ໃນວັນທີ 10-11 ມັງກອນ 2018 ທີ່ຫ້ອງປະຊຸມສໍານັກງານປົກຄອງແຂວງອຸດົມໄຊ, ກະຊວງການຕ່າງປະເທດ ໄດ້ຈັດຕັ້ງກອງປະຊຸມເຜີຍແຜ່ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ແລະ ທາບທາມຮ່າງປັບປຸງຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ ແລະ ຮ່າງຂໍ້ຕົກລົງ ວ່າດ້ວຍມາດຖານຕຳແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ພາຍໃຕ້ການເປັນປະທານຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ໂດຍມີບັນດາທ່ານຮອງເຈົ້າແຂວງ, ເລຂາທິການ ແລະ ຮອງເລຂາທິການສະພາປະຊາຊົນແຂວງ, ຫົວໜ້າ ແລະ ຮອງຫ້ອງວ່າການແຂວງ, ຫົວໜ້າ ແລະ ຮອງພະແນກຂັ້ນແຂວງ ລວມທັງຜູ້ຕາງໜ້າຈາກຂະແໜງການຕ່າງໆທີ່ກ່ຽວຂ້ອງຂອງແຂວງໄຊຍະບູລີ, ຫຼວງພະບາງ, ຫຼວງນໍ້າທາ, ບໍ່ແກ້ວ, ຜົ້ງສາລີ, ຫົວພັນ ແລະ ອຸດົມໄຊ ເຂົ້າຮ່ວມຈໍານວນ 80 ກ່ວາທ່ານ.

ໃນວັນທີ 10 ມັງກອນ 2018, ຜູ້ເຂົ້າຮ່ວມກອງປະຊຸມໄດ້ຮັບຟັງການເຜີຍແຜ່ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ໂດຍແມ່ນ ທ່ານ ສົມຄິດ ວັນຄໍາ, ຮອງຫົວໜ້າກົມສົນທິສັນຍາ ແລະ ກົດໝາຍ ກະຊວງການຕ່າງປະເທດ ເປັນຜູ້ບັນຍາຍ. ຈຸດປະສົງຕົ້ນຕໍໃນການເຜີຍແຜ່ກົດໝາຍໃນຄັ້ງນີ້ ກໍເພື່ອສ້າງຄວາມຮັບຮູ້ ແລະ ຄວາມເຂົ້າໃຈໃຫ້ຜູ້ເຂົ້າເຂົ້າຮ່ວມກອງປະຊຸມ ແນໃສ່ຮັບປະກັນຄວາມເປັນເອກະພາບໃນການຈັດຕັ້ງປະຕິບັດກົດໝາຍດັ່ງກ່າວ ລະຫວ່າງ ສູນກາງ ແລະ ທ້ອງຖິ່ນ. ກອງປະຊຸມກອງປະຊຸມໄດ້ແລກ ປ່ຽນຄໍາເຫັນ ກ່ຽວກັບຫຼັກການ ແລະ ລະບຽບການ ກ່ຽວກັບການສ້າງ ແລະ ຈັດຕັ້ງປະຕິບັດສົນທິສັນຍາ ແລະ ສັນຍາສາກົນ ຕາມທີ່ໄດ້ກຳນົດໄວ້ໃນກົດໝາຍສະບັບນີ້ ໂດຍການສົມທຽບໃສ່ພາກປະຕິບັດຂອງສາກົນ ແລະ ພາກປະຕິບັດຂອງ ສປປ ລາວ ໃນໄລຍະຜ່ານມາ. ກົດໝາຍສະບັບນີ້ ຈະເປັນບ່ອນອີງທີ່ສໍາຄັນໃຫ້ແກ່ບັນດາອົງການຂັ້ນທ້ອງຖິ່ນໃນການຮ່ວມມືກັບຕ່າງປະເທດ, ເຊື່ອມໂຍງທາງດ້ານເສດຖະກິດກັບພາກພື້ນ. ກົດໝາຍດັ່ງກ່າວ ເລີ່ມມີຜົນສັກສິດນັບແຕ່ວັນທີ 18 ພະຈິກ 2017 ເປັນຕົ້ນມາ. ການສ້າງກົດໝາຍສະບັບນີ້ເປັນບາດ ກ້າວອັນສຳຄັນໃນການພັດທະນາຂະແໜງການຕ່າງປະເທດ ໄປສູ່ການຄຸ້ມຄອງດ້ວຍກົດໝາຍ ແລະ ນິຕິກຳ,ໂດຍສະເພາະແມ່ນການຄຸ້ມຄອງວຽກງານສົນທິສັນຍາ ແລະ ສັນຍາສາກົນ ໃຫ້ເປັນເອກະພາບໃນຂອບເຂດທົ່ວປະເທດ, ປະກອບສ່ວນໃນການຈັດຕັ້ງປະຕິບັດນະໂຍບາຍ ການຕ່າງປະເທດຂອງພັກ-ລັດ ໃຫ້ໄດ້ຮັບຜົນດີຂຶ້ນເລື່ອຍໆ.

ໃນວັນທີ 11 ມັງກອນ 2018, ຜູ້ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄ້ວາ, ປຶກສາຫາລື ແລະ ແລກ ປ່ຽນຄໍາເຫັນໃສ່ຮ່າງປັບປຸງຂໍ້ຕົກລົງຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກການຕ່າງ ປະເທດແຂວງ, ນະຄອນຫຼວງ ແລະ ຮ່າງຂໍ້ຕົກລົງວ່າດ້ວຍມາດຖານຫົວໜ້າພະແນກການຕ່າງປະເທດແຂວງ, ນະຄອນຫຼວງ. ສອງຮ່າງນິຕິກຳດັ່ງກ່າວ ແມ່ນມີຄວາມສຳຄັນ ເນື່ອງຈາກເປັນນິຕິກຳທີ່ກຳນົດທີ່ຕັ້ງ, ພາລະບົດ ບາດ, ໂຄງປະກອບການຈັດຕັ້ງ, ຂອບເຂດສິດ ແລະ ໜ້າທີ່, ແບບແຜນ ແລະ ວິທີການເຮັດວຽກຂອງພະແນກ ການຕ່າງປະເທດແຂວງ ແລະ ນະຄອນຫຼວງ ລວມທັງການແບ່ງຂັ້ນຄຸ້ມຄອງວຽກງານການຕ່າງປະເທດລະ ຫວ່າງສູນກາງ ແລະ ທ້ອງຖິ່ນ ໃຫ້ຈະແຈ້ງຂຶ້ນຕື່ມ ໂດຍສອດຄ່ອງກັບ, ກົດໝາຍວ່າດ້ວຍລັດຖະບານ ປີ 2016, ກົດໝາຍວ່າດ້ວຍການປົກຄອງທ້ອງຖິ່ນ ປີ 2015, ກົດໝາຍວ່າດ້ວຍລັດຖະກອນ ປີ 2017, ກົດ ໝາຍວ່າດ້ວຍສົນທິສັນຍາ ແລະ ສັນຍາສາກົນ ປີ 2017, ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການຕ່າງປະເທດ ປີ 2017 ລວມທັງນິຕິກຳທີ່ກ່ຽວຂ້ອງອື່ນ.

ກະຊວງການຕ່າງປະເທດຈະສືບຕໍ່ເອົາຮ່າງນິຕິກຳ 02 ສະບັບດັ່ງກ່າວໄປ ລົງໄປທາບທາມຄຳຄິດຄຳເຫັນນຳບັນດາແຂວງພາກກາງ ແລະ ພາກໃຕ້ ເພື່ອສາມາດສັງລວມຄວາມຄິດເຫັນ ແນ່ໃສ່ປັບປຸງຮ່າງນິຕິກຳດັ່ງ ກ່າວໃຫ້ສອດຄ່ອງກັບສະພາບຄວາມເປັນຈິ່ງຂອງປະເທດ.