຈໍານວນ 04 ໂຄງການ, ຊຶ່ງຕາງໜ້າຝ່າຍລາວ ຮ່ວມລົງນາມໃນເອກະສານ ແລະ ກ່າວຮັບໂຄງການ ໂດຍ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າຝ່າຍຍີ່ປຸ່ນ ຮ່ວມລົງນາມໃນເອກະສານ ແລະ ກ່າວມອບໂດຍ ໂດຍ ທ່ານ ຕາເກຊິ ຮິກິຮາຣະ(Takeshi HIKIHARA), ເອກ​ອັກຄະ​ລາຊາທູດຍີ່ປຸ່ນປະຈໍາ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງຂອງສອງຝ່າຍ ເຂົ້າຮ່ວມເປັນສັກຂີພະຍານ.

      ເອກະສານແລກປ່ຽນ 04 ໂຄງການດັ່ງກ່າວ ມີຄື: ໂຄງການເພາະ​ພັນ​ປາ (Aquaculture)ມູນຄ່າ 200 ລ້ານເຢນ, ໂຄງ​ການ​ຕ້ານ​ການ​ກໍ່​ການ​ຮ້າຍ (Counterterrorism) ມູນ​ຄ່າ 200 ລ້ານເຢນ, ໂຄງ​ການ​ຊ່ວຍ​ເຫຼືອ​ລ້າ​ນອກ​ໂຄງ​ການ (Non-Project)ມູນ​ຄ່າ 500 ລ້ານເຢນ ແລະ ໂຄງ​ການ​ຂະ​ຫຍາຍ​ລະ​ບົບ​ທໍ່​ສົ່ງ​ນ້ຳ​ປະ​ປາ ຂອງ ນະ​ຄອນຫຼວງ​ພະ​ບາງ (ຂັ້ນ​ຕອນ​ອອກ​ແບບ) ມູນ​ຄ່າ 97 ລ້ານເຢນ, ຊຶ່ງແມ່ນ​ໂຄງ​ການ​ຊ່ວຍ​ເຫຼືອ​ລ້າ ຂອງ ລັດ​ຖະ​ບານ​ຍີ່​ປຸ່ນ ລວມ​ມູນ​ຄ່າ 997 ລ້ານ​ເຢນ ຫຼື ​ປະ​ມານ 8,2 ລ້ານ ໂດ​ລາ​ສະ​ຫະ​ລັດ. ການຊ່ວຍ​ເຫຼືອ 04 ໂຄງ​ການ ທີ່ໄດ້ລົງນາມໃນຄັ້ງນີ້ ແມ່ນນອນຢູ່ໃນແຜນການ​ຮ່ວມ​ມື​ ລາວ-ຍີ່​ປຸ່ນ ເພື່ອ​ພັດ​ທະ​ນາ ສ​ປ​ປ ລາວ ແບບ​ຍືນ​ຍົງ, ເຊິ່ງສອງ​ນາ​ຍົກ​ລັດ​ຖະ​ມົນ​ຕີ ລາວ ແລະ ຍີ່​ປຸ່ນ ໄດ້​ເຫັນ​ດີ​ຮ່ວມ​ກັນ ໃນ​ເດືອນກັນ​ຍາ 2016, ໂດຍ​ປະ​ຕິ​ບັດ​ຄຽງ​ຄູ່​ກັບແຜນ​ພັດ​ທະ​ນາ​ເສດ​ຖະ​ກິດ-ສົງ​ຄົມ 5 ປີ ຄັ້ງ​ທີ 8 (2016-2020) ຂອງ ສ​ປ​ປ ລາວ.

ນອກ​ຈາກ 04 ໂຄງ​ການ ​ທີ່​​ໄດ້​ລົງ​ນາມ​ໃນ​ຄັ້ງນີ້, ໃນ​ວັນ​ທີ 06 ມີ​ນາ 2019 ຜ່ານ​ມາກໍ​ໄດ້​ມີ​ການ​ລົງ​ນາມຮັບ​ເອົາ​ການ​ຊ່ວຍ​ເຫຼືອຈາກລັດ​ຖະ​ບານ​ຍີ່​ປຸ່ນ 04 ໂຄງ​ການຜ່ານ​ບັນ​ດາ​ອົງ​ການ​ຈັດ​ຕັ້ງ​ສາ​ກົນປະ​ຈຳສ​ປ​ປລາວ (UNICEF, UN-Habitat ແລະ FAO) ເພື່ອຊ່ວຍ​ເຫຼືອຟື້ນ​ຟູ​ໄພ​ພິ​ບັດຢູ່ແຂວງ​ອັດຕະປື, ເປັນ​ຕົ້ນ​ແມ່ນການ​ຟື້ນ​ຟູ​ກະ​ສິ​ກຳ, ເຮືອນ​ຊານ​ບ້ານ​ຊ່ອງ, ການ​ສຶກ​ສາແລະການ​ສະ​ໜອງ​ນ້ຳ​ສະ​ອາດແກ່ສ​ປ​ປລາວລວມ​ມູນ​ຄ່າປະ​ມານ 7,6 ລ້ານໂດ​ລາສະ​ຫະ​ລັດ.

ໃນພິທີດັ່ງກ່າວ, ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ໄດ້ສະແດງຄວາມຂອບໃຈຢ່າງຈິງໃຈ ແລະ ຕີລາຄາສູງ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ຍາມໃດກໍໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ມາໂດຍຕະຫຼອດ, ໂດຍ​ສະ​ເພາະ ການຊ່ວຍເຫຼືອທາງການເພື່ອການພັດທະນາ (ODA), ຊຶ່ງຍີ່ປຸ່ນ ໄດ້ເປັນອັນດັບ 1 ຂອງປະເທດທີ່ໃຫ້ການຊ່ວຍເຫຼືອແກ່ ສປປ ລາວຕະຫຼອດ​ມາ, ສະ​ເລ່ຍ 90-100 ລ້ານ ​ໂດ​ລາ ສະຫະລັດ ຕໍ່ ປີ, ເປັນ​ຕົ້ນແມ່ນ ການພັດທະນາພື້ນຖານໂຄງລ່າງ, ຊັບພະຍາກອນມະນຸດ, ສາທາລະນະສຸກ, ວຽກ​ງານ​ກະ​ສິ​ກຳ ແລະ ປ່າ​ໄມ້ ແລະ ອື່ນໆ, ຊຶ່ງການ​ຊ່ວຍ​ເຫຼືອ​ດັ່ງ​ກ່າວ ໄດ້​ປະ​ກອບ​ສ່ວນ​ອັນສຳ​ຄັນ​ເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ, ການເຊື່ອມໂຍງເຂົ້າກັບພາກພື້ນຂອງ ສປປລາວ ແລະ ​ໄດ້​ເຮັດ​ໃຫ້​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ລາວ​ນັບ​ມື້​ນັບ​ດີ​ຂຶ້ນ​ເປັນ​ກ້າວໆ.

ພ້ອມນີ້, ທ່ານຮອງລັດຖະມົນຕີ ກໍໄດ້ສະແດງຄວາມ​​ເຊື່ອ​ໝັ້ນວ່າ04 ໂຄງ​ກາ​ານ​ຊ່ວຍ​ເຫຼືອ ຄັ້ງນີ້ ຈະ​ປະ​ກອບ​ສ່ວນ​ອັນ​ສຳ​ຄັນ ເຂົ້າໃນການ​ພັດ​ທະ​ນາ​ຂະ​ແໜງ​ການປະ​ມົງ, ເພີ່ມ​ຂີດຄວາມ​ອາດ​ສາ​ມາດ​ໃຫ້​ແກ່​ຂະ​ແໜງ​ການປ້ອງ​ກັນ​ຄວາມ​ສະ​ຫງົບ, ສະ​ໜອງ​ນ້ຳ​ປະ​ປາໃຫ້​ແກ່​ປະ​ຊາ​ຊົນ​ຊາວ​ນະ​ຄອນຫຼວງ​ພະ​ບາງ​ໄດ້​ພຽງ​ພໍ ແລະ ​ສະ​ໜັບ​ສະ​ໜູນການ​ດຸ່ນ​ດ່ຽງ​ງົບ​ປະ​ມານແກ່ ສ​ປ​ປ ລາວ, ແລະ ຕາງ​ໜ້າ​ລັດ​ຖະ​ບານ ແລະ ປະ​ຊາ​ຊົນ​ລາ​ວ ຂໍ​ໃຫ້​ຄຳ​ໝັ້ນ​ສັນ​ຍາ​ວ່າ ຈະ​ນຳໃຊ້​ບັນ​ດາ​ໂຄງ​ການ​ຊ່ວຍ​ເຫຼືອຄັ້ງ​ນີ້ ໃຫ້ເກີດ​ປະ​ໂຫຍດ​ສູງ​ສຸດແກ່​ການພັດ​ທະ​ນາ ສ​ປ​ປ ລາວ ກໍ​ຄືປະ​ຊາ​ຊົນ​ລາວ. ໃນຕອນທ້າຍ ທ່ານຮອງລັດຖະມົນຕີ ໄດ້​ອວຍພອນໃຫ້ສາຍພົວພັນການເປັນຄູ່ຮ່ວມຍຸດທະສາດລະຫວ່າງສ​ປ​ປລາວ ແລະ ຍີ່ປຸ່ນໄດ້ຮັບການພັດທະນາຢ່າງບໍ່ຢຸດຢັ້ງໃນອານາຄົດ.