ໃນລະຫວ່າງວັນທີ 27-29 ມີນາ 2017 ທີ່ຜ່ານມາ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ພ້ອມດ້ວຍຄະນະ ຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ ໄດ້ເດີນທາງໄປຢ້ຽມຢາມການປະຕິບັດງານຮ່ວມ ລາວ-ອາເມລິກາ ໃນການສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ (MIA) ຄັ້ງທີ 3 ປະຈໍາສົກປີ 2016-2017, ຢູ່ຈຸດສຸມລ້ອງມ້າ, ເມືອງບົວລະພາ, ແຂວງຄຳມ່ວນ. ການເດີນທາງໄປຢ້ຽມຢາມ ຂອງຄະນະດັ່ງກ່າວໃນຄັ້ງນີ້ ແມ່ນເພື່ອເປັນການຕິດຕາມ ແລະ ກວດກາການປະຕິບັດງານຂອງຄະນະວິຊາການຮ່ວມ ລາວ-ອາເມລິກາ ໃນການປະຕິບັດວຽກງານມະນຸດສະທຳ ແລະ ທັງເປັນການສະແດງເຖິງ ຄວາມເອົາໃຈໃສ່ ໃຫ້ການຮ່ວມມືຂອງລັດຖະບານ ແຫ່ງ ສປປ ລາວ ເພື່ອແກ້ໄຂບັນຫາ ຜູ້ຫາຍສາບສູນ ໃນປາງສົງຄາມຢູ່ລາວ.
ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດ ກໍ່ໄດ້ພົບປະ ແລະ ໂອ້ລົມກັບບັນດາພະນັກງານວິຊາການ ປະຈໍາພາກສະໜາມຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ອໍານາດການປົກຄອງທ້ອງ ຖິ່ນທີ່ຄ້າຍພັກບ້ານລະໂບຍໃໝ່, ເມືອງບົວລະພາ, ແຂວງຄຳມ່ວນ. ນອກຈາກນັ້ນ, ຄະນະ ຍັງໄດ້ເຄື່ອນໄຫວຢ້ຽມຢາມ ການປະຕິບັດງານຕົວຈິງຢູ່ຈຸດຂຸດຄົ້ນຕ່າງໆ, ໂດຍໄດ້ຮັບຟັງການລາຍງານ ສະພາບການປະຕິບັດວຽກງານຢູ່ແຕ່ລະຈຸດຂຸດຄົ້ນ ຈາກຫົວໜ້າພາກສະໜາມຝ່າຍລາວ ແລະ ຝ່າຍອາເມລິກາ, ຊຶ່ງເຫັນວ່າ ການຮ່ວມມືມີປະສິດທິຜົນອັນດີ, ຍ້ອນພະນັກງານວິຊາການທັງສູນກາງ ແລະ ທ້ອງຖິ່ນ ພ້ອມດ້ວຍພໍ່ແມ່ປະຊາຊົນທ້ອງຖິ່ນໄດ້ປະກອບສ່ວນຢ່າງຕັ້ງໜ້າ ແລະ ມີຄວາມເອົາໃຈໃສ່ຕໍ່ການປະຕິບັດໜ້າທີ່ ວຽກງານຂອງຕົນ ເປັນຢ່າງດີ.
ຕະລອດໄລຍະເວລາ 30 ປີທີ່ຜ່ານມາ, ການຮ່ວມມືສອງຝ່າຍ ລາວ-ອາເມລິກາ ໃນວຽກງານມະນຸດສະທຳ ໄດ້ພົບຄວາມຫຍຸ້ງຍາກຫຼາຍປະການ ເນື່ອງຈາກວ່າ ສະພາບແວດລ້ອມພູມີປະເທດທີ່ສູງຊັນ, ໄລຍະເວລາໃນການ ເຮັດວຽກ ຂຶ້ນກັບສະພາບດິນຟ້າອາກາດ, ຈຸດຂຸດຄົ້ນສ່ວນຫຼາຍບໍ່ມີທາງລົດເຂົ້າໄປເຖິງ ຈໍາເປັນຕ້ອງໄດ້ນໍາໃຊ້ຍົນ ໃນການຂົ່ນສົ່ງທີມງານ ແລະ ອຸປະກອນເຂົ້າໄປຈຸດຂຸດຄົ້ນ. ມາເຖິງປະຈຸບັນ ການຂຸດຄົ້ນໄດ້ສຳເລັດແລ້ວ ຈຳນວນ 272 ກໍລະນີ ຈາກຈໍານວນຜູ້ຫາຍສາບສູນທັງໝົດຢູ່ລາວ ໃນຈຳນວນ 573 ກໍລະນີ ແລະ ຍັງເຫຼືອຈະສືບຕໍ່ຄົ້ນຫາອີກ 301 ກໍລະນີ.
ສັງລວມແລ້ວ, ລັດຖະບານກໍ່ຄືປະຊາຊົນລາວໄດ້ໃຫ້ການຮ່ວມມືຕະຫຼອດມາ ແລະ ຈະສືບຕໍ່ໃຫ້ການຮ່ວມມື ໃນວຽກງານດັ່ງກ່າວຕາມຄວາມອາດສາມາດຕົວຈິງ ເພື່ອນໍາເອົາສິ່ງເສດເຫຼືອຂອງທະຫານອາເມລິກາທີ່ຫາຍສາບສູນ ທັງໝົດ ສົ່ງຄືນໃຫ້ຄອບຄົວຂອງພວກກ່ຽວ. ການຮ່ວມມືໃນດ້ານນີ້ໄດ້ຮັບຜົນສຳເລັດເປັນຢ່າງດີ ກໍ່ຍ້ອນການຮ່ວມມື ຂອງລັດຖະບານລາວ, ເຈົ້າໜ້າທີ່ຂອງລາວທຸກໆຂັ້ນແຕ່ສູນກາງລົງຮອດທ້ອງຖິ່ນ ແລະ ການຮ່ວມມືອັນດີຂອງປະຊາຊົນ ບັນດາເຜົ່າ. ສິ່ງເຫຼົ່ານີ້ ໄດ້ສະແດງໃຫ້ເຫັນເຖິງນະໂຍບາຍມະນຸດສະທຳ ອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ປະຊາຊົນອາເມລິກາ, ໂດຍສະເພາະ ຕໍ່ຄອບຄົວຍາດພີ່ນ້ອງ ຂອງຜູ້ທີ່ຫາຍສາບສູນໃນປາງສົງຄາມຢູ່ລາວ.