ຄະນະຜູ້ແທນຂອງ ສປປ ລາວ ແລະ ອົດສະຕຣາລີ ໄດ້ເຂົ້າຮ່ວມກອງປະຊຸມປຶກສາຫາລືລະດັບສູງ ລະຫວ່າງ ສປປ ລາວ - ອົດສະຕຣາລີ ຄັ້ງທີ 13, ໃນວັນທີ 31 ຕຸລາ 2018 ທີ່ ນະຄອນຫຼວງວຽງຈັນ.

ກອງປະຊຸມ ທີ່ຈັດຂຶ້ນພາຍໃຕ້ການເປັນເຈົ້າພາບຂອງ ກະຊວງການຕ່າງປະເທດ ແຫ່ງ ສປປ ລາວ ໃນຄັ້ງນີ້ ສະແດງເຖິງສາຍພົວພັນທີ່ແໜ້ນແຟ້ນ ແລະ ຍາວນານ ຕະຫຼອດໄລຍະ 66 ປີ ທີ່ຜ່ານມາ.

ກອງປະຊຸມ ໄດ້ມີການປຶກສາຫາລື ກ່ຽວກັບ ການຮ່ວມມືອັນດີໃນຂະແຫນງການຕ່າງໆ ລະຫວ່າງສອງປະເທດ ແລະ ບັນຫາທີ່ມີຄວາມສົນໃຈຮ່ວມກັນ ເຊັ່ນ: ການເພີ່ມມູນຄ່າການຄ້າສອງຝ່າຍ ແລະ ຂະແຫນງການທີ່ຈະຮ່ວມມືກັນໃນອະນາຄົດ ເພື່ອສົ່ງເສີມສະຖຽນລະພາບ ແລະ ຄວາມຈະເລີນຮຸ່ງເຮືອງໃນພາກພືຶ້້ນ.

ສປປ ລາວ ແລະ ອົດສະຕຣາລີ ໄດ້ກຳນົດທິດທາງສໍາລັບການຮ່ວມມືສອງຝ່າຍ ໃນຕໍ່ໜ້າ ໃນຂະແຫນງການຕ່າງໆ ລວມທັງຂະແຫນງປ້ອງກັນຄວາມສະຫງົບ ແລະ ການຄ້າ. ສອງຝ່າຍ ເຫັນດີສືບຕໍ່ແລກປ່ຽນການຢ້ຽມຢາມຂອງການນໍາຂັ້ນສູງ ໂດຍສະເພາະ ລະຫວ່າງ ສອງອົງການນິຕິບັນຍັດ ແລະ ໃນຂະແໜງການຄ້າ, ປ້ອງກັນປະເທດ, ປ້ອງກັນຄວາມສະຫງົບ, ດ້ານກະສິກຳ ແລະ ໂຄງການຮ່ວມມືດ້ານສິດທິມະນຸດ.

ອົດສະຕຣາລີ ສະແດງຄວາມຫມາຍຫມັ້ນທີ່ຈະຮັກສາບົດບາດທີ່ນໍາຫນ້າຂອງຕົນ ໃນການສະໜັບສະໜູນຂະ       ແໜງການທີ່ເປັນບູລິມະສິດຂອງ ແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ ໃນນັ້ນລວມທັງດ້ານການສຶກສາ, ການພັດທະນາຊັບພະຍາກອນມະນຸດ, ການຄຸ້ມຄອງນໍ້າ, ການຄ້າ ແລະ ການພັດທະນາພາກທຸລະກິດເອກະຊົນ. ອົດສະຕຣາລີ ໄດ້ເຮັດວຽກຢ່າງໃກ້ຊິດກັບ ສປປ ລາວ ໃນການໃຫ້ການຊ່ວຍເຫລືອດ້ານມະນຸດສະທໍາຢ່າງທັນການ ແລະ ມີປະສິດທີພາບ ຕໍ່ເຫດການໄພພິບັດ ຢູ່ ແຂວງອັດຕະປື.

ສອງຝ່າຍ ຍັງໄດ້ປຶກສາຫາລື ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ສອງຝ່າຍ ໄດ້ຢໍ້າຄືນເຖິງຄວາມສຳຄັນຂອງການເປັນແກນກາງຂອງ ອາຊຽນ ໃນການຊອກຫາສິ່່ງທ້າທາຍຕ່າງໆໃນພາກພື້ນ ແລະ ຫລັກການໃນການຮ່ວມມືຢ່າງມີຫລັກການ ແລະ ການເປີດກວ້າງເຊື່່່ອມໂຍງທາງດ້ານເສດຖະກິດຢ່າງຮອບດ້ານ ເພື່່ອສົ່ງເສີມຄວາມຫມັ້ນຄົງ ແລະ ຄວາມຈະເລີນຮຸ່ງເຮືອງໃນພາກພື້ນ.

ກອງປະຊຸມປຶກສາຫາລືລະດັບສູງ ລະຫວ່າງ ສປປ ລາວ - ອົດສະຕຣາລີ ຄັ້ງຕໍ່ໄປ ຈະຖືກຈັດຂຶ້້ນໃນປີ 2020, ຊຶ່ງຈະມີຂຶ້ນ ກ່ອນທີ່ ສປປ ລາວ ຈະຮັບໜ້າທີ່ ເປັນປະເທດປະສານງານ ສໍາລັບການພົວພັນ ອາຊຽນ-ອົດສະຕຣາລີ ໃນປີ 2021.