ໃນວັນທີ 3 ຕຸລາ 2018, ທີ່ ກະຊວງການຕ່າງປະເທດ, ທ່ານ ນາງ ຄຳ​ເ​ພົາ ເອີນ​ທະ​ວັນ, ຮອງລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ໄດ້​ຕ້ອນ​ຮັບ​ການ​ເຂົ້າ​ຢ້ຽມຂ່ຳ​ນັບ ແລະ ມອບ​ໜັງ​ສື​ແຕ່ງ​ຕັ້ງຂອງ ທ່ານ ບຸ່ຍ ເທ້ ຢຸ້ງ, ​ກົງ​ສຸນ​ໃຫຍ່ ​ແຫ່ງ ສ​ສ. ຫວຽດ​ນາມ ປະ​ຈຳ​ ແຂວງຈຳປາສັກ ແລະ ຮັບ​ຜິດ​ຊອບ​ບັນ​ດາແຂວງ​ພາກໃຕ້​ຂອງ ສ​ປ​ປ ລາວ.

          ໃນ​ໂອກາດນີ້, ທ່ານຮອງລັດ​ຖະ​ມົນ​ຕີ ກະ​ຊວງ​ການ​ຕ່າງ​ປະ​ເທດ ໄດ້​ສະ​ແດ​ງ​ຄວາມຍິ​ນ​ດີ​ຕ້ອນ​ຮັບ ແລະ ​ຊົມ​ເຊີຍຕໍ່​ ທ່ານບຸ່ຍ ເທ້ ຢຸ້ງ ທີ່​ໄດ້​ຮັບ​​ແຕ່ງ​ຕັ້ງ​ໃຫ້​ມາ​ດຳ​ລົງ​ຕຳ​ແໜ່ງ​ເປັນກົງ​ສຸນ​ໃຫຍ່ ແຫ່ງ ສ​ສ. ຫວຽດ​ນາມ ປະ​ຈຳ ​ແຂວງ​ຈຳປາສັກ, ພ້ອມ​ທັງ​ສະ​ແດງ​ຄວາມ​ເຊື່ອ​ໝັ້ນ​ວ່າພາຍ​ໃນ​ໄລ​ຍະເວ​ລາ ​ທີ່​ທ່ານ​ກົງ​ສຸນ​ໃຫຍ່​ ປະ​ຕິ​ບັດ​​ໜ້າ​ທີການ​ທູດ​ຂອງຕົນຢູ່ສ​ປ​ປລາວ, ຈະສືບ​ຕໍ່ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ, ​​ຄວາມສາ​ມັກ​ຄີແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານ ລະ​ຫວ່າງ ​ສອງ​ປະ​ເທດ ກໍຄືປະຊາຊົນສອງຊາດລາວ-ຫວຽດ​ນາມ, ພິເສດແມ່ນ​ການ​ພົວ​ພັນ​ຮ່ວມ​ມືລະ​ຫວ່າງແຂວງ​ຈຳປາສັກ ແລະ ​ບັນ​ດາ​ແຂວງ​ພາກໃຕ້ຂອງ​ລາວກັບບັນ​ດາ​ແຂວງ​​ຂອງ​ຫວຽດ​ນາມ ໃຫ້​ມີ​ປະ​ສິດ​ທິ​ຜົນ ແລະ ງອກ​ງາມ​ຍິ່ງໆ​ຂຶ້ນ, ໂດຍສະເພາະ ແມ່ນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງຂອງສອງປະເທດ ເຊັ້ນ: ຂໍ້ຕົກລົງໃນກອງປະຊຸມ ຄັ້ງທີ 40 ຂອງ ຄະນະກຳມະການຮ່ວມມື ສອງຝ່າຍ ລາວ-ຫວຽດນາມ, ຫວຽດນາມ-ລາວ, ການຊຸກຍູ້ບັນດາໂຄງການຮ່ວມມືຂອງສອງປະເທດ ຢູ່ບັນດາແຂວງທີ່ຕົນຮັບຜິດຊອບ ແລະ ດຶງດູດການລົງທຶນຂອງຫວຽດນາມ ມາສູ່ບັນດາແຂວງພາກໃຕ້ຂອງລາວ, ເອົາໃຈໃສ່ຮັດແໜ້ນການເຕົ້າໂຮມຄວາມສາມັກຄີ ລະຫວ່າງ ພີ່ນ້ອງຊາວຫວຽດນາມ ທີ່ອາໄສຢູ່ໃນບັນດາແຂວງພາກໃຕ້ຂອງລາວ ໃຫ້ດຳລົງຊີວິດ ຢ່າງມີຄວາມສຸກ ປະກອບສ່ວນເຂົ້າໃນການພັດທະນາ ຂອງບັນດາແຂວງພາກໃຕ້ ເວົ້າສະເພາະ ກໍຄືເສີມຂະຫຍາຍການຮ່ວມມື ສອງຝ່າຍ.

ໃນ​ໂອ​ກາດ​ດັ່ງ​ກ່າວ​ນີ້, ທ່ານຮອງລັດ​ຖະ​ມົນ​ຕີ ກໍ​ໄດ້ສະ​ແດງ​ຄວາມ​ຂອບ​ໃຈ ​ຕໍ່​ການ​ຊ່ວຍ​ເຫຼືອ​ ຂອງພັກ-ລັດ​ຖະ​ບານ ແລະ ປະ​ຊາ​ຊົນ​ຫວຽດ​ນາມອ້າຍ​ນ້ອງ​ທີ່​ໄດ້ໃຫ້​ການ​ຊ່ວຍ​ເຫຼືອ ສ​ປ​ປ ລາວ ເປັນ​ຢ່າງ​ດີຕະຫຼອດ​ມາ, ເຊິ່ງ​ເປັນ​ການ​ປະ​ກອບ​ສ່ວນ​​ອັນສຳ​ຄັນ​ໃຫ້​ແກ່​ການ​ພັດ​ທະ​ນາ​ ເສດ​ຖະ​ກິດ-ສັງ​ຄົມຂອງ​ແຂວງຈຳປາສັກແລະບັນ​ດາ​ແຂວງ​ພາກໃຕ້​​ຂອງລາວ, ພິເສດ ແມ່ນການຊ່ວຍເຫຼືອທີ່ທັນການ ແລະ ມີປະສິດທິຜົນ ຕໍ່ເຫດການອຸທົກກະໄພ ຢູ່ເມືອງສະໜາມໄຊ ແຂວງອັດຕະປື.

          ​ໃນ​ໂອ​ກາດ​ດຽວ​ກັນ, ທ່ານ ບຸ່ຍ ເທ້ ຢຸ້ງ ໄດ້​ສະ​ແດງ​ຄວາມ​ຂອບ​ໃຈຕໍ່ ທ່ານ ນາງ ຄຳ​ເພົາ ເອີນ​ທະ​ວັນ ທີ່​ໄດ້​ໃຫ້​ການ​ຕ້ອນ​ຮັບ​ອັນ​ອົບ​ອຸ່ນ ແລະ ສະ​ໜິດ​ສະ​ໜົມ ພ້ອມ​ທັງ​ໃຫ້​ຄຳ​ໝັ້ນ​ສັນ​ຍາ​ວ່າ ຕະຫຼອດ​ໄລ​ຍະ​ປະ​ຕິ​ບັດ​ໜ້າ​ທີ່​ຂອງ​ຕົນ​ຢູ່ ສ​ປ​ປ ລາວ ຕົນ​ຈະ​ປະ​ກອບ​ສ່ວນ​ຢ່າງສຸດ​ຄວາມ​ສາ​ມາດເຂົ້າໃນການພັດທະນາຂອງບັນດາແຂວງພາກໃຕ້ຂອງລາວ ກໍຄືໃນການເສີມຂະຫຍາຍ​ສາຍ​ພົວ​ພັນ​ມິດ​ຕະ​ພາບ​, ຄວາມ​ສາ​ມັກຄີແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານລະ​ຫວ່າງ​ສອງ​ປະ​ເທດ​ ​ໃຫ້ຈະ​ເລີນງອກ​ງາມຍິ່ງໆ​ຂຶ້ນ.