ໃນວັນທີ 24 ມິຖຸນາ 2019, ທ່ານ ສະ​ເຫຼີ​ມ​ໄຊ ກົມມະ​ສິດ, ລັດ​ຖະມົນຕີ​ກະຊວງ​ການ​ຕ່າງປະ​ເທດ​ ແຫ່ງ ສປປ ລາວ ໄດ້​ຕ້ອນຮັບ​ ທ່ານ Dr. Mohamad Maliki Bin Osman, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ​ ແລະ ກະຊວງ​ປ້ອງ​ກັນ​ປະ​ເທດ ແຫ່ງ ສາທາລະນະ​ລັດ ສິງກະ​ໂປ ພ້ອມຄະນະ ເຊີ່ງທັງສອງຝ່າຍໄດ້ແລກປ່ຽນຄໍາຄິດເຫັນ ກ່ຽວກັບການເສີມຂະຫຍາຍສາຍ​ພົວພັນ ​ແລະ ການ​ຮ່ວມມື​ສອງ​ຝ່າຍ, ລວມທັງ​​ການຈັດ​ຕັ້ງ​ປະຕິບັດ​ບັນດາ​ກິດຈະກຳ​ຂອງ​ສູນ​ຝຶກ​ອົບຮົມ​ ລາວ-ສິງກະ​ໂປ ຊຶ່ງ​ບັນດາ​ຜູ້​ນໍາ​ອາ​ຊຽນ​ໄດ້​ເຫັນ​ດີ​ໃຫ້​ສ້າງ​ຕັ້ງຂື້ນເລີ່ມແຕ່ປີ 2001 ​ພາຍ​ໃຕ້​ຂໍ້​ລິ​ເລີ່​ມ ​ເພື່ອ​ການ​ເຊື່ອມ​ໂຍງ​ອາ​ຊຽນ​ໃຫ້​ບັນ​ປະ​ເທດ​ສະມາ​ຊິກ​ອາ​ຊຽນ​ໃໝ່ຄື: ກຳປູ​ເຈຍ, ສປປ ລາວ, ມຽນມາ ​ແລະ ຫວຽດນາມ. ພ້ອມດຽວກັນນີ້ ທ່ານລັດຖະມົນຕີ ສະເຫລີມໄຊ ກົມມະສິດ ກໍ່ໄດ້ສະແດງຄວາມຂອບໃຈ ຕໍ່ການຮ່ວມມື ແລະ ໃຫ້ການຊ່ວຍເຫລືອໃນຜ່ານມາໂດຍສະເພາະແມ່ນການຊ່ວຍເຫລືອໃນໄລຍະທີ່ ສປປ ລາວ ປະສົບໄພພິບັດທີ່ເມືອງສະໝາມໄຊ, ແຂວງອັດຕະປືໃນປີຜ່ານມາ.

​ໃນ​ຕອນ​ແລງຂອງວັນດຽວກັນ, ທ່ານ ທອງ​ຜ່ານ ສະຫວັນເພັດ,​ ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ​ໄດ້​ເຂົ້າ​ຮ່ວມ​ພິທີ​ເປີດ​ສູນ​ຮ່ວມ​ມື​ລາວ-ສິງກະ​​ໂປ ຢ່າງ​ເປັນ​ທາງ​ການ ຮ່ວມ​ກັບ ທ່ານ Dr. Mohamad Maliki Bin Osman, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ແລະ ກະຊວງ​ປ້ອງ​ກັນ​ປະ​ເທດ ແຫ່ງ ສາທາລະນະ​ລັດ ສິງກະ​ໂປ. ຈຸດປະສົງ​ຂອງ​ການ​ເປີດ​ສູນ​ຄັ້ງ​ນີ້ ​ແມ່ນ​ເພື່ອ​ຍົກ​ລະດັບ​ບົດບາດ​ຂອງ​ສູນ ​ແລະ ​ເພີ່ມ​ທະວີການ​ຮ່ວມ​ມືດ້ານການ ຝຶກອົບຮົມ ​ໃນ​ຂອບ​ທີ່​ກວ້າງ​ກວ່າ​ເກົ່າ ໂດຍ​​ປ່ຽນ​ຊື່​ຈາກ​ສູນ​ຝຶກ​ອົບຮົມ​ລາວ-ສິງກະ​ໂປ ໃນເມື່ອກ່ອນ, ມາ​ເປັນ ​ສູນ​ຮ່ວມ​ມື​ລາວ-ສິງກະ​ໂປ.