ໃນວັນທີ 10 ທັນວາ 2020, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະ ເທດ ແຫ່ງ ສປປ ລາວ ໄດ້ໂອ້ລົມຜ່ານລະບົບທາງໄກ ກັບ ທ່ານ ນາງ Adaljiza Albertina Xavier Reis Magno, ລັດຖະມົນຕີກະຊວງການຕ່າງປະເທດ ແລະ ການຮ່ວມມື ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ທີ່ ກະຊວງການຕ່າງປະເທດ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ ແລະ ຕີມໍ-ເລສເຕ.

ໃນການໂອ້ລົມຄັ້ງນີ້, ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ       ສອງປະເທດ ທີ່ໄດ້ຮັບການພັດທະນາ ແລະ ເສີມຂະຫຍາຍ ຕະຫຼອດໄລຍະຫຼາຍກວ່າ 2 ທົດສະວັດ ຜ່ານມາ, ນັບແຕ່ສອງປະເທດໄດ້ມີການສ້າງຕັ້ງສາຍພົວພັນການທູດຮ່ວມກັນ ໃນວັນທີ 29 ກໍລະກົດ 2002, ເຊິ່ງສະແດງອອກໃນການແລກປ່ຽນການຢ້ຽມຢາມຂອງການນໍາຂັ້ນສູູງຂອງສອງປະເທດ ໃນໄລຍະຜ່ານມາ, ເຊິ່ງຫຼ້າສຸດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດລາວ ໄດ້ເດີນທາງຢ້ຽມຢາມ ຕີມໍ-ເລສເຕ ໃນນາມຜູ້ຕາງໜ້າພິເສດຂອງ ທ່ານນາຍົກລັດຖະມົນຕີ ແຫ່ງ ສປປ ລາວ ເພື່ອເຂົ້າຮ່ວມພິທີສະເຫຼີມສະຫຼອງວັນລົງປະຊາມະຕິປະກາດເອກະລາດ ຄົບຮອບ 20 ປີ ຂອງຕີມໍ-ເລສເຕ ໃນວັນທີ 30 ສິງຫາ 2019 ຜ່ານມາ ແລະ ທ່ານ ປອ. Dionisioda Costa Babo Soares, ລັດຖະມົນຕີຕ່າງປະເທດ ແລະ ການຮ່ວມມື ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ກໍໄດ້ຢ້ຽມຢາມທາງການ ສປປ ລາວ ໃນວັນທີ 5-8 ມິຖຸນາ 2019 ຜ່ານມາ.

ສອງຝ່າຍ ຍັງໄດ້ປຶກສາຫາລືກ່ຽວກັບຄວາມເປັນໄປໄດ້ໃນການຮ່ວມມືທາງດ້ານເສດຖະກິດຮ່ວມກັນ ກໍຄື ຄວາມເປັນໄປໄດ້ໃນການແລກປ່ຽນດິນປຸກສ້າງສະຖານທູດຢູ່ປະເທດຂອງກັນ ແລະ ກັນ ໃນອະນາຄົດ. ສອງຝ່າຍ ຍັງໄດ້ແລກປ່ຽນທັດສະນະກ່ຽວກັບສະພາບການເເຜ່ລະບາດຂອງພະຍາດໂຄວິດ-19 ໃນປະຈຸບັນ ແລະ ການຮ່ວມມືໃນຂອບອາຊຽນ, ເຊິ່ງປະເທດຕີມໍ ພວມສະໝັກເຂົ້າເປັນສະມາຊິກຂອງອົງການດັ່ງກ່າວໃນປະຈຸບັນ. ໃນໂອກາດນີ້, ທ່ານ ລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ຝ່າຍຕີມໍ-ເລສເຕ ທີ່ໄດ້ໃຫ້ການຊ່ວຍເຫຼືອປະຊາຊົນລາວ ທີ່ໄດ້ຮັບຜົນກະທົບຈາກສັນເຂື່ອນກັ້ນນໍ້າ ເຊປຽນ-ເຊນໍ້ານ້ອຍແຕກ ທີ່ ແຂວງອັດຕະປື ໃນມູນຄ່າ 750.000 ໂດລາສະຫະລັດ ໃນປີ 2018 ທີ່ຜ່ານມາ.