ໃນວັນທີ 26 ພຶດສະພາ 2017, ທີ່ ກະຊວງການຕ່າງປະເທດ ໄດ້ມີພິທີເຊັນເອກະສານແລກປ່ຽນ “ໂຄງການອອກແບບ ເພື່ອປັບປຸງສະພາບແວດລ້ອມໂຮງຮຽນມັດທະຍົມຕອນຕົ້ນຢູ່ ພາກກາງ ແລະ ພາກໃຕ້” ມູນຄ່າ 46 ລ້ານເຢັນ ພາຍໃຕ້ການຊ່ວຍເຫຼືອເພື່ອການພັດທະນາ (ODA) ຈາກລັດຖະບານຍີ່ປຸ່ນ, ຊຶ່ງຕາງໜ້າ ລັດຖະບານ ແຫ່ງ ສປປ ລາວ ຮ່ວມລົງນາມໂດຍ ທ່ານແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າ ລັດຖະບານ ຍີ່ປຸ່ນ ໂດຍ ທ່ານ ຕາເກຊິ ຮິກິຮາຣະ, ເອກອັກຄະຣາຊະທູດ ຍີ່ປຸ່ນ ປະຈຳ ສປປ ລາວ, ໂດຍການເຂົ້າຮ່ວມເປັນສັກຂີພິຍານຂອງບັນດາພະນັກງານຈາກຂະແໜງການທີ່ກ່ຽວຂ້ອງຂອງທັງສອງຝ່າຍ ລາວ ແລະ ຍີ່ປຸ່ນ.
ການອະນຸມັດໂຄງການຊ່ວຍເຫຼືອໃນຄັ້ງນີ້ ມີຈຸດປະສົງ ເພື່ອພັດທະນາສະພາບແວດລ້ອມການສຶກສາຂອງໂຮງຮຽນມັດທະຍົມຕອນຕົ້ນຢູ່ພາກກາງ ແລະ ພາກໃຕ້ ໂດຍຜ່ານຫຼາກຫຼາຍວິທີການເຊັ່ນ: ການສ້າງອາຄານຮຽນ ໃໝ່, ຫໍພັກນັກຮຽນ ແລະ ຫ້ອງນ້ຳ ເພື່ອອຳນວຍຄວາມສະດວກໃຫ້ແກ່ການສົ່ງເສີມການສຶກສາ ກໍຄືການພັດທະນາຊັບພະຍາກອນມະນຸດ ຢູ່ເຂດຊົນນະບົດໃຫ້ດີຂຶ້ນ. ໃນແຜນພັດທະນາເສດຖະກິດ-ສັງຄົມແຫ່ງຊາດ, ລັດຖະບານລາວ ໄດ້ວາງກຳນົດເອົາການສຶກສາເປັນໜຶ່ງໃນຂະແໜງການທີ່ສຳຄັນທີ່ສຸດ ເພາະວ່າການເປີດກວ້າງ ແລະ ການພັດທະນາການສຶກສາຂັ້ນພື້ນຖານນັ້ນ ຖືວ່າເປັນປັດໃຈທຳອິດ ສຳລັບການພັດທະນາຊັບພະຍາກອນມະນຸດ ທີ່ແນ່ໃສ່ການຂະຫຍາຍເສດຖະກິດຢ່າງຕໍ່ເນື່ອງ, ການລົບລ້າງຄວາມທຸກຍາກເຊິ່ງເປັນຂະແໜງບູລິມະສິດຂອງນະໂຍບາຍແຫ່ງຊາດ ແລະ ແຜນພັດທະນາຂະແໜງການສຶກສາ ຄັ້ງທີ 8 ( 2016-2020 ) ມີເປົ້າໝາຍທີ່ຈະເພີ່ມຈໍານວນອັດຕາການລົງທະບຽນຂອງການສຶກສາ ຂັ້ນມັດທະຍົມຕອນຕົ້ນໃຫ້ໄດ້ 85% ພາຍໃນປີ 2020, ທັງເປັນການສ້າງເງື່ອນໄຂໃຫ້ແກ່ການຈັດຕັ້ງປະຕິບັດເປົ້າໝາຍສະຫັດສະວັດ ເພື່ອການພັດທະນາ ແລະ ເພື່ອເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020.
ໃນໂອກາດນີ້, ທ່ານ ແສງເພັດ ຮຸ່ງບຸນຍວງ ໄດ້ກ່າວສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອ ສປປ ລາວ ມາໂດຍຕະຫຼອດ, ຊຶ່ງເປັນການປະກອບ ສ່ວນອັນສຳຄັນເຂົ້າໃນການພັດທະນາພື້ນຖານໂຄງລ່າງຂອງລາວ ໂດຍສະເພາະໃນຂະແໜງການສຶກສາ ແລະ ລັດຖະບານລາວ ຍິນດີໃຫ້ການຮ່ວມມືເປັນຢ່າງດີ ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວ ມີປະສິດທິຜົນ ແລະ ສຳເລັດຢ່າງຈົບງາມ ແລະ ຫວັງວ່າ ພາຍຫຼັງໂຄງການອອກແບບນີ້ສຳເລັດແລ້ວ ລັດຖະບານຍີ່ປຸ່ນຈະສືບຕໍ່ໃຫ້ການຊ່ວຍເຫຼືອ ໂຄງການປຸກສ້າງໂຮງຮຽນດັ່ງກ່າວ.