ໃນວັນທີ 27 ເມສາ 2017 ທີ່ ນະຄອນຫຼວງ ມະນີລາ, ຟີລິບປິນ, ທ່ານທອງຜ່ານສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງສປປລາວ ​ໄດ້​ນຳພາຄະນະຜູ້ແທນລາວເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ.

ກອງປະຊຸມເຈົ້າໜ້າທີອາວຸໂສອາຊຽນຄັ້ງນີ້ ພາຍໃຕ້ການເປັນປະທານຂອງຟີລິບປິນ ໄດ້ປຶກສາຫາລື ກ່ຽວກັບ ການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດ, ກອງປະຊຸມສະພາປະຊາຄົມການເມືອງ-ຄວາມໝັ້້ນຄົງອາຊຽນ ຄັ້ງທີ 15 ແລະ ກອງປະຊຸມສະພາປະສານງານອາຊຽນ ຄັ້ງທີ 19 ຊຶ່ງຈະຈັດຂຶ້ນໃນວັນທີ 28 ເມສາ 2017. ອັນສໍາຄັນ, ບັນດາເຈົ້າໜ້າທີອາວຸໂສອາຊຽນ ໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 30 ຊຶ່ງຈະຈັດຂຶ້ນໃນວັນທີ 29 ເມສາ 2017 ໂດຍສະເພາະແມ່ນ ແຜນການເຄື່ອນໄຫວ, ຫົວຂໍ້ການປຶກສາຫາລື ແລະ ເອກະສານຜົນຂອງກອງປະຊຸມສຸດຍອດ ຄັ້ງນີ້.ພ້ອມດຽວກັນນີ້, ກອງປະຊຸມກໍໄດ້ປຶກສາຫາລືກ່ຽວກັບການສ້າງປະຊາຄົມ ອາຊຽນ ເປັນຕົ້ນແມ່ນ ການຈັດຕັ້ງປະຕິບັດແຜນແມ່ບົດປະຊາຄົມການເມືອງ-ຄວາມໝັ້ນຄົງອາຊຽນ 2025, ການຮ່ວມມືກັບພາຍນອກ ແລະ ວຽກອື່ນໆ.