ໂດຍຕອບສະໜອງຕາມການເຊື້ອເຊີນ ຂອງສະຫາຍ ມີເກັນ ດີເອັດສ-ກາແນນ ເບີມູເດັດສ (Miguel Diaz-Canel Bermudez), ເລຂາທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະນະລັດ ກູບາ, ໃນຕອນບ່າຍ ວັນທີ 11 ກັນຍາ 2023 ນີ້, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະ ໄດ້ເດີນທາງໄປເຄື່ອນໄຫວເຮັດວຽກ ຢູ່ ສາທາລະນະລັດ ກູບາ ໃນລະຫວ່າງວັນທີ 12-16 ກັນຍາ 2023.

ການເຄື່ອນໄຫວເຮັດວຽກ ຢູ່ ສາທາລະນະລັດ ກູບາ ຄັ້ງນີ້, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຈະໄດ້ຢ້ຽມຢາມລັດຖະກິດ ສາທາລະນະລັດ ກູບາ ໃນລະຫວ່າງວັນທີ 13-14 ກັນຍາ 2023 ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ພ້ອມດຽວກັນນັ້ນ, ຍັງຈະໄດ້ເຂົ້າຮ່ວມກອງປະຊຸມສຸດຍອດຂອງກຸ່ມປະເທດ 77 ແລະ ຈີນ ເພື່ອຊຸກຍູ້ສົ່ງເສີມການຮ່ວມມືດ້ານວຽກງານການພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກໍາ  ລະຫວ່າງ ປະເທດກໍາລັງພັດທະນາດ້ວຍກັນ ໃນລະຫວ່າງວັນທີ 15-16 ກັນຍາ 2023, ເຊິ່ງມີ 100 ກວ່າປະເທດ ເຂົ້າຮ່ວມ.

ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ກູບາ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 4 ພະຈິກ 1974. ຕະຫຼອດໄລຍະ 49 ປີຜ່ານມາ ການພົວພັນລະຫວ່າງສອງປະເທດ ໄດ້ຮັບການເສີມຂະຫຍາຍເຂົ້າສູ່ລວງເລິກຢ່າງຕໍ່ເນື່ອງ ໂດຍມີການແລກປ່ຽນການຢ້ຽມຢາມຄະນະຜູ້ແທນຂັ້ນສູງສຸດ ລົງຮອດວິຊາການນໍາກັນຢ່າງເປັນປະຈໍາ, ມີການຮ່ວມມືກັນໃນດ້ານຕ່າງໆ ເປັນຕົ້ນ ດ້ານການສຶກສາ ແລະ ກິລາ, ສາທາລະນະສຸກ, ກະສິກໍາ ແລະ ອື່ນໆ. ຄະນະຜູ້ແທນຂັ້ນສູງຂອງ ສາທາລະນະລັດ ກູບາ, ທ່ານ ມີແກນ ດີເອັດສ-ກາແນນ ເບີມູເດັດສ, ເລຂາທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະນະລັດ ກູບາ ໃນປັດຈຸບັນ ໄດ້ຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ໃນເດືອນ ພະຈິກ 2018 ແລະ ທ່ານ ມານູເອັນ ມາເຣໂຣ ກຣູຊ໌ (Manuel Marrero Cruz),ນາຍົກລັດຖະມົນຕີ ແຫ່ງ ສ.ກູບາ ກໍ່ໄດ້ເດີນທາງມາຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ໃນເດືອນ ຕຸລາ 2022.

ກຸ່ມປະເທດ 77 ແລະ ຈີນ ແມ່ນກຸ່ມປະເທດກໍາລັງພັດທະນາທີ່ເປັນສະມາຊິກ ອົງການສະຫະປະຊາຊາດ ຊຶ່ງມີສະມາຊິກ 134 ປະເທດ ລວມທັງ ສາທາລະນະລັດ ປະຊາທິປະໄຕ ປະຊາຊົນລາວ ໂດຍມີຈຸດປະສົງເປົ້າຫມາຍ  ເພື່ອຊຸກຍູ້ສົ່ງເສີມການຮ່ວມມືດ້ານເສດຖະກິດ,ວິທະຍາສາດ, ເຕັກໂນໂລຊີ ທີ່ເປັນຜົນປະໂຫຍດຮ່ວມກັນ ແລະ ເປັນກໍາລັງແຮງ ເພື່ອເຈລະຈາທາງດ້ານຜົນປະໂຫຍດຂອງປະເທດກໍາລັງພັດທະນາ ກັບກຸ່ມອື່ນໆ ໃນເວທີອົງການສະຫະປະຊາຊາດ, ຖືກສ້າງຕັ້ງຂຶ້ນໃນປີ 1964.