ໃນວັນທີ 21 ມີນາ 2023, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດປາຖະກະຖາໃນຫົວຂໍ້: “ສະພາບການພົ້ນເດັ່ນໃນພາກພື້ນ ແລະ ສາກົນ (The Development of Regional and International Architecture) ” , ໃຫ້ກຽດເປັນວິທະຍາກອນໂດຍ ທ່ານ ສຈ ດຣ. ສຸຣະກຽດ ສະຖຽນໄທ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງການຕ່າງປະເທດ ແຫ່ງຣາຊະອານາຈັກໄທ, ປະທານສະພາສັນຕິພາບ ແລະ ຄວາມປອງດອງແຫ່ງອາຊີ, ພ້ອມທັງເປັນກຽດເຂົ້າຮ່ວມຮັບຟັງ ປະກອບມີ: ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດແຫ່ງ ສປປ ລາວ, ຫົວໜ້າຄະນະພົວພັນຕ່າງປະເທດສູນກາງພັກ, ບັນດາທ່ານອະດີດການນໍາຂັ້ນສູງ, ບັນດາທ່ານຮອງລັດຖະມົນຕີ, ຄະນະນໍາ, ຄະນະກົມ ແລະ ພະນັກງານຫຼັກແຫຼ່ງຂັ້ນພະແນກພາຍໃນຂອງກະຊວງການນຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບັນດາກະຊວງອ້ອມຂ້າງສູນກາງກ່ຽວຂ້ອງ ລວມຈໍານວນທັງໝົດ 300 ທ່ານ.
ຈຸດປະສົງຂອງການປາກະຖະຖາຄັ້ງນີ້ ແມ່ນເພື່ອຮັບຟັງທັດສະນະ, ຈຸດຢືນ, ສະຫຼຸບຕີລາຄາສະພາບການພາກພື້ນ ແລະ ສາກົນ ໃນປັດຈຸບັນ ທີ່ມີການຜັນແປຢ່າງສັບສົນ, ຄາດຄະເນໄດ້ຍາກ ທັງຍັງສົ່ງຜົນກະທົບໂດຍກົງຕໍ່ບັນຫາການເມືອງ, ເສດຖະກິດ ແລະ ການພົວພັນສາກົນ ກໍຄື ການກໍານົດທັດສະນະຈຸດຢືນຕ່າງໆ ຢ່າງຖືກຕ້ອງໃນການພົວພັນຮ່ວມມື ເພື່ອເປັນຂໍ້ສະເໜີແນະ, ກໍຄື ບົດຮຽນໃນການເຄື່ອນໄຫວວຽກງານການທູດຂອງຕົນ ໃນໄລຍະຜ່ານມາ ໃນການແກ້ໄຂບັນຫາສັນຕິພາບ ແລະ ຂໍ້ຂັດແຍ້ງສາກົນຕ່າງໆ.
ປັດຈຸບັນ, ສະພາບການຂອງພາກພື້ນ ແລະ ຂອງໂລກ ສືບຕໍ່ຜັນແປໄປຢ່າງສັບສົນວູ້ນວາຍ, ເປັນຕົ້ນແມ່ນການຊ່ວງຊິງອໍານາດ ລະຫວ່າງ ປະເທດມະຫາອໍານາດເກົ່າ ແລະ ໃຫມ່ ເຊິ່ງໄດ້ສົ່ງຜົນສະທ້ອນໂດຍກົງຕໍ່ບັນຍາກາດການພົວພັນຮ່ວມມືຂອງພາກພື້ນ ແລະ ສາ ກົນ. ນອກນັ້ນ, ບັນຫາສົງຄາມຢູ່ອູກຣາອິນ, ບັນຫາຊ່ອງແຄບໄຕ້ຫວັນ, ບັນຫາແຫຼມເກົາຫຼີ, ສົງຄາມການຄ້າ, ວິກິດການທາງດ້ານເສດຖະກິດ, ໄພເງິນເຟີ້, ຄວາມໝັ້ນຄົງທາງດ້ານສະບຽງອາຫານ, ບັນຫາສະພາບການປ່ຽນແປງຂອງດິນຟ້າອາກາດ, ບັນຫາໂລກລະບາດ, ໄພທຳມະຊາດ ແລະ ອື່ນໆ ທີ່ບໍ່ພຽງແຕ່ໄດ້ກາຍເປັນສິ່ງທ້າທາຍ ຕໍ່ຄວາມໝັ້ນຄົງຂອງພາກພື້ນ ແລະ ສາກົນ, ແຕ່ຍັງສົ່ງຜົນກະທົບຕໍ່ການດໍາລົງຊີວິດຂອງປະຊາຊົນ ແລະ ຍັງເປັນອຸປະສັກກົດໜ່ວງ ຕໍ່ການພັດທະນາເສດຖະ ກິດພາກພື້ນ ແລະ ສາກົນ ກໍຄື ການປ່ຽນແປງພູມສາດການເມືອງໂລກ ໃຫ້ມີຄວາມສະຫຼັບຊັບຊ້ອນຂຶ້ນກວ່າເກົ່າ.
ທ່ານ ສຈ ດຣ. ສຸຣະກຽດ ສະຖຽນໄທ, ບໍ່ພຽງແຕ່ເປັນນັກການທູດມືອາຊີບທີ່ມີປະສົບການສູງ, ແຕ່ຍັງເປັນຜູ້ທີ່ມີບົດບາດສໍາຄັນໃນການເຄື່ອນໄຫວການຕ່າງປະເທດ ແລະ ເປັນທີ່ຮູ້ຈັກກັນຢ່າງກວ້າງຂວາງໃນຂົງເຂດວຽກງານການທູດ. ທ່ານ ໄດ້ຮັບໜ້າທີ່ສຳຄັນຫລາຍໆຕຳແໜ່ງ, ເຊິ່ງເປັນທັງອະດີດຮອງນາຍົກ ລັດຖະ ມົນຕີ, ອະດີດລັດຖະມົນຕີກະຊວງການຕ່າງປະເທດ, ອະດີດລັດຖະມົນຕີກະຊວງການເງິນ ແຫ່ງຣາຊະອານາ ຈັກໄທ, ອະດີດທີ່ປຶກສາດ້ານເສດຖະກິດ ແລະ ການຕ່າງປະເທດຂອງນາຍົກ ສະໄໝລັດຖະບານຂອງ ທ່ານ ສະວາລິດ ຢົງໃຈຍຸດ, ອະດີດປະທານ ສະຖາບັນເສດຖະກິດ-ສັງຄົມ ແລະ ອີກຫລາຍຕໍາແໜ່ງທີ່ສໍາຄັນ. ປັດຈຸ ບັນ, ທ່ານ ສຈ ດຣ. ສຸຣະກຽດ ສະຖຽນໄທ, ເປັນປະທານສະພາສັນຕິພາບ ແລະ ຄວາມປອງດອງແຫ່ງອາຊີ, ເປັນນັກການທູດ-ການເມືອງ ອິດສະຫຼະ.