ໃນຕອນເຊົ້າຂອງ ວັນທີ 08ທັນວາ2020 ທີ່ກະຊວງການຕ່າງປະເທດ ໄດ້ຈັດພິທີ​ເຊື່ອມຊືມມູນເຊື້ອວັນຊາດ 02 ທັນວາ ຄົບຮອບ 45 ປີ ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ, ພາຍໃຕ້ການເປັນປະທານຂອງສະຫາຍ ສະເຫລີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ,​ ເຊິ່ງມີບັນດາ ຄະນະພັກ-ຄະນະນຳ, ສະມາຊິກພັກ ​ແລະ ພະນັກງານ - ລັດຖະກອນ ພາຍ​ໃນກະຊວງເຂົ້າຮ່ວມຢ່າງພ້ອມພຽງ.

     ໃນໂອກາດການເຊື່ອມຊຶມ ສະຫາຍ ສະເຫລີມໄຊ ກົມມະສິດ ໄດ້ຍົກໃຫ້ເຫັນເນື້ອໃນສຳຄັນໃນວັນປະຫວັດສາດຂອງຊາດທີ່ເປັນການເສຍສະຫຼະຕໍ່ສູ້ຂອງປະຊາຊົນ, ຂອງບັນພະບຸລຸດທີ່ເປັນ ມູນເຊື້ອສຶບທອດລັດ ສຶບທອດປະຊາຊົນ. ວັນຊາດ 02 ທັນວາ ຈິ່ງເປັນວັນສໍາຄັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ ຂອງຊາດເຮົາ; ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫລະພາບ, ເປັນເຈົ້າຂອງປະເທດຊາດ, ມີເອກະລາດຢ່າງສົມບູນ, ມີອະທິປະໄຕຢ່າງຄົບຖ້ວນ ແລະ ໜາກຜົນທີ່ຍາດມາໄດ້ຕະຫຼອດໄລຍະ 45 ປີຜ່ານມາ. ພ້ອມນັ້ນຍັງໄດ້ຍົກໃຫ້ເຫັນມູນ​ເຊື້​​ອຜົນງານ ແລະ ຄຸນງາມຄວາມດີຂອງປະທານ ​ໄກສອນພົ​ມວິຫານ​ ຜູ້​ນໍາ​ທີ່​ແສນເຄົາລົບ​ຮັກ​ຂອງ​ປວງ​ຊົນ​ລາວ ທີ່ເຂົ້າຮ່ວມເຄື່ອນໄຫວປະຕິວັດແຕ່ເຍົາໄວ, ໄດ້ຜ່ານການຝຶກຝົນທົດສອບໃນຂະບວນການຕົວຈິງ ໄດ້ຮັບຜິດຊອບວຽກງານແຕ່ນ້ອຍຫາໃຫຍ່ ກ້າວຂຶ້ນເປັນຜູ້ນຳສູງສຸດຂອງພັກ. ການເຜີຍແຜ່ເຊື່ອມຊຶມ​ແນວ​ຄິດ​ຂອງປະທານ ​ໄກສອນພົມ​ວິຫານ ​ແມ່ນເພື່ອໃຫ້ພະນັກງານ ສະມາຊິກພັກ ໄດ້ຄົ້ນຄວ້າຫັນເຂົ້າ​ເປັນ​ແນວ​ຄິດ,ທິດ​ສະ​ດີ​ໃນການປະຕິບັດໜ້າທີ່ຮັບໃຊ້ຊາດຮັບໃຊ້ປະຊາຊົນ. ​ໃນ​ຕອນ​ທ້າຍ, ສະຫາຍ​ປະທານ ໄດ້ເນັ້ນ​​ໃຫ້ສະມາຊິກພັກ ​ແລະ ພະນັກງານ - ລັດຖະກອນ ພາຍ​ໃນກະຊວງ​ທຸກ​ສະຫາຍ ຈົ່ງເພີ່ມ​ຄວາມ​ຮັບຜິດຊອບ​ໃນ​ການກໍາ​ແໜ້ນ​ອຸດົມ​ການ​ຂອງ​ພັກ,ຈຸດປະສົງ, ຫລັກການ, ທິດ​ນໍາຂອງພັກ, ສ້າງໃຫ້ການ​ຈັດ​ຕັ້ງ​ພັກ-ລັດໃຫ້ມີຄວາມເຂັ້ມແຂງ, ສ້າງໜ່ວຍພັກໃຫ້ມີ​ຄວາມ​ປອດ​ໃສ, ​ເຂັ້ມ​ແຂງ ​ແລະໜັກ​ແໜ້ນ,ສືບ​ທອດພາລະ​ບົດບາດ​ໃນ​ການ​ຊີ້​ນໍາ-ນໍາພາ​ໃນທຸກຂົງເຂດ​ວຽກ​ງານ ​ແລະ ພ້ອມ​ກັນນໍາ​ເອົາເນື້ອໃນເອກະສານໄປຈັດຕັ້ງຜັນຂະຫຍາຍຕາມແນວທາງຮັກຊາດ ແລະ ພັດທະນາ ໃຫ້ປະກົດຜົນເປັນຈິງ.