ພາຍຫຼັງສຳເລັດການເຄື່ອນໄຫວຢ້ຽມຢາມຢູ່ ນະຄອນຫຼວງຮ່າໂນ້ຍ ແລ້ວ, ຕອນແລງຂອງວັນທີ 20 ທັນວາ 2017, ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ພ້ອມດ້ວຍຄະນະຜູ້ແທນຂັ້ນສູງ ພັກ, ລັດ ສປປ ລາວ ໄດ້ສືບຕໍ່ຢ້ຽມຢາມ ແຂວງເຫງະອານ.

ຕອນຄ່ຳຂອງວັນດຽວກັນ, ສະຫາຍ ຫງວຽນ ດັກ ວິງ, ກຳມະການສູນກາງພັກ, ເລຂາຄະນະພັກ ແຂວງເຫງະອານ ໄດ້ເຂົ້າຢ້ຽມຂ່ຳນັບ ແລະ ລາຍງານຕໍ່ ສະຫາຍ ບຸນຍັງ ວໍລະຈິດ ກ່ຽວກັບ ສະພາບການອັນພົ້ນເດັ່ນຂອງການພັດທະນາຂອງແຂວງເຫງະອານ, ການພົວພັນຮ່ວມມືລະຫວ່າງ 2 ປະເທດ ເວົ້າລວມ, ລະຫວ່າງ ແຂວງເຫງະອານກັບບັນດາແຂວງຂອງລາວ ເວົ້າສະເພາະ, ໂດຍສະເພາະການພົວພັນຮ່ວມມືຊ່ວຍເຫຼືອຂອງແຂວງເຫງະອານ ໃຫ້ບັນດາແຂວງແຮກສ່ຽວຂອງລາວ ຄື: ຊຽງຂວາງ, ຫົວພັນ, ບໍລິຄຳໄຊ; ໄດ້ແຈ້ງໃຫ້ຄະນະຜູ້ແທນລາວຊາບ ກ່ຽວກັບ ການເຄື່ອນໄຫວໃນກອບປີສາມັກຄີມິດຕະພາບ ແລະ ໄດ້ຢືນຢັນຈະສືບຕໍ່ຮ່ວມມືກັບຝ່າຍລາວ ໃນການປົກປັກຮັກສາສາຍພົວພັນພິເສດ ຫວຽດນາມ-ລາວ ໃຫ້ນັບມື້ນັບສວຍສົດງົດງາມຕະຫຼອດໄປ.

ພາຍຫຼັງເຂົ້າຢ້ຽມຂ່ຳນັບ ສະຫາຍເລຂາທິການໃຫຍ່, ປະທານປະເທດ ແລ້ວ, ສະຫາຍ ຫງວຽນ ດັກ ວິງ ພ້ອມດ້ວຍຄະນະນຳຂອງແຂວງ ໄດ້ຈັດງານລ້ຽງຕ້ອນຮັບຄະນະຜູ້ແທນຂັ້ນສູງຂອງລາວ ຢ່າງສົມກຽດ ແລະ ເຕັມໄປດ້ວຍຄວາມສະໜິດສະໜົມຖານສະຫາຍອ້າຍນ້ອງ.

ຕອນເຊົ້າຂອງວັນທີ 21 ທັນວາ 2017, ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໄດ້ໄປຢ້ຽມຢາມບ້ານເກີດຂອງປະທານ ໂຮ່ຈິມິນ ທີ່ຕາແສງນາດ໋າຍ ແລະ ໄດ້ມີການຂຽນຄວາມຮູ້ສຶກເຊິ່ງບາງຕອນມີເນື້ອໃນວ່າ: ຂ້າພະເຈົ້າມີຄວາມຮູ້ສຶກພາກພູມໃຈເປັນຢ່າງຍິ່ງ ທີ່ໄດ້ມີໂອກາດນຳພາຄະນະຜູ້ແທນຂັ້ນສູງຂອງພັກ, ລັດ ແຫ່ງ ສປປ ລາວ ມາຢ້ຽມຢາມເຂດອານຸສອນສະຖານບ້ານເກີດ ປະທານ ໂຮ່ຈິມິນ ຜູ້ຍິ່ງໃຫ່ຍ ເຊິ່ງເປັນຜູ້ກໍ່ຕັ້ງ ແລະ ຝຶກຝົນຫຼໍ່ຫຼອມພັກກອມມູນິດອິນດູຈີນ ເຊິ່ງເປັນຕົ້ນກໍາເນີດຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ.

          ພວກຂ້າພະເຈົ້າຮູ້ສຶກຊາບຊື້ງເປັນຢ່າງຍິ່ງ ທີ່ຈາກສະຖານທີ່ທີ່ສັກກະລະບູຊາແຫ່ງນີ້ໃຫ້ກຳເນີດນັກປະຕິວັດ ຜູ້ກ້າແກ່ນ, ຜູ້ເຊິ່ງໄດ້ມີການອຸທິດທັງກາຍ, ສະຕິປັນຍາຂອງເພີ່ນ ບໍ່ສະເພາະແຕ່ເພື່ອປະເທດຊາດ, ເພື່ອປະຊາຊົນຫວຽດນາມ ອ້າຍນ້ອງ ແລະ ປະຊາຊົນທົ່ວອິນດູຈີນ ເທົ່ານັ້ນແຕ່ ປະທານ ໂຮ່ຈິມິນ ຍັງໄດ້ເປັນຜູ້ກໍ່ຕັ້ງ, ຖະໜຸຖະໜອມ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຍີ່ງໃຫຍ່, ຄວາມສາມັກຄີແບບພິເສດການຮ່ວມມືຮອບດ້ານ ລາວ-ຫວຽດນາມ ທີ່ເປັນການພົວພັນທີ່ຫາຍາກ ແລະ ມີພຽງໜຶ່ງດຽວໃນໂລກ ທີ່ຖືກສ້າງຂື້ນດ້ວຍເລືອດເນື້ອ ແລະ ເຫື່ອໄຄຂອງປະຊາຊົນສອງຊາດ ລາວ-ຫວຽດນາມ ໄດ້ກາຍເປັນມໍລະດົກລວມທີ່ລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງຊາດ, ເປັນປັດໃຈໜຶ່ງຕັດສິນໄຊຊະນະຂອງແຕ່ລະປະເທດ.

          ພວກຂ້າພະເຈົ້າຈະຂໍຈົດຈໍາບຸນຄຸນອັນລໍ້າເລີດຂອງ ປະທານ ໂຮ່ຈິມິນ, ຈະຮ່ວມກັບປະຊາຊົນ ຫວຽດນາມ ປົກປັກຮັກສາສາຍພົວພັນພິເສດນັ້ນໃຫ້ນັບມື້ນັບຈະເລີນງອກງາມຍີ່ງໆຂື້ນ ເພື່ອຜົນປະໂຫຍດຂອງສອງຊາດ ລາວ-ຫວຽດນາມ. ປະທານ ໂຮ່ຈິມິນ ຍືນຍົງໃນພາລະກິດຂອງພວກເຮົາຕະຫຼອດໄປ.

ໃນໂອກາດດຽວກັນນີ້, ສະຫາຍເລຂາທິການໃຫຍ່ ປະທານປະເທດ ບຸນຍັງ ວໍລະຈິດ ແລະ ຄະນະ ກໍ່ໄດ້ໄປຢ້ຽມເຮືອນຊົງລາວ ທີ່ລັດຖະບານລາວ ມອບເປັນຂອງຂວັນໃຫ້ແກ່ ອານຸສອນສະຖານໂຮ່ຈິມິນ.

ຕອນບ່າຍຂອງວັນດຽວກັນ, ສະຫາຍເລຂາທິການໃຫຍ່, ປະທານປະເທດ ໄດ້ໄປຢ້ຽມຢາມກອງບັນຊາການທະຫານເຂດ 4 ໂດຍໄດ້ຮັບການຕ້ອນຮັບຢ່າງອົບອຸ່ນ, ສົມກຽດຈາກ ນາຍ ແລະ ພົນທະຫານ ກອງບັນຊາການທະຫານເຂດ 4 ແລະ ໄດ້ໂອ້ລົມບັນດານາຍ ແລະ ພົນທະຫານເຂດ 4 ໂດຍໄດ້ຕີລາຄາຜົນສໍາເລັດອັນໃຫຍ່ຫລວງຮອບດ້ານຂອງກອງບັນຊາການທະຫານເຂດ 4 ທີ່ຍາດມາໄດ້ຕະຫລອດໄລຍະທີ່ຜ່ານມາ, ປະກອບສ່ວນເຮັດໃຫ້ກອງທັບປະຊາຊົນຫວຽດນາມນັບມື້ນັບມີຄວາມເຂັ້ມແຂງ, ສົມເປັນຮົ້ວປ້ອງກັນປະເທດຊາດຫວຽດນາມ ວິລະຊົນ, ສົມເປັນທະຫານລຸງໂຮ່ໃນຍຸກໃຫມ່, ປະກອບສ່ວນອັນໃຫຍ່ຫລວງ, ການການເສຍສະຫລະອັນສູງສົ່ງຂອງກອງທັບ ແລະ ປະຊາຊົນຫວຽດນາມອ້າຍນ້ອງໃຫ້ແກ່ພາລະກິດປະປະຕິວັດຂອງປະຊາຊົນລາວຕະຫລອດມາ, ຊຶ່ງນັ້ນມີການປະກອບ ສ່ວນໂດຍກົງຂອງບັນບັນດານາຍ, ພົນທະຫານ ແລະ ນັກຮົບຂອງກອງບັນຊາການທະຫານເຂດ 4, ສະແດງຄວາມຊົມເຊີຍຕໍ່ຜົນງານຂອງການຮ່ວມມື ລະຫວ່າງກອງທະຫານເຂດ 4 ກັບ ສປປ ລາວ ໃນການພັດທະນາເສດຖະກິດ-ສັງຄົມ ເຂດຊາຍແດນ ແລະ ໄດ້ສະແດງຄວາມເຊື່ອໝັ້ນວ່າ ກອງທະຫານເຂດ 4 ຈະສືບຕໍ່ເສີມຂະຫຍາຍມູນເຊື້ອການພົວພັນທີ່ຫາຍາກ ລາວ-ຫວຽດນາມ ນັ້ນໃຫ້ນັບມື້ນັບມີປະສິດທິຜົນ, ນຳເອົາຜົນປະໂຫຍດໂຕຈິງມາໃຫ້ແກ່ສອງຝ່າຍ.

ສະຫາຍ ພົນຕີ ຫງວຽນ ເຕີນ ເກືອງ, ກຳມະການສູນກາງພັກ, ຫົວໜ້າກອງບັນຊາການທະຫານເຂດ 4 ໄດ້ລາຍງານໃຫ້ ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະ ຄະນະ ກ່ຽວກັບ ໝາກຜົນແຫ່ງການເຄື່ອນໄຫວ ແລະ ການພົວພັນຮ່ວມມືລະຫວ່າງ ທະຫານເຂດ 4 ກັບ ສປປ ລາວ ໃນໄລຍະຜ່ານມາ, ໂດຍໄດ້ຊີ້ໃຫ້ເຫັນວ່າ ກອງທະຫານເຂດ 4 ໄດ້ມີການຮ່ວມມືໃນການກໍ່ສ້າງຮາກຖານການເມືອງຢູ່ບາງແຂວງຂອງລາວ, ມີການປະສານສົມທົບໃນການເຄື່ອນໄຫວສະເຫຼີມສະຫຼອງ 2 ວັນປະຫວັດສາດຂອງສອງຊາດ, ໂດຍໄດ້ມີການໂຄສະນາ ກ່ຽວກັບ ມູນເຊື້ອຄວາມສາມັກຄີພິເສດ ຫວຽດນາມ-ລາວ, ມີການຊ່ວຍເຫຼືອຖ່າຍທອດບົດຮຽນ ໃນການພັດທະນາເສດຖະກິດ-ສັງຄົມ ໃຫ້ແກ່ປະຊາຊົນລາວໃນບັນດາແຂວງຂອງລາວ, ໂດຍສະເພາະແມ່ນດ້ານກະສິກຳ, ການລົບລ້າງຄວາມທຸກຍາກໃຫ້ແກ່ປະຊາຊົນ, ມີການຮ່ວມມືໃນການທ້ອນໂຮມອັດຖິນັກຮົບນິລະນາມຂອງຫວຽດນາມ ແລະ ຈັດສົ່ງກັບປະເທດ ໄດ້ເປັນຈຳນວນຫຼາຍຮ້ອຍອັດຖິ ໃນປີ 2017.

ສະຫາຍຫົວໜ້າກອງບັນຊາການທະຫານເຂດ 4 ໄດ້ຢືນຍັນຈະສືບຕໍ່ຮ່ວມກັບຝ່າຍລາວ ໃນການປະຕິບັດບັນດາສັນຍາ, ອະນຸສັນຍາຮ່ວມມືໃນວຽກງານປ້ອງກັນຊາດ ໃນໄລຍະປີ 2015-2019, ຈະສືບຕໍ່ຍົກສູງຄຸນນະພາບຂອງການຮ່ວມມື ລະຫວ່າງ ກອງບັນຊາການທະຫານເຂດ 4 ແລະ ສປປ ລາວ, ປະກອບສ່ວນເສີມຂະຫຍາຍຄວາມສາມັກຄີພິເສດ ຫວຽດນາມ-ລາວ ໃນໄລຍະໃຫມ່ ໃຫ້ນັບມື້ມີປະສິດທິຜົນ, ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ຫວຽດນາມ-ລາວ.

ພາຍຫຼັງສຳເລັດການພົບປະກັບ ນາຍ ແລະ ພົນທະຫານ ກອງບັນຊາການທະຫານເຂດ 4 ແລ້ວ, ກອງບັນຊາການທະຫານເຂດ 4 ໄດ້ຈັດງານລ້ຽງຕ້ອນຮັບ ສະຫາຍເລຂາທິການໃຫຍ່, ປະທານປະເທດ ແລະ ຄະນະ ໃນຄັ້ງນີ້ຕື່ມອີກດ້ວຍ.