ໃນວັນທີ 05 ພະຈິກ 2018, ທີ່ ກະຊວງການຕ່າງປະເທດ, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ Daniela Gitman, ທູດພິເສດຂອງ ກະຊວງການຕ່າງປະເທດ ແຫ່ງ ຣູມານີ, ຊຶ່ງໄດ້ເດີນທາງມາເຮັດວຽກ ທີ່ ສປປ ລາວ.
ການພົບປະກັນຄັ້ງນີ້, ສອງຝ່າຍ ໄດ້ຕີລາຄາສູງຕໍ່ ສາຍພົວພັນມິດຕະພາບທີ່ມີມູນເຊື້ອມາແຕ່ດົນນານຂອງສອງປະເທດ ຊຶ່ງນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນໃນວັນທີ 25 ພະຈິກ 1962 ເປັນຕົ້ນມາ. ສອງຝ່າຍໄດ້ມີການພົວພັນ-ຮ່ວມມືນຳກັນ ຢ່າງເປັນປົກກະຕິ ແລະ ໄດ້ໃຫ້ການສະໜັບສະໜູນ ຊື່ງກັນ ແລະ ກັນ ໃນເວທີພາກພື້ນແລະສາກົນ. ພ້ອມນີ້, ສອງຝ່າຍໄດ້ປຶກສາຫາລືກັນ ເພື່ອຮັດແໜ້ນການພົວພັນ-ຮ່ວມມືສອງຝ່າຍເປັນຕົ້ນ: ການແລກປ່ຽນການຢ້ຽມຢາມຂອງຄະນະຜູ້ແທນໃນລະດັບຕ່າງໆແລະຊຸກຍູ້ໃຫ້ມີການເຊັນບົດບັນທຶກຄວາມເຂົ້້າໃຈ(MOU) ລະຫວ່າງສອງກະຊວງການຕ່າງປະເທດລາວ-ຣູມານີເພື່ອເປັນຂົວຕໍ່ໃຫ້ແກ່ການຮ່ວມມືໃນຂະແໜງການອື່ນໆທີ່ສອງປະເທດມີຄວາມສົນໃຈຮ່ວມກັນ ແລະ ໄດ້ປຶກສາຫາລື ເພື່ອກະກຽມໃຫ້ແກ່ການເຊັນສັນຍາ ກ່ຽວກັບ ການຍົກເວັ້ນວິຊາສຳລັບໜັງສືຜ່ານແດນການທູດ ລະຫວ່າງ ສປປ ລາວ ແລະ ຣູມານີ. ນອກນີ້, ສອງຝ່າຍຍັງໄດ້ປຶກສາຫາລືກັນ ເພື່ອຊຸກຍູ້ສົ່ງເສີມການຮ່ວມມືໃນຂະແໜງການຕ່າງໆໃນອະນາຄົດ ເປັນຕົ້ນ: ດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ, ການສຶກສາ ແລະ ອື່ນໆ.
ໃນໂອກາດດຽວກັນນີ້, ທ່ານ ນາງ Daniela Gitman ກໍໄດ້ສະແດງຄວາມຍິນດີ ແລະ ຂອບໃຈ ຕໍ່ການຕ້ອນຮັບຂອງ ທ່ານຮອງລັດຖະມົນຕີ ຄໍາເພົາ ເອີນທະວັນ ໃນຄັ້ງນີ້, ແລະ ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນ ສປປ ລາວ ທີ່ ໃຫ້ການສະໜັບສະໜູນ ຣູມານີ ໃນເວທີ ພາກພື້ນ ແລະ ສາກົນ, ໂດຍສະເພາະ ໃນຂອບການຮ່ວມມືຂອງ ອົງການ ສປຊ.