ໃນຕອນແລງຂອງວັນທີ 13 ກຸມພາ 2023, ທີ່ ໂຮງແຮມແລນມາກ, ນະຄອນຫຼວງວຽງຈັນ, ທ່ານ ຄໍາໃບ ດໍາລັດ, ຮອງປະທານສະພາແຫ່ງຊາດ ແຫ່ງ ສປປ ລາວ, ປະທານສະມາຄົມມິດຕະພາບ ລາວ-ກໍາປູເຈຍ ແລະ ຄະນະ ໄດ້ເຂົ້າຢ້ຽມຂໍ່ານັບ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການແຕ່ວັນທີ 13-14 ກຸມພາ 2023.
ໃນໂອກາດດັ່ງກ່າວ, ທ່ານ ຄໍາໃບ ດໍາລັດ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຢ່າງເປັນທາງການ ຂອງສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນແລະ ຄະນະ ໃນຄັ້ງນີ້, ເຊິ່ງໄດ້ນໍາເອົາໄມຕີຈິດມິດຕະພາບທີ່ສະໜິດສະໜົມ ຂອງລັດຖະບານ ແລະ ປະຊາຊົນກໍາປູເຈຍ ມາສູ່ ລັດຖະບານ ແລະ ປະຊາຊົນລາວບັນດາເຜົ່າ, ທັງເປັນເປັນຮັດແໜ້ນ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ, ການຮ່ວມມືທີ່ມີມາແຕ່ດົນນານຖານບ້ານໃກ້ເຮືອນຄຽງ ແລະ ການພົວພັນແບບຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສອງປະເທດ ລາວ-ກໍາປູເຈຍ ໃຫ້ນັບມື້ສວຍສົດງົດງາມ ແລະ ເກີດດອກອອກຜົນ. ພ້ອມນີ້, ກໍ່ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດຂອງປະຊາຊົນກໍາປູເຈຍ ຍາດມາໄດ້ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາຂອງ ພັກປະຊາຊົນກໍາປູເຈຍ ອັນມີ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນທີ່ເປັນຜູ້ນໍາ, ເຮັດໃຫ້ ກໍາປູເຈຍ ມີສະຖຽນລະພາບທາງການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ເຮັດໃຫ້ບົດບາດ ແລະ ອິດທິພົນຂອງ ກໍາປູເຈຍ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ. ພ້ອມດຽວກັນນັ້ນ, ທ່ານ ຄໍາໃບ ດໍາລັດ ຍັງໄດ້ລາຍງານການເຄື່ອນໄຫວວຽກງານຂອງສະມາຄົມມິດຕະພາບ ລາວ-ກໍາປູເຈຍ ໂດຍຫຍໍ້ ໃຫ້ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນຊາບ ໂດຍສະມາຄົມມິດຕະພາບ ລາວ-ກຳປູເຈຍ ໄດ້ມີການພົວພັນ, ປະສານສົມທົບ, ແລກປ່ຽນການຢ້ຽມຢາມ ແລະ ໄປມາຫາສູ່ກັນກັບ ສະມາຄົມມິດຕະພາບ ກໍາປູເຈຍ-ລາວ ຢ່າງເປັນປົກກະຕິຕະຫຼອດມາ, ທັງເປັນເຈົ້າການຊຸກຍູ້ໃຫ້ ສະມາຄົມມິດຕະພາບ ຂັ້ນແຂວງຂອງ ສອງປະເທດ ມີການແລກປ່ຽນຂໍ້ມູນຂ່າວສານ, ຈັດກິດຈະກຳ ແລະ ໄປມາຫາສູ່ກັນ ເພື່ອເຮັດປະຊາຊົນສອງປະເທດ ໂດຍສະເພາະ ຢູ່ປະຊາຊົນທີ່ດຳລົງຊີວິດຢູ່ຕາມເຂດຊາຍແດນ ໃຫ້ມີຄວາມນັບຖື, ເຊື່ອໝັ້ນ ແລະ ເຂົ້າໃຈ ເຊິ່ງກັນ ແລະ ກັນ ແລະ ຊ່ວຍເຫຼືອກັນ ເພື່ອປະກອບສ່ວນສະໜັບສະໜູນວຽກງານປ້ອງກັນຄວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍແດນ, ການພັດທະນາດ້ານເສດຖະກິດ-ການຄ້າ, ການລົງທຶນ, ທ່ອງທ່ຽວ, ສຶກສາ-ສາທາລະນະສຸກ. ພ້ອມນັ້ນ, ຈະຮ່ວມກັບ ສະມາຄົມມິດຕະພາບ ກໍາປູເຈຍ-ລາວ ເຮັດໜ້າທີ່ໃນການການສຶກສາອົບຮົມຄົນຮຸ່ນໃໝ່ ຂອງ ສອປະເທດ ໃຫ້ຮັບຮູ້, ເຂົ້າໃຈຢ່າງເລິກເຊິ່ງ ແລະ ໃຫ້ເຂົາເຈົ້າເປັນເຈົ້າການຖະໜຸຖະໜອມ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນຮ່ວມມືທີ່ເປັນມູນເຊື້ອອັນດີງາມຂອງສອງປະເທດ ໃຫ້ນັບມື້ສວຍສົດງົດງາມ, ເກີດດອກອອກຜົນ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງປະເທດຢ່າງແທ້ຈິງ.
ໃນໂອກາດດຽວກັນ, ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນ, ນາຍົກລັດຖະມົນຕີ ກໍາປູເຈຍ ກໍ່ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການຮ່ວມມືທີ່ມີມາແຕ່ດົນນານຖານບ້ານໃກ້ເຮືອນຄຽງ ແລະ ການພົວພັນແບບຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສອງປະເທດ ລາວ-ກໍາປູເຈຍ ທີ່ໄດ້ຮັບການເສີມຂະຫຍາຍເປັນກ້າວໆຕະຫຼອດມາ ເວົ້າລວມ, ເວົ້າສະເພາະ ກໍ່ຄື ການພົວພັນຮ່ວມມື ລະຫວ່າງ ສອງສະມາຄົມມິດຕະພາບ ລາວ-ກໍາປູເຈຍ ແລະ ກໍາປູເຈຍ-ລາວ, ພ້ອມທັງໄດ້ໃຫ້ທິດຊີ້ນໍາ ສອງສະມາຄົມມິດຕະພາບດັ່ງກ່າວ ໃຫ້ສືບຕໍ່ປະສານສົມທົບກັນຢ່າງໃກ້ຊິດ, ປະຕິບັດພາລະບົດບາດ ແລະ ຈັດຕັ້ງປະຕິບັດວຽກງານ ໃຫ້ມີປະສິດທິພາບ ແລະ ປະສິດທິຜົນຂຶ້ນຕື່ມ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນ ແລະ ການຮ່ວມມື ລະຫວ່າງສອງປະເທດ ກໍ່ຄື ປະຊາຊົນສອງຊາດ ລາວ-ກໍາປູເຈຍ ໃຫ້ແຕກດອກອອກຜົນຍິ່ງໆຂຶ້ນ.