ໃນຕອນເຊົ້າຂອງວັນທີ 19 ກັນຍາ 2019, ຢູ່ທີ່ກະຊວງການຕ່າງປະເທດ ໄດ້ມີພິທີປະດັບຫລຽນກາມິດຕະພາບ ໃຫ້ທ່ານ ມີຄາອິນ ບາຣານນົບ, ເອກອັກຄະລັດຖະທູດວີສາມັນຜູ້ມີອໍານາດເຕັມ ແຫ່ງ ສະຫະພັນ ຣັດເຊຍ ປະຈໍາ ສປປ ລາວ ໃນໂອກາດ ທ່ານສໍາເລັດການປະຕິບັດໜ້າທີ່ການທູດ ຢູ່ ສປປ ລາວ. ຕະຫລອດໄລຍະເວລາ 5 ປີຜ່ານມາ, ທ່ານເອກອັກຄະລັດຖະທູດ ຣັດເຊຍ ໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍການພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສະຫະພັນ ຣັດເຊຍ ດ້ວຍການເອົາໃຈໃສ່ໃນການປະສານງານ, ຊຸກຍູ້ການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ໃນລະດັບຕ່າງໆ ນັບແຕ່ລະດັບການນໍາຂອງພັກ ແລະ ລັດ ຈົນເຖິງອົງການຈັດຕັ້ງມະຫາຊົນ,ຊຸກຍູ້ການນໍາ ຣັດເຊຍ ອະນຸມັດເຄື່ອງຊ່ວຍເຫລືອບັນເທົາທຸກ ໃຫ້ແກ່ປະຊາຊົນລາວ ທີ່ໄດ້ຮັບຜົນກະທົບຈາກເຫດການໄພນໍ້າຖ້ວມ ຢູ່ ແຂວງອັດຕະປື ໃນປີ 2018, ຊຶ່ງມີມູນຄ່າທັງໝົດ 330.000 ໂດລາສະຫະລັດ. ນອກຈາກນີ້, ພາຍໃຕ້ການນໍາພາຂອງທ່ານເອກອັກຄະລັດຖະທູດ, ສະຖານທູດ ຣັດເຊຍ ປະຈໍາ ສປປ ລາວ ໄດ້ຕັ້ງໜ້າປະກອບສ່ວນເຂົ້າຮ່ວມບັນດາກິດຈະກໍາຕ່າງໆຂອງສອງປະເທດ ທີ່ຈັດຂຶ້ນໃນແຕ່ລະປີ ອັນໄດ້ເຮັດໃຫ້ການພົວພັນຮ່ວມມືສອງຝ່າຍມີບາດກ້າວຂະຫຍາຍຕົວຫລາຍຂຶ້ນກວ່າເກົ່າ ເຊັ່ນ: ຂະແໜງການສຶກສາ, ການລົງທຶນ, ການທະຫານ, ການທ່ອງທ່ຽວ ແລະ ຂະແໜງການອື່ນໆ.