ໃນວັນທີ 18 ກໍລະກົດ 2023, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ນາງ ທອງ ສຸຄຸນເທຍຣີ (THONG Sokuntheary), ເອກອັກຄະຣາຊະທູດ ວິສາມັນຜູ້ມີອໍານາດເຕັມ ແຫ່ງ ຣາຊະອານາຈັກ ກຳປູເຈຍ ປະຈໍາ ສປປ ລາວ, ໃນໂອກາດທີ່ໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ ຕະຫຼອດໄລຍະ 3 ປີ. ພ້ອມນີ້, ກໍ່ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານເອກອັກຄະຣາຊະທູດ ເພື່ອເປັນການຊົມເຊີຍ ແລະ ສັນລະເສີນ ຕໍ່ຜົນງານໃນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຣາຊະອານາຈັກ ກຳປູເຈຍ ຢ່າງມີປະສິດທິຜົນ.

ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນງານຂອງ ທ່ານເອກອັກຄະຣາຊະທູດ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ນັບຕັ້ງແຕ່ວັນທີ 02 ຕຸລາ 2020 ເປັນຕົ້ນມາ, ທີ່ໄດ້ປະກອບສ່ວນຢ່າງຫ້າວຫັນໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກຳປູເຈຍ ກໍ່ຄື ການເປັນຄູ່ຮ່ວມມືຍຸດທະສາດຮອບດ້ານ ແລະ ຫມັ້ນຄົງຍາວນານ ໃຫ້ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ. ທ່ານທູດ ໄດ້ປະກອບສ່ວນຊຸກຍູ້ການເຂົ້າຮ່ວມກອງປະຊຸມຕ່າງໆ ແລະ ການແລກປ່ຽນການຢ້ຽມຢາມຄະນະຜູ້ແທນຂັ້ນສູງພັກ ແລະ ລັດຖະບານ ຂອງສອງປະເທດ ຢ່າງເປັນປົກກະຕິ, ຊຸກ​ຍູ້​​ການ​ຮ່ວມ​ມື ລະ​ຫວ່າງ ກະຊວງທີ່ກ່ຽວຂ້ອງຂອງສອງປະເທດ ໃຫ້ຂະຫຍາຍຕົວເຂົ້າສູ່ລວງເລິກ ແລະ ສາມາດລົງນາມເອກະສານສຳຄັນຮ່ວມກັນໃນຫຼາຍສະບັບ ເປັນຕົ້ນ ດ້ານພະລັງງານ, ດ້ານວັດທະນະທຳ ແລະ ທ່ອງທ່ຽວ, ດ້ານການສຶກສາ, ດ້ານການເງິນ ແລະ ທະນະຄານ. ປະຈຸບັນ ການຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງ ສອງປະເທດ ແມ່ນມີທ່ວງທ່າທີ່ດີຂຶ້ນ, ເຊິ່ງ ການລົງທຶນຂອງກໍາປູເຈຍ ຢູ່ ສປປ ລາວ ມີມູນຄ່າທັງໝົດ 127 ລ້ານໂດລາສະຫະລັດ ໃນນັ້ນ, ໂຄງການໃຫຍ່ທີ່ສຸດແມ່ນ ໂຄງການສໍາປະທານ ຄື: ໂຄງການພັດທະນາແຫຼ່ງທ່ອງທ່ຽວຄົບວົງຈອນ ແລະ ກາຊີໂນແດນສະຫວັນ ມີມູນຄ່າການລົງທຶນສູງເຖິງ 110 ລ້ານໂດລາສະຫະລັດ; ສະເພາະປີຜ່ານມາ ມູນຄ່າການຄ້າສອງຝ່າຍ ມີຫຼາຍກວ່າ 106 ລ້ານໂດລາສະຫະລັດ, ໃນນັ້ນ ການຊື້-ຂາຍ ໄຟຟ້າແມ່ນກວມປະມານ 100 ລ້ານໂດລາສະຫະລັດ ຕໍ່ປີ. ພິເສດ, ທ່ານທູດ ໄດ້ປະກອບສ່ວນຢ່າງແຂງແຮງໃນການຊຸກຍູ້ການລົງນາມໃນແຜນປະຕິບັດງານຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ກໍາປູເຈຍ ແຕ່ປີ 2023-2027 ແລະ ສົນທິສັນຍາ ວ່າດ້ວຍ ການກໍານົດຊາຍແດນປະເທດ ລະຫວ່າງ ສອງລັດຖະບານ ລາວ ແລະ ກຳປູເຈຍ; ປະກອບສ່ວນຂົນຂວາຍເອົາການຊ່ວຍເຫຼືອດ້ານມະນຸດສະທຳແກ່ ສປປ ລາວ ໃນການຕ້ານພະຍາດໂຄວິດ-19 ເປັນຕົ້ນ ການສະໜອງວັກແຊັງ Sinovac, ອຸປະກອນການແພດ ແລະ ອື່ນໆ, ເຊິ່ງໄດ້ປະກອບສ່ວນສຳຄັນເຂົ້າໃນວຽກງານສາທາລະນະສຸກຂອງລາວ ກໍ່ຄື ການຮັບມືກັບພະຍາດດັ່ງກ່າວ ໃນໄລຍະທີ່ມີການແຜ່ລະບາດຫນັກຢູ່ ສປປ ລາວ. ພ້ອມດຽວກັນນີ້, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນ ກຳປູເຈຍ ທີ່ໄດ້ໃຫ້ການຊ່ວຍເຫຼືອ ແລະ ການສະໜັບສະໜູນ ສປປ ລາວ ໃນດ້ານຕ່າງໆຕະຫຼອດໄລຍະຜ່ານມາ, ເຊິ່ງໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ເປັນແຕ່ລະໄລຍະ.

ໃນຂະນະດຽວກັນ, ທ່ານທູດ ກໍ່ໄດ້ສະແດງຄວາມຂອບໃຈເປັນຢ່າງສູງຕໍ່ ພັກ-ລັດຖະບານ ແລະ ປະຊາຊົນລາວ ກໍຄື ກະຊວງການຕ່າງປະເທດ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ຈົນໄດ້ຮັບຜົນສໍາເລັດອັນຈົບງາມ, ພ້ອມທັງ ໄດ້ສະແດງຄວາມປິຕິຍິນດີ ແລະ ຂອບໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ໃຫ້ການຍ້ອງຍໍຊົມເຊີຍຜົນງານ ແລະ ປະດັບຫຼຽນກາມິດຕະພາບ ອັນມີຄວາມໝາຍສໍາຄັນນີ້ ໃຫ້ແກ່ຕົນ, ເຊິ່ງເປັນສັນຍາລັກອັນມີຄວາມໝາຍຄວາມສໍາຄັນໃນການຊຸກຍູ້ສົ່ງເສີມການພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ກຳປູເຈຍ ແລະ ສປປ ລາວ ໃຫ້ໄດ້ຮັບການພັດທະນາຍິ່ງໆຂຶ້ນໃນຕໍ່ໜ້າ. ພ້ອມດຽວກັນນີ້, ກໍ່ຢືນຢັນວ່າ ພາຍຫຼັງທີ່ກັບຄືນປະເທດ ແລະ ໄປຮັບໜ້າທີ່ໃໝ່ແລ້ວ, ທ່ານທູດເອງ ກໍ່ຈະສືບຕໍ່ເຄື່ອນໄຫວຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສອງປະເທດ ໃຫ້ນັບມື້ນັບຈະເລີນງອກງາມຍິ່ງໆຂື້ນ ເພື່ອນຳເອົາຜົນປະໂຫຍດສູງສຸດ ມາສູ່ປະຊາຊົນສອງຊາດ ລາວ-ກຳປູເຈຍ.