ໃນວັນທີ 24 ພຶດສະພາ 2017, ທີ່​ ສຳນັກງານ​ນາຍົກລັດຖະມົນຕີ, ພະນະທ່ານ ທອງ​ລຸນ ສີ​ສຸ​ລິດ, ນາຍົກລັດຖະມົນຕີ​ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພະນະທ່ານ ສົມ​ຄິດ ຈາ​ຕຸສີ​ພິທັກ, ຮອງນາຍົກລັດຖະມົນຕີ ແຫ່ງ ຣາຊະ​ອານາຈັກ​ໄທ, ໃນໂອກາດທີ່ເດີນທາງມາ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ, ໃນລະຫວ່າງວັນທີ 23-25 ພຶດສະພາ 2017.

ໃນໂອກາດດັ່ງກ່າວ, ພະນະ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ ພະນະ​ທ່ານຮອງນາຍົກລັດຖະມົນຕີ​ ສົມ​ຄິດ ຈາຕຸ​ສີ​ພິທັກ ​ແລະ ຄະນະ, ​ແລະ ​ໄດ້​ຕີ​ລາຄາ​ສູງ ​ຕໍ່ການຢ້ຽມຢາມ ສປປ ລາວ ຂອງ​ຄະນະ​ຄັ້ງນີ້, ຊຶ່ງ​ຈະ​ເປັນ​ຂີດ​ໝາຍ​ສໍາຄັນ ​ແລະ ປະກອບ​ສ່ວນ​ໃນ​ການ​ຊຸກຍູ້​ສົ່ງ​ເສີມ​ສາຍ​ພົວພັນ ​ແລະ ການ​ຮ່ວມ​ມື​ສອງ​ຝ່າຍ ​ໃຫ້​ເພີ່ມ​ພູນ​ຄູນ​ສ້າງ​ຍິ່ງໆ​ຂື້ນ​ຕື່ມ. ຈາກ​ນັ້ນ, ພະນະ​ທ່ານ ສົມ​ຄິດ ຈາຕຸ​ສີ​ພິທັກ ກໍ່ໄດ້ສະແດງຄວາມຂອບ​ໃຈ​ຕໍ່ພະນະທ່ານນາຍົກ ທອງ​ລຸນ ສີ​ສຸ​ລິດ ທີ່ໄດ້ຕ້ອນຮັບອັນ​ອົບ​ອຸ່ນ ​ແລະ ໄດ້​ແຈ້ງ​​ກ່ຽວ​ກັບແຜນການ​ຢ້ຽມຢາມ ສປປ ລາວ ​ຂອງ​ພະນະ​ທ່ານ ​ໃນຄັ້ງນີ້​, ໂດຍ​ສະ​ເພາະຜົນ​ຂອງ​ກອງ​ປະຊຸມ​ພົບ​ປະ​ທາງ​ການ​ສອງ​ຝ່າຍ ທີ່ນໍາ​ໂດຍພະນະທ່ານ ສົມ​ດີ ດວງ​ດີ, ຮອງ​ນາຍົກລັດຖະມົນຕີ, ລັດຖະມົນຕີ​ກະຊວງ​ການ​ເງິນ ​ແຫ່ງ ສປປ ລາວ ​ແລະ ພະນະທ່ານ ສົມ​ຄິດ ຈະຕຸ​ສີ​ພິທັກ, ຮອງ​ນາຍົກລັດຖະມົນຕີ​ໄທ, ຊຶ່ງ​ໄດ້​ຈັດ​ຂື້ນ​ໃນ​ຕອນ​ເຊົ້າຂອງ​ວັນ​ດຽວ​ກັນ ​ໂດຍ​ສອງ​ຝ່າຍ ​ໄດ້​ເຫັນດີ​ຈະຂະຫຍາຍ​ການ​ຮ່ວມ​ມື​ດ້ານ​ເສດຖະກິດ ລະຫວ່າງ​ສອງ​ປະ​ເທດ ເພື່ອ​ຄວາມ​ຈະ​ເລີ​ນ​ເຕີບ​ໂຕ​ແບບ​ຍືນ​ຍົງ​ຂອງ ລາວ-​ໄທ; ຈະ​ຮ່ວມກັນ​ດໍາ​ເນີນ​ໂຄງການ​ເພື່ອ​ການ​ພັດທະນາ​ດ້ານ​ຊັບພະຍາກອນ​ມະນຸດ, ກະສິກໍາ, ການ​ທ່ອງ​ທ່ຽວ, ການ​ສຶກສາ ​ແລະ ສາທາລະນະ​ສຸກ ຕາມ​ແຜນການ​ຮ່ວມ​ມື​ວິຊາ​ການ ລາວ-​ໄທ; ​ຈະ​ຮ່ວມ​ກັນ​ສ້າງ​ແຜນ​ແມ່​ບົດ​ການ​ເຊື່ອມ​ໂຍງ​ ລະຫວ່າງ​ສອງ​ປະ​ເທດ ​ແລະ ລະຫວ່າງ​ອະນຸ​ພາກ​ພື້ນ​ລຸ່ມ​ແມ່​ນໍ້າຂອງ, ​ໂດຍ​ຈະ​ເລັ່ງການ​ສ້າງ​ຂົວ​ມິດຕະພາບ ລາວ-​ໄທ ​ແຫ່ງ​ທີ 5 ລະ​ຫວ່າງ ​ແຂວງ ບໍລິ​ຄໍາ​ໄຊ ​ແລະ ຈັ່ງ​ຫວັດ ບຶງ​ການ ​ແລະ ຈະ​ສົ່ງ​ເສີມ​ເພີ​່ມປະລິມານ​ການ​ຄ້າ​ສອງ​ຝ່າຍ​​ໃຫ້​ສູງ​ກວ່າ 10 ຕື້​ ໂດ​ລາ ສະຫະລັດ ​ໃນ​ປີ 2024.

ໃນ​ໂອກາດ​ນີ້, ພະນະ​ທ່ານ​ຮອງ​ນາຍົກລັດຖະມົນຕີ​ໄທ ກໍ່​ໄດ້ນຳເອົາຄຳຢື້ຢາມຖາມຂ່າວແຫ່ງໄມຕີຈິດມິດຕະພາບຈາກ ພະນະທ່ານ ປຣະຢຸດ ຈັນ​ໂອຊາ, ນາຍົກລັດຖະມົນຕີ​ ແຫ່ງ ຣາຊະ​ອານາ​ຈັກ​ໄທ, ເຖິງ ພະ​ນະ​ທ່ານ​ນາຍົກລັດຖະມົນຕີ ​ແຫ່ງ ສປປ ລາວ.

ໃນ​​ເວລາ​ດຽວ​ກັນ, ພະນະ​ທ່ານ​ ທອງ​ລຸນ ສີ​ສຸ​ລິດ ໄດ້ສະແດງຄວາມຊົມເຊີຍຕໍ່ຜົນສຳເລັດອັນຈົບງາມຂອງ​ກອງ​ປະຊຸມ​ພົບ​ປະ​ສອງ​ຝ່າຍ​ ລະຫວ່າງ​ສອງຮອງ​ນາຍົກລັດຖະມົນຕີ ລາວ-​ໄທ ​ແລະ ​ໄດ້​ຕີ​ລາ​ຄາ​ສູງ​ ຕໍ່​ການ​ລົງທຶນ​ຂອງ​ນັກ​ລົງທຶນ​ໄທ ຢູ່ ສປປ ລາວ ທີ​່ມີ​ປະສິດທິພາບ ​ແລະ ປະສິດທິ​ຜົນ​ສູງ, ທັງ​ຍັງຈະ​ເປັນ​ການ​ປະກອບ​ສ້າງ​ວຽກ​ເຮັດ​ງານ​ທໍາ ​ແລະ ສ້າງ​ລາຍ​ໄດ້​ໃຫ້​ແກ່​ປະຊາຊົນ​ລາວ, ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ເຂົາ​ເຈົ້າດີ​ຂື້ນ, ຊຶ່ງ​ເປັນ​ການ​ປະກອບສ່ວນ​ອັນ​ສໍາຄັນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ ຂອງ​ ສປປ ລາວ. ນັບ​ແຕ່​ ປີ 2008 ​ເຖິງ​ປະຈຸ​ບັນ, ປະ​ເທດ​ໄທ ຖືກ​ຈັດ​ຢູ່​ອັນ​ດັບ 2 ຂອງ​ການ​ລົງທຶນ​ຕ່າງປະ​ເທດ ​ຢູ່​ ລາວ ຮອງ​ຈາກ ສປ ຈີນ, ຊຶ່ງ​ມີ​ປະມານ 587 ຫົວໜ່ວຍ ​ແລະ ມີ​ທຶນ​ຈົດ​ທະບຽນ​ທັງ​ໝົດ​ປະ​ມານ 2,697 ລ້ານ ​ໂດ​ລາ​ ສະຫະລັດ. ພ້ອມ​ນັ້ນ, ພະນະ​ທ່ານ​ນາຍົກລັດຖະມົນຕີ ກໍ່ໄດ້ສະເໜີໃຫ້ຝ່າຍ​ໄທສືບຕໍ່ໃຫ້ການສະໜັບສະໜູນການ​ພັດທະນາ​ການເຊື່ອມ​ໂຍງ ລາວ-​ໄທ ຕື່ມ ທາງ​ດ້ານຄົມມະນາຄົມ​ຂົນ​ສົ່ງ, ​ດ້ານ​ການ​ຄ້າ ​ແລະ ການ​ລົງທຶນ, ​ແລະ ການ​ທ່ອງ​ທ່ຽວ ລະຫວ່າງ​ສອງ​ປະ​ເທດ ເພື່ອ​ສືບ​ຕໍ່​ຮັດ​ແໜ້ນ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ທີ​່ດີ ​ລະ​ຫວ່າງ​ສອງ​ປະ​ເທດ ​ໃຫ້​​ຢູ່​ໃນ​ທ່າ​ຂະຫຍາຍຕົວ​ຂື້ນ​ເລື່ອຍໆ.

ໃນ​ຕອນ​ທ້າຍ, ພະນະ​ທ່ານ​ນາຍົກ ທອງ​ລຸນ ສີ​ສຸ​ລິດ ​ໄດ້​ອວຍພອນ​ໃຫ້ ພະນະ​ທ່ານ​ຮອງ​ນາຍົກ ສົມ​ຄິດ ຈາຕຸ​ສີ​ພິທັກ ພ້ອມ​ດ້ວຍ​ຄະນະ ຈົ່ງ​ມີ​​ຜົນ​ສໍາ​ເລັດ​ໃນ​ການ​ຢ້ຽມຢາມ ສປປ ລາວ ຄັ້ງນີ້.