ໃນວັນທີ 3 ພຶດສະພາ 2017, ທີ່ ກະຊວງການຕ່າງປະເທດ, ທ່ານ ນາງ ຄຳເພົາ ເອີນທະວັນ ແລະ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງບັນດາທ່ານເອກອັກຄະລັດຖະທູດ ຄົນໃໝ່ ປະຈຳ ສປປ ລາວ ຄື: ທ່ານ Mohd Aini Atan, ເອກອັກຄະລັດຖະທູດ ແຫ່ງ ມາເລເຊຍ, ທ່ານ U. Ko Ko Naing, ເອກອັກຄະລັດຖະທູດ ແຫ່ງ ສສ. ມຽນມາ, ທ່ານ Cheng Manith, ເອກອັກຄະຣາຊະທູດ ແຫ່ງ ຣາຊະອານາຈັກ ກຳປູເຈຍ, ທ່ານ ມາເຣັກ ລິບຣິກກີ, ເອກອັກຄະລັດຖະທູດ ແຫ່ງ ສາທາລະນະລັດ ເຊັກ; ທ່ານ ຟຼານຊິສ໌ໂກ ວາສ໌ ປາດໂຕ, ເອກອັກຄະລັດຖະທູດ ແຫ່ງ ສາທາລະນະລັດ ປອກຕຸຍການ; ທ່ານ ເກຣໂຊ ກລາວັກ, ເອກອັກຄະລັດຖະທູດ ແຫ່ງ ໂຄຣເອເຊຍ; ທ່ານ Dosso Adama, ເອກອັກຄະລັດຖະທູດ ແຫ່ງ ກົດດີວົວ, ທ່ານ ນາງ ເອບເຣັນ ດັດເດເລັນ ອາກກູນ, ເອກອັກຄະລັດຖະທູດ ແຫ່ງ ສາທາລະນະລັດ ຕວັກກີ ແລະ ທ່ານ ອັງດຼີ ເບຊີຕາ, ເອກອັກຄະລັດຖະທູດ ແຫ່ງ ອູແກຣນ.

ໃນໂອກາດດັ່ງກ່າວ, ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ບັນດາທ່ານທູດ ທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ປະຈຳ ສປປ ລາວ ແລະ ທັງສອງຝ່າຍ ກໍ່ໄດ້ຕີລາຄາສູງຕໍ່ສາຍພົວພັນມິດຕະພາບທີ່ມີມາຍາວນານ ພ້ອມທັງປຶກສາຫາລືແລກປ່ຽນຄວາມຄິດຄວາມເຫັນໃນການຮັດແໜ້ນສາຍພົວພັນການຮ່ວມມືສອງຝ່າຍ ເປັນຕົ້ນ ແມ່ນດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ ແລະ ຂະແໜງການອື່ນໆ ທີ່ສອງຝ່າຍມີຄວາມສົນໃຈຮ່ວມກັນ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

ພ້ອມດຽວກັນນີ້, ທ່ານຮອງລັດຖະມົນຕີກະຊວງການຕ່າງປະເທດ ກໍ່ໄດ້ອວຍພອນໄຊ ໃຫ້ແກ່ບັນດາທ່ານເອກອັກຄະລັດຖະທູດ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ວຽກງານການທູດອັນມີກຽດ.

ທ່ານທູດ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ຈະເຮັດທຸກຄວາມສາມາດຂອງຕົນ ເຂົ້າໃນການເຄື່ອນໄຫວປະກອບສ່ວນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ໃຫ້ແໜ້ນແຟ້ນ ແລະ ມີປະສິດທິພົນສູງຂຶ້ນ.