ໃນວັນທີ 08 ກໍລະກົດ 2019, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດິນກາ ອາດສະທານາ (Dinkar Asthana), ໃນໂອກາດທີ່ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອິນເດຍ ປະຈໍາ ສປປ ລາວ ຄົນໃໝ່.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ທ່ານ ດິນກາ ອາດສະທານາ ທີ່ໄດ້ຖືກແຕ່ງຕັ້ງມາເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ. ອິນເດຍ ປະຈຳ ສປປ ລາວ, ພ້ອມທັງ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ - ສ. ອິນເດຍ ພາຍຫຼັງໄດ້ສ້າງຕັ້ງສາຍພົວພັນການທູດຮ່ວມກັນ ຄົບຮອບ 60 ກວ່າປີ (02 ກຸມພາ 1956-2019), ການນໍາຂອງສອງປະເທດ ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ໃນໂອກາດທີ່ສຳຄັນຕ່າງໆ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບ ລະຫວ່າງ ສອງປະເທດ ໃຫ້ນັບມື້ແໜ້ນແຟ້ນຍິ່ງຂຶ້ນ. ໃນໄລຍະຜ່ານມາ, ລັດຖະບານ ແລະ ປະຊາຊົນອິນເດຍ ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຫຼາຍດ້ານ ເປັນຕົ້ນແມ່ນ ການຊ່ວຍເຫຼືອໃຫ້ເງິນກຸ້ຢືມດອກເບ້ຍຕ່ຳໃນຫຼາຍໂຄງການ, ການພັດທະນາຊັບພະຍາກອນມະນຸດ ແລະ ວຽກງານປ້ອງກັນຊາດ. ດ້ານການຄ້າ-ການລົງທຶນສອງຝ່າຍ ແມ່ນມີທ່ວງທ່າດີຂຶ້ນເລື້ອຍໆ ຊຶ່ງໃນປີ 2016-2017 ມູນຄ່າການຄ້າສອງຝ່າຍມີປະມານ 200 ລ້ານໂດລາສະຫະລັດ ແລະ ສະເໜີໃຫ້ສືບຕໍ່ຊຸກຍູ້ຂະຫຍາຍການຮ່ວມມືການຄ້າ-ການລົງທຶນ ໃຫ້ຫຼາຍຂຶ້ນ ໂດຍສະເພາະແມ່ນການຊຸກຍູ້ບັນດານັກທຸລະກິດ ອິນເດຍ ມາລົງຢູ່ ສປປ ລາວ ໃຫ້ຫຼາຍຂຶ້ນ ໂດຍສະເພາະແມ່ນໃນຂົງເຂດກະສິກຳປຸງແຕ່ງ, ພະລັງງານ,ການບໍລິການດ້ານການທ່ອງທ່ຽວ, ທຸລະກິດຂະໜາດນ້ອຍ ແລະ ກາງ, ເຕັກໂນໂລຊີຂໍ້ມູນຂ່າວສານ ແລະ ບັນດາຂົງເຂດອື່ນໆທີ່ເປັນທ່າແຮງຂອງສອງຝ່າຍ. ໃນຕົ້ນປີ 2019 ນີ້, ສປປ ລາວ ແລະ ສ.ອິນເດຍ ໄດ້ລົງນາມໃນສັນຍາ ວ່າດ້ວຍ ການຂົນສົ່ງທາງອາກາດ, ຊຶ່ງໄດ້ເປັນພື້ນຖານໃຫ້ແກ່ການເປີດກວ້າງການໄປມາຫາສູ່ກັນ ລະຫວ່າງ ປະຊາຊົນສອງປະເທດ ໃຫ້ຫຼາຍຂຶ້ນໃນອະນາຄົດ, ຊຶ່ງໃນປີ 2018 ຜ່ານມາ ໄດ້ມີນັກທ່ອງທ່ຽວຈາກ ອິນເດຍ ຈຳນວນ 4,864 ເທື່ອຄົນ ເຂົ້າມາຢ້ຽມຢາມລາວ. ນອກຈາກນີ້, ສປປ ລາວ ແລະ ສ. ອິນເດຍ ຍັງໄດ້ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ກໍ່ຄື ໃນຂອບຂອງເວທີສະຫະປະຊາຊາດ. ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນ ອິນເດຍ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ ແລະ ຫວັງວ່າ ໃນໄລຍະທີ່ ທ່ານ ດິນກາ ອາດສະທານາ ປະຕິບັດໜ້າທີ່ເປັນເອກອັກຄະລັດຖະທູດ ປະຈຳ ສປປ ລາວ ຈະເປັນຂົວຕໍ່ອັນສຳຄັນ ເພື່ອເຮັດໃຫ້ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ລາວ-ອິນເດຍ ມີການຂະຫຍາຍຕົວຍິ່ງໆຂຶ້ນໃນອະນາຄົດ ແລະ ອວຍພອນໃຫ້ ທ່ານເອກອັກຄະລັດຖະທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ດ້ວຍຜົນສໍາເລັດອັນຈົບງາມ.
ໃນຂະນະດຽວກັນ, ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ສະເຫຼີມໄຊ ກົມມະສິດ ທີ່ໃຫ້ການຕ້ອນຮັບອັນອົບອຸ່ນ, ແລະ ສະແດງຄວາມໝັ້ນໝາຍວ່າ ຈະປະຕິບັດສຸດຄວາມສາມາດຂອງຕົນ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ໃຫ້ນັບມື້ຈະເລີນງອກງາມຍິ່ງໆຂຶ້ນ ແລະ ມີບາດກ້າວອັນໃໝ່ໃນອະນາຄົດ.