ໃນວັນທີ 03 ມີນາ 2020, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ປີເຕີ ເຮມ໋ອນ (Peter M. Haymond), ເອກອັກຄະລັດຖະທູດ ແຫ່ງ ສະຫະລັດ ອາເມຣິກາ ຄົນໃໝ່ ປະຈຳ ສປປ ລາວ.
ໃນໂອກາດການພົບປະໂອ້ລົມຄັ້ງນີ້, ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານທູດ ປີເຕີ ເຮມ໋ອນ (Peter M. Haymond) ທີ່ໄດ້ຮັບການແຕ່ງຕັ້ງເປັນ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສະຫະລັດ ອາເມຣິກາ ປະຈຳ ສປປ ລາວ, ພ້ອມທັງສະແດງຄວາມເຊື່ອໝັ້ນວ່າ ໃນໄລຍະການປະຕິບັດໜ້າທີ່ວຽກງານການທູດດັ່ງກ່າວ, ທ່ານທູດ ໃນຖານະເປັນຜູ້ທີ່ຮູ້ຈັກປະເທດລາວດີ ຈະປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍ ແລະ ເພີ່ມທະວີການພົວພັນຮ່ວມມື ລະຫວ່າງສອງປະເທດ ໃຫ້ນັບມື້ນັບເຂັ້ມແຂງ ແລະ ຂະຫຍາຍຕົວຍິ່ງໆຂຶ້ນ. ໃນໂອກາດດຽວກັນນີ້ ທ່ານທູດ ປີເຕີ ເຮມ໋ອນ ກໍໄດ້ກ່າວສະແດງຄວາມພາກພູມໃຈເປັນຢ່າງຍິ່ງ ທີ່ໄດ້ຖືກແຕ່ງຕັ້ງມາດໍາລົງຕໍາແໜ່ງເປັນ ເອກອັກຄະລັດຖະທູດ ປະຈໍາ ສປປ ລາວ ເຊິ່ງເປັນປະເທດທີ່ຕົນເອງເຄີຍມາປະຕິບັດໜ້າທີ່ການທູດ 3 ຄັ້ງແລ້ວ. ພ້ອມກັນນັ້ນ, ທ່ານທູດຍັງໄດ້ຢືນຢັນວ່າ ຈະຕັ້ງໜ້າປະຕິບັດໜ້າທີ່ຢ່າງສຸດຄວາມສາມາດ ເພື່ອປະກອບສ່ວນເຂົ້າໃນການເພີ່ມທະວີຮັດແໜ້ນ ແລະ ເສີມຂະຫຍາຍການພົວພັນຮ່ວມມື ລະຫວ່າງສອງປະເທດ ໃຫ້ມີບາດກ້າວຂະຫຍາຍຕົວຢ່າງບໍ່ຢຸດຢັ້ງ.
ນອກຈາກນີ້, ທັງສອງຝ່າຍ ຍັງໄດ້ຕີລາຄາສູງ ຕໍ່ການພົວພັນຮ່ວມມືສອງຝ່າຍ ລາວ-ອາເມຣິກາ ເຊິ່ງເຫັນວ່າ ໄດ້ມີການຂະຫຍາຍຕົວຢ່າງຕໍ່ເນື່ອງ ເຖິງວ່າຈະມີອຸປະສັກເລັກນ້ອຍໃນບາງດ້ານກໍ່ຕາມ, ໂດຍສະເພາະແມ່ນ ນັບຕັ້ງແຕ່ການຢ້ຽມຢາມຢ່າງທາງການຂອງ ປະທານາທິບໍດີ ໂອບາມາ ໃນປີ 2016 ເຊິ່ງໄດ້ຍົກລະດັບການພົວພັນສອງຝ່າຍຂື້ນ ເປັນຄູ່ຮ່ວມມືແບບກວມລວມ (Comprehensive Partnership), ອັນເປັນພື້ນຖານທີ່ສໍາຄັນໃນການເສີມສ້າງການພົວພັນຮ່ວມມື ລະຫວ່າງສອງປະເທດ ໃຫ້ເຂັ້ມແຂງ ແລະ ແຕກດອກອອກຜົນຍິ່ງໆ ໃນອານາຄົດ. ພ້ອມດຽວກັນນັ້ນ, ສອງຝ່າຍ ຍັງໄດ້ມີການແລກປ່ຽນຄໍາຄິດຄໍາເຫັນ ກ່ຽວກັບ ການຮ່ວມມືໃນຂອບຫຼາຍຝ່າຍ, ເປັນຕົ້ນແມ່ນ ລະຫວ່າງອາຊຽນ ແລະ ສະຫະລັດ ອາເມຣິກາ, ໃນຖານະທີ່ ສປປ ລາວ ເປັນຜູ້ປະສານງານການຮ່ວມມືຄູ່ເຈລະຈາ ອາຊຽນ-ອາເມຣິກາ ກໍຄື ກ່ຽວກັບສະພາບ ແລະ ການຮ່ວມມື ເພື່ອການສະກັດກັ້ນການແຜ່ລະບາດຂອງພະຍາດອັກເສບປອດ ສາຍພັນໃຫ່ມ ຫຼື COVID-19 ແລະ ອື່ນໆ.
ໃນຕອນທ້າຍ, ທ່ານລັດຖະມົນຕີກະຊວງການຕ່າງປະເທດລາວເຮົາ, ໄດ້ອວຍພອນໃຫ້ແກ່ ທ່ານເອກອັກຄະລັດຖະທູດ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ຢ່າງຈົບງາມ.