ໃນວັນທີ 14 ກໍລະກົດ 2023 ທີ່ ຈາກາກຕາ, ອິນໂດເນເຊຍ, ທ່ານ ສະ​ເຫຼີ​ມ​ໄຊ ກົມ​ມະ​ສິດ, ຮອງນາຍົກ  ລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສືບຕໍ່ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມ ຄັ້ງທີ 13 ຂອງລັດຖະມົນຕີຕ່າງປະເທດ ພາຍໃຕ້ຂອບກອງປະຊຸມສຸດຍອດອາຊີຕາເວັນອອກ, ກອງປະຊຸມລັດຖະມົນຕີຕ່າງປະເທດອາຊຽນ-ສ.ອາເມລິກາ ແລະ ກອງປະຊຸມເວທີພາກພື້ນອາຊຽນ ຄັ້ງທີ 30.

ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 13 ໄດ້ທົບທວນການຮ່ວມມື ແລະ ຢໍ້າຄືນຄວາມໝາຍໝັ້ນເພື່ອຮັດແໜ້ນການຮ່ວມມືພາຍໃຕ້ກົນໄກກອງປະຊຸມສຸດຍອດອາຊີຕາເວັນອອກ ຫຼື ອີເອເອສ ໃນຖານະທີ່ເປັນເວທີຂອງຜູ້ນໍາ ເພື່ອປຶກສາຫາລື ແລະ ຮ່ວມມືໃນຂົງເຂດຍຸດທະສາດ, ການເມືອງ ແລະ ເສດຖະກິດ ທີ່ມີຄວາມເປັນຫ່ວງ ແລະ ມີຜົນປະໂຫຍດຮ່ວມກັນ ໂດຍແນໃສ່ປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ ກໍຄື ໃນໂລກ ໂດຍສອດຄ່ອງກັບບັນດາຫຼັກການ ແລະ ຈຸດປະສົງຂອງກົນໄກກອງປະຊຸມສຸດຍອດອາຊີຕາເວັນອອກ ທີ່ມີອາຊຽນເປັນແກນກາງ. ສໍາຄັນ, ກອງປະຊຸມ ໄດ້ຮັບຮອງເອົາແຜນປະຕິບັດງານສະບັບໃໝ່ ສໍາລັບສົກປີ 2024-2028 ເພື່ອເປັນທິດທາງໃຫ້ແກ່ການເສີມຂະຫຍາຍການຮ່ວມມືໃນຂອບອີເອເອສ.

ກອງປະຊຸມລັດຖະມົນຕີຕ່າງປະເທດອາຊຽນ-ສ.ອາເມລິກາ ໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ສ.ອາເມລິກາ ສໍາລັບສົກປີ 2021-2025 ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານ ລະຫວ່າງອາຊຽນ ແລະ ສ.ອາເມລິກາ. ພ້ອມນີ້, ກອງປະຊຸມ ໄດ້ເຫັນດີໃນດ້ານຫຼັກການຕໍ່ຂໍ້ສະເໜີຂອງ ສ.ອາເມລິກາ ໃນການສ້າງຕັ້ງສູນອາຊຽນ-ສ.ອາເມລິກາ ຢູ່ ສ.ອາເມລິກາ ເພື່ອສົ່ງເສີມຄວາມຮັບຮູ້ ແລະ ເຂົ້າໃຈກ່ຽວກັບການພົວພັນຮ່ວມມື ອາຊຽນ-ສ.ອາເມລິກາ.

ກອງປະຊຸມເວທີພາກພື້ນອາຊຽນ ຄັ້ງທີ 30 ໄດ້ຮັບຊາບຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານ ຮ່າໂນ້ຍ ສະບັບທີ 2 (2020-2025) ແລະ ປຶກສາຫາລືທິດທາງການຮ່ວມມືໃນຕໍ່ໜ້າຂອງເວທີພາກພື້ນອາຊຽນ ທີ່ມີອາຊຽນເປັນແກນກາງ ໂດຍສະເພາະການເສີມຂະຫຍາຍບົດບາດ ແລະ ປະສິດທິພາບຂອງເວທີພາກພື້ນອາຊຽນ ໃນຖານະທີ່ເປັນເວທີສໍາຄັນໃນສົ່ງເສີມການປຶກສາຫາລືດ້ານການເມືອງ ແລະ ຄວາມໝັ້ນຄົງທີ່ສ້າງສັນ ແລະ ການຮ່ວມມື ເພື່ອຮັບມືກັບສິ່ງທ້າທາຍ ແລະ ບັນຫາຕ່າງໆ ທີ່ມີຄວາມສົນໃຈຮ່ວມກັນໃນພາກພື້ນອາຊີ-ປາຊີຟິກ. ໂອກາດນີ້, ກອງປະຊຸມ ໄດ້ຮັບຮອງເອົາເອກະສານຜົນກອງປະຊຸມ ຄື: 1). ບັນຊີກິດຈະກໍາຂອງເວທີພາກພື້ນອາຊຽນ ສໍາລັບສົກປີ 2023-2024, 2). ຖະແຫຼງການສະເຫຼີມສະຫຼອງຄົບຮອບ 30 ປີ ຂອງເວທີພາກພື້ນອາຊຽນ, 3). ເອກະສານແນວຄວາມຄິດກ່ຽວກັບການສັງລວມບັນດາເອກະສານເພື່ອສະເຫຼີມສະຫຼອງຄົບຮອບ 30 ປີ ຂອງເວທີພາກພື້ນອາຊຽນ, 4). ແຜນວຽກເວທີພາກພື້ນອາຊຽນ ກ່ຽວກັບການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ (2023-2024).