ສປປ ລາວ ​ແລະ ຮົງ​ກາຣີ ໄດ້​ສ້າງ​ຕັ້ງ​ສາຍພົວພັນ​ທູດ​ນຳ​ກັນ ​ໃນ​ວັນ​ທີ 12 ກັນຍາ 1962 ແລະ ມາ​ເຖິງ​ປີ 2017 ນີ້ ການ​ພົວພັນການທູດ​ດັ່ງກ່າວ ​ໄດ້ໜູນວຽນມາຄົບຮອບ 55 ປີ ພໍດີ.

ຕະ​ຫຼອດ​ເຄິ່ງ​ສັດ​ຕະ​ວັດທີ່ຜ່ານມາ ເຖິງແມ່ນວ່າສະພາບຂອງສາກົນມີການຜັນແປຢູ່ເລື້ອຍໆ ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ຮົງ​ກາ​ຣີ ໄດ້ຮັບການພັດທະນາຂຶ້ນເປັນກ້າວໆ ແລະ ຂະຫຍາຍຕົວຢ່າງຕໍ່ເນື່ອງ ບົນພື້ນຖານແຫ່ງການເຄົາລົບນັບຖືເຊິ່ງກັນ ແລະກັນ ແລະ ຫຼັກການແຫ່ງ ການພົວພັນສາກົນ ແລະ ທັງສອດຄ່ອງກັບຄວາມມຸ້ງມາດປາຖະໜາ ຂອງປະຊາຊົນສອງຊາດ ລາວ-ຮົງ​ກາ​ຣີ.

ເພື່ອ​ເປັນ​ການ​ສະ​ເຫຼີມສະຫລອງ ​ຄົບຮອບ 55 ປີສາຍ​ພົວພັນ​ການ​ທູ​ດລາວ-ຮົງກາຣີ, ໃນຕອນຄ່ຳຂອງວັນທີ 7 ທັນວາ 2017, ທີ່ ໂຮງແຮມ ລາວພລາຊາ, ລັດຖະບານ ຮົງກາຣີ ຕາງໜ້າໂດຍສະຖານເອກອັກຄະລັດຖະທູດ ແຫ່ງ ຮົງກາຣີ ປະຈໍາ ສປປ ລາວ, ທີ່ມີສໍານັກງານຕັ້ງຢູ່ບາງກອກ,ສະມາຄົມ​ມິດຕະພາບ ລາວ-ຮົງກາຣີ ​ແລະ ກົງສູນກິດຕິມະສັກຮົງກາຣີ ປະຈໍາ ສປປ ລາວ ​ໄດ້​ຮ່ວມ​ກັນ​ຈັດ​ງານ​ພິທີສະເຫຼີມສະຫຼອງ ຄົບຮອບ 55 ປີ ສາຍພົວພັນການທູດ ລາວ-ຮົງກາຣີ,ໂດຍ​ການເປັນປະທານຮ່ວມຂອງ ທ່ານ ປີເຕີ ຢາກັບ (Peter Jakab), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ຮົງກາຣີ ປະຈຳ ສປປ ລາວ ແລະ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດລາວ, ຊຶ່ງເປັນກຽດ​ເຂົ້າຮ່ວມຂອງ ທ່ານ ປອ ລຽນ ທິແກ້ວ, ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາການນໍາ ຈາກກະຊວງການເງິນ, ກະຊວງສຶກສາທິການ ແລະ ກິລາ, ກະຊວງປ້ອງກັນຄວາມສະຫງົບ ແລະ ມີບັນດາແຂກທັງພາຍໃນ ແລະ ຕ່າງປະເທດ ລວມທັງອະ​ດີດ​ນັກ​ສຶກສາ​ລາວ ທີ່​ຈົບ​ຈາກ​ຮົງ​ກາຣີຖືກເຊີນເຂົ້າຮ່ວມຢ່າງພ້ອມພຽງ.

ໃນ​ພິທີ​ດັ່ງກ່າວ, ​ທັງ​ສອງ​ຝ່າຍ ລາວ-ຣົງກາຣີ ໄດ້ຜັດປ່ຽນກັນຂຶ້ນມີຄໍາເຫັນ ແລະ ​ຕີ​ລາຄາ​ສູງຕໍ່ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ອັນ​ດີ ລະຫວ່າງ​ ສອງ​ປະ​ເທດ ຕະຫລອດ​ໄລຍະ 55 ປີ​ຜ່ານ​ມາ, ໂດຍສະເພາະຝ່າຍລາວເຮົາ ໄດ້ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈຕໍ່ ລັດຖະບານ ແລະ ປະຊາຊົນ ຮົງ​ກາ​ຣີ ທີ່ໄດ້ໃຫ້ການຮ່ວມມືຊ່ວຍເຫຼືອ​ໃນ​ການສ້າງ​ສາ​ພັດ​ທະ​ນາ​ ສປປ ລາວ, ເປັນ​ຕົ້ນ​ແມ່ນການສະໜັບສະໜູນໃນດ້ານເງິນກູ້ດອກເບ້ຍຕໍ່າ ອັນເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢ່າງຕໍ່ເນື່ອງ, ລວມທັງໄດ້ສືບຕໍ່ຊ່ວຍສ້າງຊັບພະຍາກອນມະນຸດ ເປັນຈໍານວນຫລາຍສົມຄວນໃຫ້ ແກ່ ສປປ ລາວ ຕະຫລອດມາ. ນອກນີ້ ສອງຝ່າຍ ​ໄດ້​ຢືນຢັນ​ທີ່​ຈະ​ສືບ​ຕໍ່​ເພິ່ມທະວີຮັດແໜ້ນການພົວພັນຮ່ວມມືສອງຝ່າຍຂຶ້ນສູ່ລະດັບໃໝ່ ທັງຈະສືບຕໍ່ໃຫ້ການ​ສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນການພັດທະນາປະເທດ ຂອງກັນ ແລະ ກັນ ໂດຍເພີ່ມທະວີການຮ່ວມມືທັງໃນຂອບສອງຝ່າຍ ແລະ ຫລາຍຝ່າຍ.

ງານພິທີ​ສະ​ເຫລີ​ມສະຫລອງ​ຄັ້ງ​ນີ້ ​ໄດ້​ດຳ​ເນີນ​ໄປ​ພາຍ​ໃຕ້​ບັນຍາກາດ​ອົບ​ອຸ່ນ ທັງມີ​ຄວາມ​ໝາຍ​ສໍາຄັນ ​ແລະ ໄດ້​ຮັບ​ຜົນ​ສຳ​​ເລັດ​ເປັນ​ຢ່າງ​ດີ.