ໃນວັັນທີ 23 ກຸມພາ 2023, ທີ່ ໂຮງແຮມ ແລນມາກ, ສະຖານເອກອັກຄະລັດຖະທູດ ແຫ່ງ ບຣູໄນ ດາຣູຊາລາມ ປະຈໍາ ສປປ ລາວ ໄດ້ຈັດພິທີສະເຫຼີມສະຫຼອງວັນຊາດ ບຣູໄນ ດາຣູຊາລາມ ຄົບຮອບ 39 ປີ ແລະ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຄົບຮອບ 30, ໂດຍການເປັນປະທານຂອງ ທ່ານ ນາອິມ ຊາເລ, ເອກອັກຄະລັດຖະທູດ ແຫ່ງ ບຣູໄນ ດາຣູຊາລາມ ປະຈໍາ ສປປ ລາວ ພ້ອມດ້ວຍພັນລະຍາ ແລະ ເປັນກຽດເຂົ້າຮ່ວມພິທີດັ່ງກ່າວໂດຍ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ພ້ອມນີ້ກໍມີຮອງລັດຖະມົນຕີ,​ ທຸຕານຸທູດ, ຜູ້ຕາງໜ້າອົງການຈັດຕັ້ງສາກົນ ປະຈໍາ ສປປ ລາວ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານເອກອັກຄະລັດຖະທູດ ນາອິມ ຊາເລ ໄດ້ຂຶ້ນມີຄໍາເຫັນຕໍ່ພິທີ ໂດຍໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ຄວາມເປັນມາຂອງວັນຊາດ ບຣູໄນ ດາຣູຊາລາມ, ພ້ອມທັງໄດ້ຕີລາຄາສູງ ແລະ ຍົກໃຫ້ເຫັນເຖິງ ຜົນສໍາເລັດດ້ານຕ່າງໆໃນການພົວພັນຮ່ວມມື ລະຫວ່າງ ບຣູໄນ ດາຣູຊາລາມ ແລະ ສປປ ລາວ ຕະຫຼອດໄລຍະ 30 ປີຜ່ານມາ.

ໃນໂອກາດດຽວກັນນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ການຈັດພິທີດັ່ງກ່າວຂອງສະຖານເອກອັກຄະລັດຖະທູດ ແຫ່ງ ບຣູໄນ ດາຣູຊາລາມ ໃນຄັ້ງນີ້, ພ້ອມທັງໄດ້ຕີລາຄາສູງ ຕໍ່ການພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ບຣູໄນ ນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 27 ກໍລະກົດ 1993, ເຊິ່ງຕະຫຼອດໄລຍະ 30 ປີຜ່ານມາ ການພົວພັນຮ່ວມມືລະຫວ່າງສອງປະເທດ ໃນດ້ານຕ່າງໆ ນັບມື້ໄດ້ຮັບການເສີມຂະຫຍາຍຢ່າງມີປະສິດທິພາບ ແລະ ປະສິດທິຜົນສູງ, ມີການແລກປ່ຽນການຢ້ຽມຢາມ ເຊິ່ງກັນ ແລະ ກັນ ຂອງການນໍາຂັ້ນສູງຢ່າງເປັນປົກກະຕິ ລວມເຖິງການພົວພັນລະຫວ່າງປະຊາຊົນສອງຊາດ, ການພົວພັນຮ່ວມມືໃນດ້ານຕ່າງໆ ເປັນຕົ້ນດ້ານການເມືອງ, ເສດຖະກິດ, ການຄ້າ-ການລົງທຶນ, ການພັດທະນາຊັບພະຍາກອນມະນຸດ ແລະ ອື່ນໆ ສືບຕໍ່ໄດ້ຮັບການເສີມຂະຫຍາຍເປັນກ້າວໆ ອັນເປັນການສ້າງຄວາມໄວ້ເນື້ອເຊື່ອໃຈ ແລະ ຄວາມເຂົ້າອົກເຂົ້າໃຈລະຫວ່າງສອງລັດຖະບານ ກໍຄືປະຊາຊົນສອງຊາດ, ພິເສດແມ່ນການຢ້ຽມຢາມລັດຖະກິດຂອງພະນະທ່ານ ທອງລຸນ ສີສຸລິດ, ປະທານປະເທດແຫ່ງ ສປປ ລາວ ໃນທ້າຍປີ 2022, ເຊິ່ງເປັນການຢັ້ງຢືນຄືນຄວາມປາຖະໜາພັດທະນາການຮ່ວມມືລະຫວ່າງສອງປະເທດໃຫ້ກ້າວສູ່ລວງເລິກກວ່າເກົ່າ. ໃນຂະນະດຽວກັນນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຕີລາຄາສູງ ຕໍ່ລັດຖະບານ ແລະ ປະຊາຊົນ ບຣູໄນ ທີ່ໃຫ້ການສະໜັບສະໜູນ ແລະ ຊ່ວຍເຫຼືອ ແກ່ ສປປ ລາວ ຕະຫຼອດມາ ເຊິ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ລວມເຖິງການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2016 ຜ່ານມາ ແລະ ອື່ນໆ. ພ້ອມນີ້, ກໍໄດ້ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ບູຣໄນ ສືບຕໍ່ໄດ້ຮັບການພັດທະນາເລິກເຊິ່ງ ແລະ ມີປະສິດທິຜົນຍິ່ງໆຂຶ້ນໃນອະນາຄົດ.

ພິທີດັ່ງກ່າວ ໄດ້ດໍາເນີນໄປດ້ວຍບັນຍາກາດອັນອົບອຸ່ນ, ສະໜິດສະໜົມ, ມີເນື້ອໃນຄວາມໝາຍອັນສໍາຄັນ ແລະ ໄດ້ຮັບຜົນສໍາເລັດຢ່າງຈົບງາມ.