ພິທີເປີດສະໂມສອນນັກການທູດລາວ
ປຶ້ມ “ແນວຄວາມຄິດຊີ້ນຳຕໍ່ວຽກງານການຕ່າງປະເທດ ຂອງປະທານ ຄຳໄຕ ສີພັນດອນ”
ໃນວັນທີ 9 ຕຸລາ 2020, ສະຖາບັນການຕ່າງປະເທດ ກະຊວງການຕ່າງປະເທດ ໄດ້ຈັດພິທີເປີດສະໂມສອນນັກການທູດລາວ, ໃຫ້ກຽດເຂົ້າຮ່ວມ ແລະ ເປັນປະທານເປີດພິທີໂດຍ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ທ່ານ ສົມສະຫວາດ ເລັ່ງສະຫວັດ, ອະດີດກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງການຕ່າງປະເທດ, ບັນດາຄະນະນຳກະຊວງການຕ່າງປະເທດ, ອະດີດຄະນະນຳກະຊວງການຕ່າງປະເທດ, ຄະນະກົມ, ບັນດາທ່ານທູດອາວຸໂສບຳນານ ແລະ ພະນັກງານກະຊວງການຕ່າງປະເທດ ເຂົ້າຮ່ວມປະມານ 70 ທ່ານ.
ຈຸດປະສົງຂອງການສ້າງຕັ້ງສະໂມສອນນັກການທູດລາວ ກໍ່ເພື່ອເຕົ້າໂຮມບັນດາອະດີດເອກອັກຄະລັດຖະທູດ ແລະ ບັນດານັກການທູດລາວ ເພື່ອເປັນເວທີປຶກສາຫາລື, ແລກປ່ຽນຄຳຄິດຄຳເຫັນ, ຕີລາຄາຕໍ່ສະພາບການທີ່ພົ້ນເດັ່ນຢູ່ໃນພາກພື້ນ ແລະ ສາກົນ ທີ່ມີການຜັນແປໄປຢ່າງໄວວາ. ນອກຈາກນີ້ ຍັງເພື່ອເປັນຂໍ້ມູນທີ່ເປັນປະໂຫຍດໃຫ້ແກ່ພະນັກງານກະຊວງການຕ່າງປະເທດ ໄດ້ນຳໄປໜູນໃຊ້ເຂົ້າໃນການຄົ້ນຄວ້າວິໄຈ ແລະ ເປັນຂໍ້ມູນລາຍງານຄະນະນຳກະຊວງການຕ່າງປະເທດ. ພ້ອມນັ້ນ, ສະໂມສອນນັກການທູດລາວ ຍັງຈະເປັນເວທີໃນການສ້າງກິດຈະກຳຕ່າງໆ ເພື່ອສົ່ງເສີມຄວາມຮັກແພງສາມັກຄີ, ແລກປ່ຽນຄວາມຮູ້ ແລະ ປະສົບການ ລະຫວ່າງ ນັກການທູດອາວຸໂສບຳນານ ແລະ ນັກການທູດຮຸ້ນໜຸ່ມນ້ອຍ ກໍ່ຄື ພະນັກງານກະຊວງການຕ່າງປະເທດ.
ໃນຄັ້ງນີ້ ຍັງເປັນຂີດຫມາຍອັນສຳຄັນທາງດ້ານປະຫວັດ ສາດແຫ່ງການເຕີບໃຫຍ່ຂະຫຍາຍຕົວຂອງຂະແໜງການຕ່າງປະເທດ ຂອງ ສປປ ລາວ ໂດຍມີ ທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງການຕ່າງປະເທດ ເປັນປະທານກິຕິມະສັກ, ນອກນັ້ນ ຍັງມີບັນດາທ່ານທູດອາວຸໂສບຳນານເປັນປະທານ ແລະ ຮອງປະທານບໍລິຫານງານ ຂອງ ສະໂມສອນດ່ັງກ່າວ. ການເປີດສະໂມສອນນັກການທູດລາວຄວາມພະຍາຍາມ ແລະ ຈຸດປະສົງເປົ້າຫມາຍ ຂອງ ຄະນະພັກ-ຄະນະນຳກະຊວງການຕ່າງປະເທດ ອະດີດການນຳຂອງກະຊວງການຕ່າງປະເທດ ພ້ອມດ້ວຍບັນດາທ່ານນັກການທູດອາວຸໂສບໍານານ. ນອກຈາກນີ້, ຍັງເປັນການສ້າງກິດຈະກຳ ເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ທີ່ຈະຈັດຂື້ນໃນຕົ້ນປີໜ້ານີ້, ຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງການຕ່າງປະເທດ ທີ່ຈະຈັດຂື້ນໃນມໍ່ໆນີ້ ແລະ ສະເຫລີມສະຫລອງວັນການ ທູດລາວຄົບຮອບ 75 ປີ ໃນວັນທີ 12 ຕຸລາ 2020.
ນອກຈາກນີ້, ສະຖາບັນການຕ່າງປະເທດ ຍັງໄດ້ເປີດຕົວປຶ້ມ “ແນວຄວາມຄິດຊີ້ນຳຕໍ່ວຽກງານການຕ່າງປະເທດ ຂອງປະທານ ຄຳໄຕ ສີພັນດອນ”, ການຂຽນປື້ມດັ່ງກ່າວ ແມ່ນການລະນຶກເຖິງຄຸນ ງາມຄວາມດີ ແລະ ການສຶກສາຮຽນຮູ້ກ່ຽວກັບວິລະກຳອັນປະເສີດບັນດາບົດຮຽນ, ພຶດຕິກຳຕົວຈິງ ແລະ ການນຳພາຊີ້ນຳ ຂອງ ທ່ານ ປະທານ ຄຳໄຕ ສີພັນດອນ ໂດຍສະເພາະດ້ານວຽກງານການຕ່າງ ປະເທດ ເພື່ອແນໃສ່ໃຫ້ນັກການທູດລາວ ແລະ ຄົນຮຸ້ນຫຼັງໄດ້ນຳມາໜູນໃຊ້ໃຫ້ສອດຄ່ອງກັບຍຸກສະ ໄໝໃໝ່ ຂອງ ພາກພື້ນ ແລະ ຂອງໂລກປັດຈຸບັນ.