ໃນຕອນບ່າຍຂອງ ວັນທີ 28 ກັນຍາ 2018 ຢູ່ ສຳນັກງານໃຫ່ຍຂອງອົງການສະຫະປະຊາຊາດ ທີ່ ນິວຢອກ, ສະຫະລັດ ອາເມລິກາ, ທ່ານ ສະເຫຼີມໄຊ ກົມມະສິດ ໄດ້ນໍາພາ ຄະນະຜູ້ແທນລາວ ເຂົ້າຮ່ວມ ກອງປະຊຸມລັດຖະມົນຕີຕ່າງປະເທດອາຊຽນ ແບບບໍ່ເປັນທາງການ. ກອງປະຊຸມໄດ້ປຶກສາຫາລືກ່ຽວກັບວຽກງານປະຊາຄົມອາຊຽນ ເຊັ່ນ: ການສະເໜີສ້າງຕັ້ງສູນອາຊຽນ ເພື່ອການສຶກສາ ແລະ ປຶກສາຫາລື ກ່ຽວກັບ ການພັດທະນາແບບຍືນຍົງ ຊຶ່ງເປັນໜຶ່ງໃນບູລິມະສິດຂອງໄທ ສໍາລັບການເປັນປະທານອາຊຽນໃນປີ 2019 ແລະ ການສະຫມັກຂອງບັນດາປະເທດເຂົ້າເປັນພາຄີສົນທິສັນຍາ ວ່າດ້ວຍໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້. ພ້ອມນີ້, ກໍໄດ້ປຶກສາຫາລືກ່ຽວກັບການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 33 ແລະ ບັນດາກອງປະຊຸມສຸດຍອດອື່ນໆທີ່ກ່ຽວຂ້ອງ ຊຶ່ງຈະຈັດຂຶ້ນໃນລະຫວ່າງວັນທີ 14-15 ພະຈິກ 2018 ທີ່ ສິງກະໂປ ແລະ ບັນຫາອື່ນໆ ທີ່ມີຄວາມສົນໃຈຮ່ວມກັນ.

ໃນຕອນບ່າຍຂອງວັນດຽວກັນ, ທ່ານ ສະເຫລີມໄຊ ກົມມະສິດ ພ້ອມດ້ວຍຄະນະ ກໍໄດ້ສືບຕໍ່ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ກັບ ເລຂາທິການໃຫຍ່ອົງການສະຫະປະຊາຊາດ ແລະ ປະທານ ກອງປະຊຸມສະມັດຊາໃຫຍ່ສະຫະປະຊາຊາດ ສະໄໝທີ 73. ກອງປະຊຸມໄດ້ ຕີລາຄາຄືນກ່ຽວກັບການຮ່ວມມື ລະຫວ່າງ ອາຊຽນ ແລະ ອົງການສະຫະປະຊາຊາດ ໃນໄລຍະ 1 ປີຜ່ານມາ ໂດຍສະເພາະແມ່ນ ການຈັດຕັ້ງຜັນຂະຫຍາຍ ຜົນຂອງກອງປະຊຸມສຸດຍອດ ອາຊຽນ-ສະຫະປະຊາຊາດ ຄັ້ງທີ 9, ບັນດາກິດຈະກຳຮ່ວມມືພາຍໃຕ້ແຜນປະຕິບັດງານອາຊຽນ-ສະຫະປະຊາຊາດ ໄລຍະປີ 2016-2020, ວິໄສທັດປະຊາຄົມອາຊຽນປີ 2025 ແລະ ວາລະການພັດທະນາແບບຍືນຍົງ 2030 ຂອງສະຫະປະຊາຊາດ. ໃນນີ້, ທ່ານ ລັດຖະມົນຕີ ສະເຫລີມໄຊ ກົມມະສິດ ໄດ້ຍົກໃຫ້ເຫັນບັນຫາລະເບີດບໍ່ທັນແຕກ ທີ່ຍັງຕົກຄ້າງຢູ່ ສປປລາວ ຊຶ່ງເປັນໄພອັນຕະລາຍ ແລະ ເປັນອຸປະສັກກີດຂວາງຕໍ່ການພັດທະນາ ຂອງ ສປປ ລາວ ແລະ ທ່ານ ລັດຖະມົນຕີຕ່າງປະເທດ ສປປ ລາວ ກໍ່ໄດ້ສະເໜີໃຫ້ ອົງການສະຫະປະຊາຊາດ ສືບຕໍ່ຮ່ວມມືຊ່ວຍເຫຼືອການຈັດຕັ້ງປະຕິບັດ SDG 18 ເຊິ່ງເປັນການແກ້ໄຂບັນຫາລະເບີດບໍ່ທັນແຕກຕົກຄ້າງ. ນອກນັ້ນ, ກອງປະຊຸມຍັງໄດ້ແລກປ່ຽນຄຳຄິດເຫັນກ່ຽວກັບບັນຫາ ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເຊັ່ນ ສະພາບການໃນແຫຼມເກົາຫຼີ, ການກໍ່ການຮ້າຍ, ສະພາບການໃນທະເລຈີນໃຕ້ ແລະ ສະພາບການປ່ຽນແປງຂອງດິນຟ້າອາກາດ.

ໃນໂອກາດນີ້, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ລະຫວ່າງອາຊຽນ ກັບກຸ່ມພັນທະມິດປາຊີຟິກ (ASEAN-Pacific Alliance) ແລະ ກອງປະຊຸມລັດຖະມົນຕີການຕ່າງປະເທດ ລະຫວ່າງ ອາຊຽນ ກັບ ອົງການຮ່ວມມືອ່າວ (ASEAN-Gulf Cooperation Council) ຊຶ່ງສອງກອງປະຊຸມດັ່ງກ່າວ ໄດ້ເນັ້ນຢໍ້າການຮ່ວມມື ເພື່ອສົ່ງເສີມການຮ່ວມມືດ້ານການຄ້າ, ການລົງທຶນ, ການເຊື່ອມຈອດລະຫວ່າງພາກພື້ນ, ການຖ່າຍທອດເຕັກໂນໂລຊີ, ການສຶກສາ, ການທ່ອງທ່ຽວ ແລະ ການໄປມາຫາສູ່ ລະຫວ່າງປະຊາຊົນສອງພາກພື້ນ.