ໃນໂອກາດເຂົ້າຮ່ວມ ກອງປະຊຸມສຸດຍອດອາຊຽນ ຄັ້ງທີ 43, ໃນວັນທີ 7 ກັນຍາ 2023, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ພົບປະສອງຝ່າຍກັບ ຜູ້ນຳປະເທດເພື່ອນມິດ ເພື່ອທົບທວນຄືນການພົວພັນຮ່ວມມືໃນໄລຍະຜ່ານມາ ແລະ ປຶກສາຫາລືກ່ຽວກັບແຜນການຮ່ວມມືກັນໃນຕໍ່ຫນ້າ ກັບ ພະນະທ່ານ ຢຸນ ຊອກ ຢອນ (Yoon Suk Yeol), ປະທານາທິບໍດີ ແຫ່ງ ສາທາລະນະລັດ ເກົາຫຼີ, ເຊິ່ງເປັນການພົບປະຄັ້ງທຳອິດ ພາຍຫຼັງທີ່ລັດຖະບານ ສ.ເກົາຫຼີ ໄດ້ສຳເລັດການແຕ່ງຕັ້ງຄະນະລັດຖະບານຊຸດໃຫມ່ ໃນເດືອນພຶດສະພາ ຜ່ານມາ, ຊຶ່ງຝ່າຍລາວ ສະແດງຄວາມພ້ອມທີ່ຈະໄດ້ຮ່ວມເຮັດວຽກກັບ ລັດຖະບານ ສ.ເກົາຫຼີ ຊຸດໃຫມ່ ເພື່ອສືບຕໍ່ເສີມຂະຫຍາຍການພົວພັນຮ່ວມມື ລາວ-ສ.ເກົາຫຼີ ໃຫ້ມີບາດກ້າວອັນໃຫມ່ໃນອະນາຄົດ.

ໃນໂອກາດນີ້, ທັງສອງຝ່າຍ ໄດ້ຕີລາຄາສູງຕໍ່ການພົວພັນມິດຕະພາບທີ່ດີ ແລະ ການຮ່ວມມືທີ່ເຕັມໄປດ້ວຍໝາກຜົນ ຕະຫຼອດໄລຍະ 28 ປີ ຜ່ານມາ, ເຊິ່ງ ຝ່າຍ ສ. ເກົາຫຼີ ຍິນດີທີ່ຈະສືບຕໍ່ໃຫ້ການຊ່ວຍເຫຼືອທາງດ້ານການເພື່ອການພັດທະນາ (ODA) ແລະ ການສະໜອງເງິນກູ້ຜ່ານກອງທຶນຮ່ວມມືພັດທະນາເສດຖະກິດ (EDCF) ຂອງ ສ.ເກົາຫຼີ ໃຫ້ແກ່ ສປປ ລາວ, ໂດຍສະເພາະ ການພັດທະນາໂຄງລ່າງພື້ນຖານ, ສາທາລະນະສຸກ, ວຽກງານສຶກສາ, ກະສິກຳ ແລະ ອື່ນໆ ເພື່ອແນ່ໃສ່ປັບປຸງຊີວິດການເປັນຢູ່ຂອງປະຊາຊົນລາວ ໃຫ້ນັບມື້ນັບດີຂຶ້ນ ລວມທັງການພິຈາລະນາຂໍສະເໜີຂອງຝ່າຍລາວ ສໍາລັບໂຄງການຫັນເປັນດີຈີຕອນ ຂອງ ລັດຖະບານ ສປປ ລາວ. ພ້ອມກັນນີ້, ທັງສອງຝ່າຍ ເຫັນດີສືບຕໍ່ຊຸກຍູ້ສົ່ງເສີມການຮ່ວມມືດ້ານການຄ້າ ແລະ ການລົງທຶນ ລາວ-ສ.ເກົາຫຼີ ເປັນຕົ້ນ ການລົງທຶນໃນຂະແໜງກໍ່ສ້າງພື້ນຖານໂຄງລ່າງ, ການແລກປ່ຽນດ້ານແຮງງານ, ການທ່ອງທ່ຽວ, ການພັດທະນາຊັບພະຍາກອນມະນຸດ, ສາທາລະນະສຸກ, ການແລກປ່ຽນທາງດ້ານວັດທະນະທຳ ແລະ ອື່ນໆ, ເຊິ່ງຝ່າຍ ເກົາຫຼີ ເຫັນດີທີ່ຈະສືບຕໍ່ ແລະ ເພີ່ມໂຕເລກນໍາເຂົ້າແຮງງານລາວ ເພື່ອໄປເຮັດວຽກຢູ່ ສ.​ເກົາຫລີ ໃຫ້ນັບມື້ນັບຫຼາຍຂຶ້ນ.

ສອງຝ່າຍ ເຫັນດີໃຫ້ການຮ່ວມມື ແລະ ສະຫນັບສະຫນູນເຊິ່ງກັນ ແລະ ກັນ ໃນຂອບການຮ່ວມມືຫລາຍຝ່າຍ ເປັນຕົ້ນ ການຮ່ວມມືໃນຂອບ ອາຊຽນ-ສ.​ເກົາຫລີ,​ ແມ່ນ້ຳຂອງ-​ສ.​ເກົາຫລີ, ອົງການ ສປຊ ແລະ ອື່ນໆ.​ ຝ່າຍລາວ ສະແດງຄວາມຂອບໃຈ ຕໍ່ຝ່າຍ ສ. ເກົາຫຼີ ທີ່ໄດ້ໃຫ້ການສະໜັບສະໜູນທາງດ້ານອຸປະກອນ ແລະ ຍານພາຫະນະຕ່າງໆ ໃຫ້ແກ່ພາກສ່ວນທີ່ກ່ຽວຂ້ອງຂອງລາວ ໃນໂອກາດການເປັນປະທານອາຊຽນ 2024 ຂອງ ສປປ ລາວ. ​