ໃນວັນທີ 25 ພຶດສະພາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂມດ ໄອນີ ອາຕັນ ( Mohd Aini Atan ), ໃນ​ໂອ​ກາດໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ມາເລເຊຍ ປະຈຳ ສປປ ລາວ ຄົນໃໝ່.

ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະ​ແດງ​ຄວາມ​ຍິນດີຕ້ອນຮັບ ແລະ ຊົມເຊີຍຕໍ່ ທ່ານ ໂມດ ໄອນີ ອາຕັນ ທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ມາເລເຊຍ ປະຈຳ ສປປ ລາວ, ພ້ອມ​ທັງ​ ສະແດງຄວາມເຊື່ອໝັ້ນວ່າ ໃນໄລຍະເວລາທີ່ດໍາລົງຕໍາແໜ່ງຢູ່ ສປປ ລາວ, ທ່ານທູດ ໂມດ ໄອນີ ອາຕັນ ຈະສືບຕໍ່ເຄື່ອນໄຫວຊຸກຍູ້ສົ່ງເສີມການພົວພັນຮ່ວມມື ລະຫວ່າງ ລາວ ແລະ ມາເລເຊຍ ໃຫ້ນັບມື້ນັບຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ. ພ້ອມນັ້ນ, ກໍ​ໄດ້ສະແດງຄວາມຂອບໃຈຕໍ່ລັດຖະບານມາເລເຊຍຕໍ່ການຕ້ອນຮັບຢ່າງອົບອຸ່ນໃນການຢ້ຽມຢາມມາເລເຊຍ ຢ່າງເປັນທາງການ ຂອງພະນະ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວໃນວັນ​ທີ 09-10 ພຶດສະພາ ຜ່ານ​ມາ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນວັນທີ 16-18 ມີນາ 2017, ພິເສດຕໍ່ການຊ່ວຍເຫຼືອສະໜັບສະໜູນ ສປປ ລາວ ຂອງລັດຖະບານມາເລເຊຍ ໃນຫຼາຍດ້ານ ໂດຍສະເພາະດ້ານການພັດທະນາຊັບພະຍາກອນມະນຸດ.

ທັງສອງຝ່າຍໄດ້ຕີລາຄາສູງຕໍ່ການພົວພັນ ແລະ ຮ່ວມມືສອງຝ່າຍ ໃນໄລຍະຜ່ານມາ, ເຊິ່ງລາວ-ມາເລເຊຍ ໄດ້ມີການພົວພັນຮ່ວມມືຫຼາຍດ້ານ ທັງດ້ານການເມືອງ, ປ້ອງກັນຊາດ, ປ້ອງກັນຄວາມສະຫງົບ, ວັດທະນະທໍາ-ສັງຄົມ ແລະ ການສະໜັບສະໜູນ ຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ສິ່ງພົ້ນເດັ່ນກໍ​ຄືຜົນ​ສໍາ​ເລັດ​ອັນ​ຈົບງາມ​ໃນການຈັດກິດຈະກຳສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ - ມາເລເຊຍ ຄົບຮອບ 50 ປີ (01/7/1966-01/7/2016) ໃນປີ 2016 ທີ່ຜ່ານມາ. ມາເລເຊຍ ເປັນປະເທດທີ່ລົງທຶນລາຍໃຫຍ່ອັນດັບ 04 ຢູ່ລາວ ລວມມູນຄ່າທັງໝົດປະມານ 1 ຕື້ ໂດລາສະຫະລັດ, ກວມເອົາຮ້ອຍກວ່າໂຄງການ, ໃນນັ້ນມີຂະແໜງພະລັງງານໄຟຟ້າ, ອຸດສາຫະກໍາໄມ້, ໂຮງແຮມ, ທະນາຄານ ແລະ ອື່ນໆ.

ໃນໂອກາດດຽວກັນ, ທ່ານທູດ ໂມດ ໄອນີ ອາຕັນ ໄດ້ສະແດງຄວາມຂອບໃຈຕໍ່ ທ່ານ ສະເຫຼີມໄຊ ກົມມະສິດ, ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໃຫ້ຄໍາໝັ້ນສັນຍາວ່າ ຕະຫຼອດໄລຍະການປະຕິບັດໜ້າທີ່ຂອງຕົນຢູ່ ສປປ ລາວ ຈະເຮັດສຸດຄວາມສາມາດ ເພື່ອເຮັດໃຫ້ສາຍພົວພັນມິດຕະພາບ ແລະ ການພົວພັນຮ່ວມມືອັນດີ ລະຫວ່າງ ສອງປະເທດໃຫ້ຈະເລີນງອກງາມຍິ່ງໆຂຶ້ນ.