ໃນວັນທີ 15 ມິຖຸນາ 2018, ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດພິທີປິດການບຳລຸງພາສາອັງກິດ ຊຸດທີ 39 ໃຫ້ພະນັກງານກະຊວງການຕ່າງປະເທດ, ບັນດາກະຊວງອ້ອມຂ້າງສູນກາງ ແລະ ທ້ອງຖິ່ນ, ຈຳນວນ 50 ທ່ານ (ໃນນີ້ມີພະນັກງານຍິງ 21 ທ່ານ), ໄດ້ສໍາເລັດການບໍາລຸງຍົກລະດັບຄວາມຮູ້ພາສາອັງກິດ, ໄລຍະເວລາ 6 ເດືອນ, ເຊິ່ງໄດ້ດໍາເນີນມາແຕ່ວັນທີ 15 ມັງກອນ 2018 ເປັນຕົ້ນມາ ແລະ ໄດ້ສໍາເລັດລົງໃນວັນທີ 15 ມິຖຸນາ 2018.
ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ໃຫ້ກຽດເຂົ້າຮ່ວມເປັນປະທານພິທີປິດໃນຄັ້ງນີ້, ມີບັນດາທ່ານຜູ້ຕາງໜ້າຈາກກົມຕ່າງໆຂອງກະຊວງການຕ່າງປະເທດ, ຄະນະຈັດຕັ້ງສູນກາງ ແລະ ຜູ້ເຂົ້າຮ່ວມຊຸດຝຶກອົບຮົມທັງໝົດ ຫຼາຍກວ່າ 90 ທ່ານ.
ທ່ານ ນ. ພິມພາ ແກ້ວມີໄຊ, ຮອງຫົວໜ້າສະຖາບັນການຕ່າງປະເທດ, ໄດ້ຂຶ້ນຜ່ານບົດສະຫຼຸບລາຍງານຜົນສຳເລັດຂອງຊຸດຮຽນ, ເຊິ່ງໄດ້ຕີລາຄາວ່າ ຊຸດຮຽນດັ່ງກ່າວແມ່ນໄດ້ບັນລຸຜົນຕາມຄາດໝາຍທີ່ວາງໄວ້ ແລະ ໄດ້ຍົກໃຫ້ເຫັນວ່າ ຜູ້ເຂົ້າຮ່ວມບຳລຸງພາສາອັງກິດໃນຊຸດນີ້ ສາມາດຍົກລະດັບພາສາອັງກິດໄດ້ໃນລະດັບທີ່ດີພໍສົມຄວນ ເປັນຕົ້ນ ການສົນທະນາ, ການນຳສະເໜີບົດ, ການຂີດຂຽນ ແລະ ການຟັງ ເພື່ອນຳໄປໝູນໃຊ້ເຂົ້າໃນການປະຕິບັດວຽກງານຕົວຈິງຂອງຕົນຢ່າງເຕັມສ່ວນ.
ໃນພິທີດັ່ງກ່າວ, ທ່ານ ທອງຜ່ານ ສະຫວັນເພັດ, ປະທານພິທີ ໄດ້ໃຫ້ກຽດໂອ້ລົມຕໍ່ພະນັກງານ ທີ່ສຳເລັດການບຳລຸງພາສາອັງກິດຄັ້ງນີ້, ໂດຍໄດ້ເນັ້ນເຖິງຄວາມຈຳເປັນ ແລະ ຄວາມສຳຄັນ ຕໍ່ກັບການຍົກລະດັບພາສາຕ່າງປະເທດ ແລະ ວິຊາສະເພາະ, ເພື່ອເປັນເຄື່ອງມືໃນການພົວພັນຮ່ວມມືກັບສາກົນ ໃນໄລຍະໃໝ່, ໂດຍເລັ່ງໃສ່ປະຕິບັດແຜນບຸກທະລຸ 4 ດ້ານ ທີ່ ພັກ-ລັດ ວາງອອກ ໃນກອງປະຊຸມໃຫຍ່ຂອງພັກ ຄັ້ງທີ X. ສະນັ້ນ, ການຍົກລະດັບພາສາອັງກິດ ຈຶ່ງເປັນວຽກງານໜຶ່ງທີ່ຈຳເປັນຕ້ອງໄດ້ເອົາໃຈໃສ່ຢ່າງຈິງຈັງ ແລະ ເພື່ອສ້າງພື້ນຖານຄວາມຮູ້ດ້ານພາສາໃຫ້ແກ່ພະນັກງານລັດໃຫ້ມີຄວາມເຂັ້ມແຂງ ແລະ ສາມາດນຳໃຊ້ໄດ້ໃນເວທີສາກົນ ເຊັ່ນ: ເຂົ້າຮ່ວມກອງປະຊຸມສາກົນໃນຂອບສອງຝ່າຍ ແລະ ຫຼາຍຝ່າຍ, ກອງປະຊຸມສຳມະນາຖອດຖອນບົດຮຽນໃນຫົວຂໍ້ຕ່າງໆ ລວມທັງການຂຽນບົດ ຫຼື ເອກະສານທາງການຕ່າງໆ.
ນອກຈາກນີ້, ທາງຄະນະຮັບຜິດຊອບຊຸດບຳລຸງພາສາອັງກິດຂອງສະຖາບັນການຕ່າງປະເທດ ຍັງໄດ້ສ້າງກິດຈະກຳການເຄື່ອນໄຫວນອກຫຼັກສູດ ໂດຍນຳພາຜູ້ເຂົ້າຮຽນໄປທັດສະນະສຶກສາສູນຢ້ຽມຢາມ ຂໍ້ມູນ-ຂ່າວສານຄົນພິການ (COPE), ຢ້ຽມຊົມສູນພັດທະນາແມ່ຍິງພິການລາວ ແລະ ເຂດເສດຖະກິດສະເພາະບຶງທາດຫຼວງ, ແລະ ຢ້ຽມຢາມເຂື່ອນໄຟຟ້ານໍ້າມັງ 3 ແລະ ຈັດການແຂ່ງຂັນກິລາຕ່າງໆ ເພື່ອເປັນການຮັດແໜ້ນຄວາມສາມັກຄີ ລະຫວ່າງ ຜູ້ເຂົ້າຮ່ວມບຳລຸງພາສາອັງກິດ ແລະ ພາກສ່ວນອື່ນໆໃຫ້ແໜ້ນແຟ້ນກວ່າເກົ່າ.