ໃນຕອນບ່າຍຂອງວັນທີ 14 ພະຈິກ 2018 ທີ່ ກະຊວງການຕ່າງປະເທດ, ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບ ແລະ ຍື່ນຈົດໝາຍແຕ່ງຕັ້ງຂອງ ທ່ານ ດຣ. ມາກ ເອັນດຣິວ ຈາກັອບ (Dr. Mark Andrew JACOBS), ຜູ້ຕາງໜ້າຄົນໃໝ່ຂອງ ອົງການອະນາໄມໂລກ (WHO) ປະຈຳ ສປປ ລາວ.
ໃນໂອກາດດັ່ງກ່າວ, ທ່ານ ຮອງລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງຜູ້ຕາງໜ້າຂອງ ອົງການ WHO ຄົນໃໝ່ ປະຈຳ ສປປ ລາວ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການຮ່ວມມືທີ່ດີ ແລະ ການຊ່ວຍເຫຼືອຂອງ ອົງການ WHO ຕໍ່ ສປປ ລາວ ໃນໄລຍະທີ່ຜ່ານມາ. ໃນນັ້ນ, ທ່ານ ນາງ ຄຳເພົາ ເອີນທະວັນ ຍັງໄດ້ສະແດງຄວາມເຊື່ອໝັັ້ນວ່າ ພາຍໃຕ້ການນຳພາຂອງຜູ້ຕາງໜ້າຄົນໃໝ່, ອົງການ WHO ຈະເພີ່ມທະວີການຮ່ວມມື ແລະ ສືບຕໍ່ໃຫ້ການສະໜັບສະໜູນແກ່ ສປປ ລາວ ໃນການຈັດຕັ້ງປະຕິບັດແຜນຍຸດທະສາດການຮ່ວມມືລະຫວ່າງ ສປປ ລາວ ແລະ ອົງການ WHO ສົກປີ 2017-2021, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ການຫລຸດພົ້ນຈາກສະຖານະພາບປະເທດດ້ອຍພັດທະນາ ແລະ ການປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ໂດຍສະເພາະ ວຽກງານດ້ານສາທາລະນະສຸກເຊັ່ນ: ການເພີ່ມການເຂົ້າເຖິງການບໍລິການສຸຂະພາບຂັ້ນພື້ນຖານ, ການປັບປຸງໃຫ້ລະບົບສາທາລະນະສຸກມີຄວາມເຂັ້ມແຂງ ແລະ ມີປະສິດທິພາບ, ພ້ອມທັງສຸມໃສ່ການຕ້ານ ແລະ ຄວບຄຸມພະຍາດຕິດຕໍ່ຕ່າງໆຢູ່ ສປປ ລາວ ເພື່ອໃຫ້ສອດຄ່ອງກັບແຜນຍຸດທະສາດໃນການຕອບໂຕ້ພະຍາດລະບາດໃນພາກພື້ນ ແລະ ສາກົນ. ນອກຈາກນີ້, ທ່ານ ຮອງລັດຖະມົນຕີ ກໍ່ຍັງສະແດງຄວາມຂອບໃຈ ຕໍ່ອົງການດັ່ງກ່າວທີ່ໃຫ້ການຊ່ວຍເຫຼືອສຸກເສີນ ແກ່ປະຊາຊົນຜູ້ປະສົບໄພພິບັດທີ່ ເມືອງ ສະໜາມໄຊ, ແຂວງ ອັດຕະປື ແລະ ໃນແຂວງອື່ນໆ ທີ່ໄດ້ຮັບຜົນກະທົບຈາກໄພທຳມະຊາດອັນໜັກໜ່ວງໃນໄລຍະຜ່ານມານີ້, ພ້ອມທັງອວຍພອນໃຫ້ທ່ານຜູ້ຕາງໜ້າ ອົງການ WHO ຄົນໃໝ່ປະສົບຜົນສຳເລັດໃນການມາປະຕິບັດໜ້າທີ່ຂອງທ່ານ ຢູ່ ສປປ ລາວ ໃນຄັ້ງນີ້.
ໃນໂອກາດດຽວກັນນີ້, ທ່ານ ດຣ. ມາກ ເອັນດຣິວ ຈາກັອບ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອົບອຸ່ນຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ແລະ ສະແດງຄວາມຂອບໃຈມາຍັງລັດຖະບານ ແຫ່ງ ສປປ ລາວ ທີ່ໄດ້ອະນຸມັດໃຫ້ທ່ານ ມາປະຕິບັດໜ້າທີ່ຢູ່ ສປປ ລາວ. ທ່ານຍັງໄດ້ໃຫ້ຄຳໝັ້ນສັນຍາວ່າ ອົງການ WHO ຈະສືບຕໍ່ເພີ່ມທະວີການຮ່ວມມືກັບລັດຖະບານ ສປປ ລາວ ໃນການຈັດຕັ້ງປະຕິບັດແຜນງານຕ່າງໆ ທີ່ເປັນບູລິມະສິດຂອງ ສປປ ລາວ ໃຫ້ໄດ້ຮັບໝາກຜົນທີ່ດີໃນອະນາຄົດຂ້າງໜ້າ.