ໃນຕອນເຊົ້າຂອງວັນທີ 25 ພຶດສະພາ 2017, ທີ່ ໂຮງແຮມ ແລນມາກ ແມ່ຂອງ ຣີເວີຊາຍ, ໄດ້ມີກອງປະຊຸມຄູ່ຮ່ວມຍຸດທະສາດ ລາວ-ໄທ (Lao-Thai Strategic Partnership Forum), ຊຶ່ງເປັນກຽດເຂົ້າຮ່ວມໂດຍ ທ່ານສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ, ແລະ ທ່ານ ສົມຄິດ ຈາຕຸສີພິທັກ, ຮອງນາຍົກລັດຖະມົນຕີ ແຫ່ງ ຣາຊະອານາຈັກໄທ, ໂດຍມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດເອກະຊົນຂອງ ລາວ ແລະ ໄທ ຫລາຍກວ່າ 200 ຄົນ.
ກອງປະຊຸມຄັ້ງນີ້ມີຈຸດປະສົງ ເພື່ອເພີ່ມທະວີການເປັນຄູ່ຮ່ວມມືຍຸດທະສາດທາງດ້ານທຸລະກິດ ລາວ-ໄທ, ຮັດແໜ້ນການພົວພັນຮ່ວມມື ແລະ ສ້າງເຄືອຂ່າຍທຸລະກິດໃໝ່ໆ ໃຫ້ແກ່ນັກທຸລະກິດຂອງທັງສອງປະເທດ. ໃນກອງປະຊຸມ, ທ່ານ ອຸເດດ ສຸວັນນະວົງ, ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ມີຄໍາເຫັນວ່າ: ການຄ້າ ແລະ ການລົງທຶນ ລາວ-ໄທ ໃນໄລຍະ 5 ປີ ຜ່ານມາ ແມ່ນໄດ້ເພີ່ມຂື້ນນັບມື້ ແລະ ມີມູນຄ່າການຄ້າສູງເຖິງ 5,8 ຕື້ໂດລາ ແລະ ການລົງທຶນຂອງໄທ ຢູ່ ສປປ ລາວ ມີ 71 ໂຄງການ ດ້ວຍມູນຄ່າການລົງທຶນ ປະມານ 741 ລ້ານໂດລາ, ຖືກຈັດຢູ່ອັນດັບ 2 ຂອງການລົງທຶນຕ່າງປະເທດ ຢູ່ ສປປ ລາວ ຮອງຈາກ ສປ.ຈີນ. ການຮ່ວມມືດ້ານທຸລະກິດລາວ ແລະ ໄທ ຈະສືບຕໍ່ເພີ່ມທະວີການຮ່ວມມືກັນສຶກສາຄົ້ນຄວ້າຊ່ອງທາງແກ້ໄຂສິ່ງກີດຂວາງ ແລະ ພັດທະນາບັນດາໂຄງການທຸລະກິດທີ່ມີເງື່ອນໄຂຮ່ວມກັນ, ໂດຍສະເພາະ ໃນ 8 ຂະແໜງການ ເຊັ່ນ: ກະສິກໍາ ແລະ ອາຫານ, ການເງິນ-ທະນາຄານ ແລະ ຕະຫລາດຫລັກຊັບ, ການພັດທະນາອະສັງຫາລິມມະຊັບ, ລະບົບສາງ ແລະ ພະລາທິການຂົນສົ່ງ (Logistics), ການຂຸດຄົ້ນຊັບພະຍາກອນທໍາມະຊາດ ແລະ ບໍ່ແຮ່, ການບໍລິການການທ່ອງທ່ຽວ, ການຄ້າຊາຍແດນ ແລະ ເຄື່ອງໃຊ້ປະຈໍາວັນ ແລະ ພະລັງງານ.
ໃນໂອກາດເດີນທາງມາຢ້ຽມຢາມທາງການ ສປປ ລາວ ຄັ້ງນີ້, ທ່ານຮອງນາຍົກ ສົມຄິດ ຈະຕຸສີພິທັກ ໄດ້ໃຫ້ກຽດຂື້ນປະຖະກະຖາ ໃນຫົວຂໍ້ “ບົດບາດ ແລະ ຄວາມສໍາຄັນໃນການຮ່ວມມືຂອງພາກເອກະຊົນ ໄທ-ລາວ ໃນຖານະຫຸ້ນສ່ວນຍຸດທະສາດທາງດ້ານເສດຖະກິດ”, ໂດຍໄດ້ເໜັ້ນໜັກເຖິງບົດບາດຂອງພາກເອກະຊົນ ໃນການເປັນກົນໄກຂັບເຂື່ອນການເສີມຂະຫຍາຍການພົວພັນຮ່ວມມືຂອງສອງປະເທດ; ນະໂຍບາຍເສດຖະກິດຂອງໄທ ຕໍ່ອາຊຽນ ແລະ ພາກພື້ນ, ໂດຍສະເພາະລັດຖະບານໄທ ໃຫ້ຄວາມສໍາຄັນຂອງການເປັນຄູ່ຫຸ້ນສ່ວນເສດຖະກິດທາງດ້ານການຄ້າ, ການລົງທຶນ ແລະ ການ ທ່ອງທ່ຽວ ກັບປະເທດເພື່ອນບ້ານ ກໍາປູເຈຍ, ລາວ, ມຽນມາ ແລະ ຫວຽດນາມ (CLMVT) ໂດຍແນໃສ່ສ້າງການເຊື່ອມໂຍງທາງດ້ານເສດຖະກິດ ແລະ ຮັດແໜ້ນການພົວພັນ ພ້ອມທັງສ້າງເຄືອຂ່າຍການຮ່ວມມືທັງພາກລັດ, ເອກະຊົນ ແລະ ວິຊາການຕ່າງໆ.
ນອກນັ້ນ, ທ່ານ ສົມຄິດ ຈະຕຸລີພິທັກ ຍັງໄດ້ກ່າວຢໍ້າວ່າ ສປປ ລາວ ຕັ້ງຢູ່ຈຸດຍຸດທະສາດທີ່ມີຄວາມໄດ້ປຽບໃນການເຊື່ອມໂຍງກັບປະເທດຕ່າງໆທີ່ສໍາຄັນ ໃນພາກພື້ນຢ່າງແທ້ຈິງ ແລະ ປະເທດລາວ ເປັນຕະຫລາດການລົງທຶນທີ່ສໍາຄັນຂອງນັກທຸລະກິດໄທ ໃນໄລຍະເວລາ 3 ທົດສະຕະວັດຜ່ານມາ. ລັດຖະບານໄທ ມີຄວາມມຸ້ງໝັ້ນຈະພັດທະນາເຂດເສດຖະກິດພິເສດຊາຍແດນ ໂດຍມີແຜນການຈັດຕັ້ງຂື້ນອ້ອມຮອບປະເທດໄທ ແລະ ປະຈຸບັນ ຍັງບໍ່ທັນມີກົນໄກເຊື່ອມໂຍງເຂດເສດຖະກິດພິເສດ ໄທ-ລາວ ຈຶ່ງຄວນມີການຈັດຕັ້ງຄະນະເຮັດວຽກຮ່ວມສອງຝ່າຍ ເພື່ອເຊື່ອມໂຍງເຂດເສດຖະກິດພິເສດ ໄທ-ລາວ ໃນເຂດແຂວງທີ່ມີຊາຍແດນຕິດຈອດກັນ ເພື່ອອໍານວຍຄວາມສະດວກໃຫ້ແກ່ນັກລົງທຶນຂອງສອງປະເທດ ສາມາດໃຊ້ຖານການຜະລິດຮ່ວມກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.
ພາຍຫລັງກອງປະຊຸມປະຖະກະຖາ, ທ່ານຮອງນາຍົກລັດຖະມົນຕີ ສົມດີ ດວງດີ ແລະ ທ່ານ ສົມຄິດ ຈະຕຸສີພິທັັກ, ຮອງນາຍົກລັດຖະມົນຕີໄທ, ໄດ້ໃຫ້ກຽດເຂົ້າຮ່ວມເປັນສັກຂີພິຍານ ໃນພິທີລົງນາມບົດບັນທຶກຄວາມເຂົ້າໃຈ (MOU) ຂອງພາກເອກະຊົນທຸລະກິດຂະໜາດນ້ອຍ ແລະ ຂະໜາດກາງ (SMEs) ຈໍານວນ 4 ສະບັບ ກ່ຽວກັບ ການສົ່ງເສີມການຮ່ວມມື SME ລາວ-ໄທ. ກ່ອນໜ້ານັ້ນ, ພາກທຸລະກິດເອກະຊົນ ລາວ-ໄທ ກໍ່ໄດ້ລົງນາມບົດບັນທຶກຄວາມເຂົ້າໃຈ ຈໍານວນ 9 ສະບັບ ກ່ຽວກັບການສົ່ງເສີມການຮ່ວມມືທຸລະກິດທາງດ້ານການຄ້າ, ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ດ້ານພະລັງງານ ແລະ ການຄ້າອີເລັກໂຕຼນິກ (E-Commerce).