ສປປ ລາວ-ສາທາລະນະລັດ ຊັງມາຣີໂນ ໄດ້ລົງນາມຖະແຫຼງການຮ່ວມວ່າດ້ວຍ ການສ້າງຕັ້ງສາຍພົວພັນການທູດລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທະລະນະລັດ ຊັງມາຣີໂນ ໃນວັນທີ 28 ກັນຍາ 2018 ທີ່ ສຳນັກງານໃຫຍ່ອົງການສະຫະປະຊາຊາດ, ນິວຢອກ, ສະຫະລັດອາເມລິກາ.

ການລົງນາມຖະແຫຼງການຮ່ວມຄັ້ງນີ້ຕາງໜ້າໃຫ້ລັດຖະບານແຫ່ງ ສປປ ລາວ ໂດຍ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຕາງໜ້າໃຫ້ລັດຖະບານສາທາລະນະລັດ    ຊັງມາຣີໂນ ແມ່ນ ທ່ານ ນິໂກລາ ເຣັນຊີ, ລັດຖະມົນຕີກະຊວງການຕ່າງປະເທດ ແລະ ການເມືອງ ແຫ່ງ ສາທາລະນະລັດ ຊັງມາຣີໂນ; ການລົງນາມສ້າງຕັ້ງສາຍພົວພັນການທູດໃນຄັ້ງນີ້, ເປັນບາດລ້ຽວສໍາຄັນທັງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການພົວພັນຮ່ວມມືລະຫວ່າງ ສປປ ລາວ ແລະ ສາທາລະນະລັດ ຊັງມາຣີໂນ ໃນອະນາຄົດ. ພາຍຫຼັງສຳເລັດຂັ້ນຕອນພາຍໃນທາງດ້ານກົດໝາຍຂອງທັງສອງປະເທດແລ້ວ ຈຶ່ງໄດ້ຕົກລົງເຫັນດີ ຖືເອົາວັນທີ 17 ທັນວາ 2018 ເປັນວັນສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຊັງມາຣີໂນ. ສາທາລະນະລັດ ຊັງມາຣີໂນ ເປັນປະເທດທີ 141 ທີ່ ສປປ ລາວ ມີສາຍພົວພັນການທູດ ຈາກຈຳນວນປະເທດສະມາຊິກອົງການສະຫະປະຊາຊາດທັງໝົດ 193 ປະເທດ ໃນທົ່ວໂລກ.

          ປະເທດຊັງມາຣີໂນ ເຂົ້າເປັນສະມາຊິກຂອງອົງການ ສປຊ ໃນວັນທີ 02 ມີນາ 1992 ແລະ ເປັນປະເທດນ້ອຍອັນດັບທີສາມ ໃນທະວີບເອີຣົບ, ບໍ່ມີຊາຍແດນຕິດກັບທະເລ ໂດຍອ້ອມຮອບດ້ວຍປະເທດອີຕາລີ, ມີເນື້ອທີ່ທັງໝົດ 61,2 ກິໂລຕາແມັດ ມີປະຊາກອນ 33,779ຄົນ, ໃນນັ້ນ 97 % ນັບຖືສາສະໜາກາໂຕລິກ, ພາສາທາງການພາສາອີຕາລີ, ນະຄອນຫຼວງ ຊັງມາຣີໂນ, ໄດ້ຮັບເອກະລາດຈາກ ຈັກກະພັດໂຣມັນ ໃນວັນທີ 03 ກັນຍາ ຄສ 301, ບໍ່ໄດ້ເປັນສະມາຊິກສະຫະພາບເອີຣົບ ແຕ່ນຳໃຊ້ສະກຸນເງິນເອີໂຣ. ອົງການຫຼັກຂອງປະເທດປະກອບດ້ວຍ ອົງການນິຕິບັນຍັດ, ອົງການບໍລິຫານ ແລະ ອົງການຕຸລາການ. ລະບອບການເມືອງປະກອບດ້ວຍ 02 ພັກໃຫຍ່ຄື : ພັກຊາມມາຣີນີສ໌ ຄຣິດສ໌ຕຽນ ປະຊາທິປະໄຕ (Sammarinese Christian Democratic Party) ແລະ ພັກ ປະຊາທິປະໄຕສັງຄົມນິຍົມ (Party of Socialists and Democrats). ປະເທດຊັງມາຣີໂນ ເປັນປະເທດທີ່ມີເສດຖະກິດໃນລະດັບທີ່ໝັ້ນທ່ຽງ, ລາຍໄດ້ສະເລ່ຍ 59,900  ໂດລສະຫະລັດ ຕໍ່ຄົນ (2017), ມີອັດຕາການວ່າງານຕໍ່າທີ່ສຸດໃນເອີຣົບ, ບໍ່ມີໜີ້ສິນ ແລະ ຂະແໜງເສດຖະກິດທີ່ສຳຄັນແມ່ນ ການບໍລິຫານດ້ານການເງິນ ແລະ ທະນາຄານ, ອຸດສະຫະກຳ ແລະ ທ່ອງທ່ຽວ, ມີສາຍພົວພັນການທູດກັບ 95 ປະເທດ.