ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ, ໄດ້ນໍາພາຄະນະຜູ້ແທນລາວ ເຂົ້າຮ່ວມເວທີປຶກສາຫາລື ອາຊຽນ-ສະຫະລັດ ອາເມລິກາ ຄັ້ງທີ 30, ຊຶ່ງໄດ້ຈັດຂຶ້ນໃນວັນທີ 02-03 ພຶດສະພາ 2017, ທີ່ ວໍຊິງຕັນ ດີຊີ, ສະຫະລັດ ອາເມລິກາ, ພາຍໃຕ້ການເປັນປະທານຮ່ວມຂອງ ມາເລເຊຍ ແລະ ສະຫະລັດ ອາເມລິກາ.
ກອງປະຊຸມ ໄດ້ທົບທວນຄືນຄວາມຄືບໜ້າຂອງການຮ່ວມມື ອາຊຽນ-ສະຫະລັດ ອາເມລິກາ ໃນໄລຍະຫນຶ່ງປີທີ່ຜ່ານມາ ແລະ ໄດ້ປຶກສາຫາລືການກະກຽມໃຫ້ແກ່ ກອງປະຊຸມລັດຖະມົນຕີຕ່າງປະເທດ ອາຊຽນ-ສະຫະລັດ ອາເມລິກາ ສະໄໝພິເສດ, ຊຶ່ງຈະຈັດຂຶ້ນໃນວັນທີ 04 ພຶດສະພາ 2017, ທີ່ ວໍຊິງຕັນ ດີຊີ, ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ສະຫະລັດ ອາເມລິກາ, ທີ່ຈະຈັດຂຶ້ນໃນເດືອນສິງຫາ 2017, ທີ່ ປະເທດຟີລິບປິນ. ກອງປະຊຸມຍັງໄດ້ແລກປ່ຽນຄໍາຄິດເຫັນ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.