ໃນວັນທີ 24 ມີນາ 2017, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລື ແລະ ຜັນຂະຫຍາຍຜົນຂອງກອງປະຊຸມສຸດຍອດຂອບການຮ່ວມມືພາກພື້ນ​ (CLV, CLMV ແລະ ACMECS), ທີ່ ແຂວງຈຳປາສັກ, ໂດຍການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໂດຍມີຜູ້ເຂົ້າຮ່ວມຈາກສູນກາງ ແລະ ຈາກ​ແຂວງຈໍາປາ​ສັກ, ​​ແຂວງ​ສາລະ​ວັນ, ແຂວງ​ເຊ​ກອງ ​ແລະ ແຂວງ​ອັດ​ຕະປື ຫຼາຍກວ່າ 50 ທ່ານ.

ກອງປະຊຸມໄດ້ປຶກສາຫາ ແລະ ຜັນຂະຫຍາຍ ຜົນກອງປະຊຸມ ກອງ​ປະຊຸມ​ສຸດ​ຍອດ​ເຂດ​ສາມຫລ່ຽມ​ພັດທະນາ ກຳປູເຈຍ-ລາວ-ຫວຽດນາມ (CLV) ຄັ້ງທີ 9, ກອງປະຊຸມສຸດຍອດ ກໍາປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 8 ແລະ ກອງປະຊຸມສຸດຍອດ ຂອບ​ການ​ຮ່ວມ​ມືຍຸດທະສາດການຮ່ວມມືດ້ານເສດຖະກິດ ແມ່ນ້ຳອີຣະວະດີ-ແມ່ເຈົ້າພະຍາ-ແມ່ນໍ້າຂອງ (ACMECS) ຄັ້ງທີ 7. ນອກນີ້, ກອງປະຊຸມ ຍັງໄດ້ຕີລາຄາສູງ ໃນການຈັດຕັ້ງປະຕິບັດຂອງ 4 ແຂວງພາກໃຕ້ ໃນການຈັດຕັ້ງປະຕິບັດວຽກງານໃນ 3 ຂອບການຮ່ວມມືດັ່ງກ່າວ, ເຊິ່ງຜ່ານມາກໍ່​ມີຫລາຍ​ໂຄງການ​ໄດ້​ຮັບ​ການຈັດ​ຕັ້ງ​ປະຕິບັດ​ເປັນ​ກ້າວໆ ເປັນຕົ້ນ: ​ໂຄງການ​ປັບປຸງ ​ແລະ ຍົກ​ລະດັບເສັ້ນທາງ​ເຊື່ອມ​ຈອດ ລະຫວ່າງ ​ບັນດາ​ບ້ານ, ເມືອງ ​ແລະ ​ແຂວງ, ການ​ກໍ່ສ້າງ​ໂຮງຮຽນ, ​ໂຮງໝໍ, ສຸກສາລາ ​ແລະ ສິ່ງ​ອຳນວຍ​ຄວາມ​ສະດວກ​ອື່ນ​ໆ, ອັນໄດ້ປະກອບສ່ວນສຳຄັນເຂົ້າໃນ​ການ​ສົ່ງ​ເສີມ​ການ​ຄ້າ, ການ​ລົງທຶນ, ການທ່ອງທ່ຽວ ​ແລະ ສົ່ງ​ເສີມ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ຂົງ​ເຂດດັ່ງກ່າວ​ໃຫ້​ດີ​ຂຶ້ນເທື່ອລະກ້າວ. ພ້ອມ​ດຽວ​ກັນ​ນີ້, ກອງ​ປະຊຸມ​ ຍັງ​ໄດ້​ປຶກສາ​ຫາລືແລກປ່ຽນຄຳຄິດຄຳເຫັນ ກ່ຽວກັບ ການແກ້ໄຂບັນດາຂໍ້ຫຍຸ້ງຍາກ ແລະ ທິດທາງໃນຕໍ່ໜ້າ. ອັນພົ້ນເດັ່ນ ແມ່ນໂຄງການບູລິ​ມະ​ສິດ​ 5 ໂຄງການ​ທີ່ໄດ້ຖືກຮັບຮອງເອົາ ໃນ​ກອງ​ປະຊຸມ​ສຸດ​ຍອດ CLV ຄັ້ງຫຼ້າສຸດ.

ກອງປະຊຸມໃນຄັ້ງນີ້, ອັດລົງດ້ວຍຜົນສຳເລັດອັນຈົບງາມ ໂດຍບັນລຸໄດ້ຕາມຈຸດປະສົງ ແລະ ເປົ້າໝາຍທີ່ກຳນົດໄວ້ ແລະ ຖື​ໄດ້​ວ່າ ເປັນກອງປະຊຸມທີ່ມີຄວາມໝາຍ, ຄວາມສຳຄັນສູງ ເພາະ​ເປັນ​ເວທີສໍາຄັນອັນໜຶ່ງທີ່ເປີດໂອກາດ​ໃຫ້​ບັນດາ​ຂະແໜງການທີ່ກ່ຽວຂ້ອງ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນນໍາກັນຕໍ່ກັບບັນຫາ ແລະ ສິ່ງທີ່ທ້າທາຍຕ່າງໆ ໂດຍສະເພາະການແກ້ໄຂຂໍ້ຄົງຄ້າງ ແລະ ທິດທາງການຈັດຕັ້ງປະຕິບັດໃນຕໍ່ໜ້າ ຂອງສາມຂອບການຮ່ວມມືດັ່ງກ່າວ ໃຫ້ປະກົດຜົນເປັນຈິງ​.