ໃນຕອນບ່າຍຂອງວັນທີ 9 ຕຸລາ 2018 ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ຍື່ນຈົດໝາຍແຕ່ງຕັ້ງຂອງ ທ່ານ Jan Maria R.Delbaere, ຜູ້ຕາງໜ້າຂອງອົງການອາຫານໂລກ (WFP) ປະຈຳ ສປປ ລາວ.
ໃນໂອກາດນີ້, ທ່ານ ຮອງລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຍິນດີຕ້ອນ ຮັບອັນອົບອຸ່ນມາຍັງ ທ່ານຜູ້ຕາງໜ້າຂອງອົງການ WFP ຄົນໃໝ່ ປະຈຳ ສປປ ລາວ ພ້ອມທັງສະແດງຄວາມ ຂອບໃຈ ແລະ ຕີລາຄາສູງ ຕໍ່ການຮ່ວມມືທີ່ດີ ແລະ ຊ່ວຍເຫຼືອຂອງອົງການ WFP ຕໍ່ ສປປ ລາວ ໃນໄລຍະ ທີ່ຜ່ານມາ. ທ່ານ ແສງເພັດ ຮຸ່ງບຸນຍວງ ຍັງໄດ້ສະແດງຄວາມຫວັງວ່າ ພາຍໃຕ້ການນຳພາ ຂອງຜູ້ຕາງໜ້າຄົນໃໝ່, ອົງການ WFP ຈະເພີ່ມທະວີການຮ່ວມມື ແລະ ໃຫ້ການສະໜັບສະໜູນແກ່ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ລວມທັງເປົ້າໝາຍ ການພັດທະນາແບບຍືນຍົງ ທີ່ກ່ຽວຂ້ອງກັບຂອບວຽກງານຂອງອົງການ WFP ໃຫ້ບັນລຸໄດ້ຕາມຄາດໝາຍ. ນອກຈາກນີ້, ທ່ານ ແສງເພັດ ຮຸ່ງບຸນຍວງ ກໍ່ຍັງສະແດງຄວາມ ຂອບໃຈຕໍ່ອົງການດັ່ງກ່າວ ທີ່ໃຫ້ການຊ່ວຍເຫຼືອສຸກເສີນແກ່ປະຊາຊົນຜູ້ປະສົບໄພພິບັດທີ່ ແຂວງ ອັດຕະປື ແລະ ບັນດາແຂວງ ອື່ນຂອງລາວ ທີ່ໄດ້ຮັບຜົນກະທົບຈາກໄພທຳມະຊາດອັນໜັກໜ່ວງໃນປີ 2018 ນີ້, ພ້ອມທັງອວຍ ພອນໃຫ້ ທ່ານ ຜູ້ຕາງໜ້າ ອົງການ WFP ຄົນໃໝ່ ປະສົບຜົນສຳເລັດໃນການປະຕິບັດໜ້າທີ່ຂອງທ່ານ.
ໃນໂອກາດດຽວກັນນີ້, ທ່ານ Jan Maria R.Delbaere ກໍ່ໄດ້ສະແດງຄວາມຂອບໃຈຕໍ່ການ ຕ້ອນຮັບອົບອຸ່ນຂອງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ສະແດງ ຄວາມຂອບໃຈມາຍັງລັດຖະບານ ແຫ່ງ ສປປ ລາວ ທີ່ໄດ້ອະນຸມັດໃຫ້ ທ່ານ ມາປະຕິບັດໜ້າທີ່ຢູ່ ສປປ ລາວ. ທ່ານຍັງໄດ້ໃຫ້ຄຳໜັ້ນສັນຍາວ່າ ອົງການ WFP ຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ແລະ ເພີ່ມທະວີ ການຮ່ວມມືກັບລັດຖະບານ ສປປ ລາວ ໃນການຈັດຕັ້ງປະຕິບັດແຜນການຮ່ວມມືສອງຝ່າຍໃຫ້ໄດ້ຮັບ ໝາກຜົນທີ່ດີໃນຕໍ່ໜ້າ.
ໃນປະຈຸບັນອົງການ WFP ໄດ້ໃຫ້ການຊ່ວຍເຫຼືອ ສປປ ລາວ ໃນຫຼາຍໂຄງການເຊັ່ນ: ການປະ ກອບສ່ວນເຂົ້າໃນການຈັດຕັ້ງປະຕິບັດວຽກງານການພັດທະນາ ເສດຖະກິດ-ສັງຄົມ ແຫ່ງຊາດ ກໍ່ຄືການກະກຽມຮັບມືກັບໄພພິບັດ; ວຽກງານສຸຂະພາບ ແລະ ໂພຊະນາການຂອງແມ່ແລະເດັກ; ໂຄງການລິເລີ່ມກ່ຽວກັບການດຳລົງຊີວິດທີ່ມີແບບແຜນດ້ານໂພຊະນາການ;ໂຄງການຄ້ຳປະກັນສະບຽງອາຫານ ແລະ ການຕະຫຼາດ ແລະ ໂຄງການອາຫານເສີມໃຫ້ແກ່ໂຮງຮຽນປະຖົມ.