ໃນ​ວັນ​ທີ27 ເມ​ສາ 2018 ທີ່​ຫໍ​ປະ​ຊຸມ​ແຫ່ງ​ຊາດ, ນະ​ຄອນ​ຫລວງວຽງ​ຈັນ, ກອງ​ເລ​ຂາ​ຄະ​ນະ​ຊີ້​ນຳ​ລະ​ດັບ​ຊາດ ​ວ່າ​ດ້ວຍ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ ຮ່ວມ​ກັບ​ອົງ​ການ​ສະ​ຫະ​ປະ​ຊ​າ​ຊາດ ໄດ້​ຈັດ​ກອງ​ປະ​ຊຸມ​ປຶກ​ສາ​ຫາ​ລື​ກ່ຽວ​ກັບ ຜູ້​ມີ​ສ່ວນ​ຮ່ວມ​ໃນ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງຂື້ນ ​ເຊິ່ງໃຫ້​ກຽດ​ກ່າວ​ເປີດກອງ​ປະ​ຊຸມ​ໂດຍ ​ທ່ານ ນາງ ຄຳ​ເພົາ ເອີນ​ທະ​ວັນ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແລະ ທ່ານ ນາງ ກາ​ຣີ​ນາ ອິມ​ໂມ​ເນັນ, ຜູ​້ປະ​ສານ​ງານ​ອົງ​ການ​ສະ​ຫະ​ປະ​ຊາ​ຊາດ ປະ​ຈຳ ສ​ປ​ປ ລາວ ​ທັງ​ເປັນ​ຜູ້​ຕາງ​ໜ້າ​ຂອງ​ອົງ​ການ​ສະ​ຫະ​ປະ​ຊາ​ຊາດ​ເພື່ອ​ການ​ພັດ​ທະ​ນາ. ກອງ​ປະ​ຊຸມ​ດັ່ງ​ກ່າວ​ມີຜູ້​​ເຂົ້າ​ຮ່ວມຕາງ​ໜ້າ​ຈາກບັນ​ດາ​​ກະ​ຊວງ ແລະ ອົງ​ການ​ຈັດ​ຕັ້ງ​ມະ​ຫາ​ຊົນ​ອ້ອມ​ຂ້າງ​ສູນ​ກາງ, ຕາງ​ໜ້າ​ຈາກ​ 17 ແຂວງທົ່ວ​ປະ​ເທດ, ​ຕາງ​ໜ້າ​ຈາກ​ບັນ​ດາສະ​ຖານ​ທູດ, ອົງ​ການ​ເຄືອ​ຂ່າຍ​ຂອງສະ​ຫະ​ປະ​ຊາ​ຊາດ, ອົງ​ການຈັດ​ຕັ້ງສາ​ກົນທີ່​ບໍ່​ສັງ​ກັດ​ລັດ​ຖະ​ບານ, ອົງ​ການ​ຈັດ​ຕັ້ງ​ທາງ​ສັງ​ຄົມ​ຂອງ ສ​ປ​ປ ລາວ ແລະ ພາກ​ເອ​ກະ​ຊົນ​ເຂົ້າ​ຮ່ວມປະ​ມານ 150 ທ່ານ. ຈຸດ​ປະ​ສົງ​ຫລັກ​ຂອງກອງ​ປະ​ຊຸມ​ໃນ​ຄັ້ງ​ນີ້​ແມ່ນ​ເພື່ອ​ປຶກ​ສາ​ຫາ​ລື​ ແລະ ຊຸກ​ຍູ້​ໃຫ້​ທຸກ​ພາກ​ສ່ວນ​ໄດ້ປະ​ກອບ​ຄຳ​ຄິດ​ເຫັນ​ໃສ່​ຮ່າງ​ບົດ​ລາຍ​ງານ​ເ​ເຫ່ງ​ຊາດ​ແບບ​ສະ​ໝັກ​ໃຈ (VNR) ເຊິ່ງ​ເປັນ​ສະ​ບັບ​ທຳ​ອິດ​ຂອງ ສ​ປ​ປ ລາວ ທີ່ຈະ​ນຳ​ໄປ​ລາຍ​ງານ​ຕໍ່​ກອງ​ປະ​ຊຸມ​ເວ​ທີ​ການ​ເມືອງ​ລະ​ດັບ​ສູງ (HLPF) ​ຂອງ​ອົງ​ການ​ສະ​ຫະ​ປະ​ຊາ​ຊາດ ໃນ​ກາງ​ເດືອນ​ກໍ​ລະ​ກົດ 2018 ທີ່​ນິວຢອກ, ສະ​ຫະ​ລັດ​ອາ​ເມ​ລິ​ກາ.

ເນື້ອ​ໃນຕົ້ນ​ຕໍ​ຂອງ​ບົດ​ລາຍ​ງານ​ດັ່ງ​ກ່າວ​ແມ່ນ​ເປັນ​ການ​ລາຍ​ງານ​ຄວາມ​ຄືບ​ໜ້າ​ຂອງ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ (ປ​ພຍ) ຢູ່ ສ​ປ​ປ ລາວ ​ໂດຍ​ຈະ​ຍົກ​ໃຫ້​ເຫັນ​ເຖິງສະ​ພາບ​ລວມ​ຂອງ​ຜົນ​ສຳ​ເລັດ​ທີ່​ປະ​ຕິ​ບັດມາ​ໄດ້, ສິ່ງ​ທ້າ​ທ້າຍ ແລະ ທິດ​ທາງ​ໃນ​ການ​ຈັດ​ຕັ້ງ​ປະ​ຕິ​ບັດ ປ​ພຍ ໃນ​ຕໍ່​ໜ້າ ເຊິ່ງ​ບັນ​ດາ​ຜູ້​ເຂົ້າ​ຮ່ວມກໍ່​ໄດ້​ພ້ອມ​ກັນ​ຕັ້ງ​ໜ້າ​ປຶກ​ສາ​ຫາ​ລື ແລະ ປະ​ກອບ​ຄຳ​ຄິດ​ເຫັນ​ໃສ່​ຮ່າງ​ບົດ​ລາຍ​ງານຢ່າງ​ຫ້າວ​ຫັນ ເພື່ອໃຫ້​ບົດ​ລາຍ​ງານ​ສະ​ບັບ​ນີ້​ມີ​ເນື້ອ​ໃນ​ຄົບ​ຖ້ວນ​ສົມ​ບູນ ແລ​ະ ສອດ​ຄ່ອງກັບສະ​ພາບ​ຄວາມ​ເປັນ​ຈິງ​ຂອງ​ການ​ພັດ​ທະ​ນາໃນ ສ​ປ​ປ ລາວ.

ໃນ​ຕອນ​ທ້າຍທ່ານ​ປະ​ທານ​ຂອງກອງ​ປະ​ຊຸມ​​ ທ່ານ ນາງ ເພັດ​ສະ​ໝອນ​ ສອນ, ຮອງ​ຫົວ​ໜ້າ​ສູນ​ສະ​ຖິ​ຕິ​ແຫ່ງ​ຊາດ ກໍ່​ໄດ້​ກ່າວ​ສະ​ແດງຄວາມ​ຂອບ​ໃຈ​ຕໍ່​ຜູ້​ເຂົ້າ​ຮ່ວມ​ທີ່​ໄດ້​ປະ​ກອບ​ຄຳຄິດ​ເຫັນຢ່າງ​ມີ​ລັກ​ສະ​ນະ​ສ້າງ​ສັນ​ກົງ​ໄປ​ກົງ​ມາ ເຊິ່ງກອງ​ເລ​ຂາ ປ​ພຍ ​ຈະ​ໄດ້​ນຳ​ເອົາ​ບັນ​ດາຄຳ​ຄິດ​ເຫັນ​ດັ່ງ​ກ່າວໄປ​ສືບ​ຕໍ່​ໄປ​ພິ​ຈາ​ລະ​ນາດັດ​ປັບ​ຮ່າງ​ບົດ​ລາຍ​ງານ​ໃຫ້​ສົມ​ບູນຂຶ້ນ​ຕື່ມ ເພື່ອຈະ​ນຳ​ສະ​ເໜີ​ຂໍ​ການ​ອະ​ນຸ​ມັດ​ຈາກ​ລັດ​ຖະ​ບານ ກ່ອນທີ່​ຈະ​ສົ່ງ​ໃຫ້​ອົງ​ການ​ສະ​ຫະ​ປະ​ຊາ​ຊາດ.