ໃນວັນທີ 3-4 ເມສາ 2018, ທີ່ ໂຮງແຮມຄ​ຣາວພຣາຊາ, ນະຄອນຫຼວງວຽງຈັນ, ກະຊວງການຕ່າງປະເທດ ຮ່ວມກັບສໍານັກງານການທູດ ສ.ເກົາຫຼີ ປະຈໍາອາຊຽນ ໄດ້ຈັດກອງປະຊຸມສໍາມະນາກ່ຽວກັບການສົ່ງເສີມກົນໄກການຮ່ວມມືອາຊຽນ-ສ.ເກົາຫຼີ ຄັ້ງທີ 3” ໂດຍການສະໜັບສະໜູນຈາກໜ່ວຍງານຄຸ້ມຄອງໂຄງການ ອາຊຽນ-ສ.ເກົາຫຼີ ທີ່ີມີຫ້ອງການຕັ້ງຢູ່ນະຄອນຫຼວງຈາກາກຕາ, ປະເທດອິນໂດເນເຊຍ, ໂດຍມີຜູ້ເຂົ້າຮ່ວມຈາກກະຊວງ, ຂະແໜງການອ້ອມ​ຂ້າງ​ສູນ​ກາງ ແລະ ຄະນະຜູ້ແທນ ສ.ເກົາຫຼີ ລວມທັງໝົດ 100 ກວ່າທ່ານ.

ກອງປະຊຸມສຳມະນາຄັ້ງນີ້ ໄດ້ຮັບກຽດຂື້ນກ່າວຕ້ອນຮັບໂດຍ ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ. ໃນນີ້, ທ່ານໄດ້ຕີລາຄາສູງຕໍ່ການພົວພັນຮ່ວມມືລະຫວ່າງອາຊຽນ-ສ.ເກົາຫຼີ ໃນຖານະຄູ່ຮ່ວມຍຸດທະສາດ. ການຮ່ວມມືລະຫວ່າງສອງຝ່າຍນັບມື້ນັບໄດ້ຮັບການເສີມຂະຫຍາຍ ເຊິ່ງກວມເອົາຫລາຍຂະແໜງການເຊັ່ນ: ດ້ານການເມືອງ-ຄວາມໝັ້ນຄົງ, ເສດຖະກິດ, ວັດທະນະທໍາ-ສັງຄົມ, ການເຊື່ອມໂຍງອາຊຽນ ແລະ ການຮັດແຄບຄວາມແຕກໂຕນດ້ານການພັດທະນາພາຍໃນອາຊຽນ. ຄຽງຄູ່ກັນນີ້, ທ່ານ ນາງຄໍາເພົາ ເອີນທະວັນ ຍັງໄດ້ເນັ້ນໃຫ້ຜູ້ເຂົ້າຮ່ວມເອົາໃຈໃສ່ ຜັນຂະຫຍາຍເນື້ອໃນຈິດໃຈ ກອງປະຊຸມສຳມະນາຄັ້ງນີ້ໃຫ້ເກີດດອກອອກຜົນ ໂດຍສະເພາະ ການຂຽນໂຄງການລະອຽດ ເພື່ອລະດົມທຶນຈາກກອງທືນຮ່ວມມື ອາຊຽນ-ສ. ເກົາຫລີ ເພື່ອນຳມາຈັດຕັ້ງປະຕິບັດຢູ່ ສປປ ລາວ.

ໃນໂອກາດນີ້, ທ່ານ ຊິນຊອງຊຸນ, ເອກອັກຄະລັດຖະທູດ ສ.ເກົາຫຼີ ປະຈໍາ ລາວ ແລະ ທ່ານ ກີມ ຢອງແຈ, ເອກອັກຄະລັດຖະທູດ ສ.ເກົາຫຼີ ປະຈໍາ ອາຊຽນ ກໍໄດ້ຢໍ້າຄືນທີ່ຈະສືບຕໍ່ສະໜັບສະໜູນ ແລະ ໃຫ້ການຮ່ວມມືກັບອາຊຽນ ກໍ່ຄື ສປປ ລາວ ແນ​ໃສ່​ສົ່ງເສີມການ​ພົວ​ພັນ​ຮ່ວມ​ມື​ລະ​ຫວ່າງ​ ອາ​ຊຽນ-ສ.ເກົາ​ຫຼີ ເວົ້າລວມ ແລະ ເວົ້າສະເພາະ ການ​ພົວ​ພັນ​ຮ່ວມ​ມື​ ສ​ປ​ປ ລາວ-ສ.ເກົາ​ຫຼີ ໃຫ້ນັບມື້ນັບໄດ້ຮັບການເສີມຂະຫຍາຍ.

ໃນໄລຍະການສຳມະນາ, ບັນດາຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈ ການຮ່ວມມື ອາຊຽນ-ສ. ເກົາຫລີ ໂດຍສະເພາະ ການເປັນຄູ່ຮ່ວມຍຸດທະສາດລະຫວ່າງອາຊຽນ-ສ. ເກົາຫລີ ລວມທັງຂະແຫນງການບຸລິມະສິດ ແລະ ທິດທາງການຮ່ວມມືສຳລັບ ອາຊຽນ-ສ. ເກົາຫລີ ໃນຕໍ່ຫນ້າ. ອັນສຳຄັນ, ບັນດາຜູ້ເຂົ້າຮ່ວມໄດ້ເຂົ້້າໃຈ ກ່ຽວກັບ ລະບຽບຫລັກການຂອງການຂຽນໂຄງການລະອຽດ, ແລະ ຂັ້ນຕອນການນຳສະເຫນີໂຄງການ ເພື່ອລະດົມທຶນຈາກກອງທຶນການຮ່ວມມືອາຊຽນ-ສ.ເກົາຫຼີ ເພື່ອຈັດຕັ້ງປະຕິບັດໂຄງການຕ່າງໆຂອງ ສປປ ລາວ ແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງລາວເຮົາ ແລະ ທັງເປັນການສົ່ງເສີມຄວາມອາດສາມາດຂອງຂະແຫນງການ ສປປ ລາວ ໃນວຽກງານເຊື່ອມໂຍງພາກພື້ນ.