ອີງຕາມການເຊື້ອເຊີນຂອງກະຊວງການຕ່າງປະເທດອົດສະຕຣາລີ ພາຍໃຕ້ໂຄງການຢ້ຽມຢາມສຳລັບແຂກພິເສດ (Special Visit Program) ແລະ ທັງເປັນການຢ້ຽມຢາມໃນປີ ແຫ່ງ ການສະເຫຼີມສະຫຼອງສາຍພົວພັນການທູດລາວ-ອົດສະຕຣາລີ ຄົບຮອບ 65 ປີ (15/1/1952-15/2/2017), ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ທັດສະນະສຶກສາ ຢູ່ ອົດສະຕຣາລີ ເປັນເວລາ 07 ວັນ, ແຕ່ວັນທີ 26 ກຸມພາ ເຖິງ 04 ມີນາ 2017.
ໃນການຢ້ຽມຢາມຄັ້ງນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ພົບປະກັບການນຳຂອງອົດສະຕຣາລີຫລາຍທ່ານ ເຊັ່ນ:ລັດຖະມົນຕີກະຊວງການຕ່າງປະເທດ, ລັດຖະມົນຕີປະຈໍາສໍານັກງານນາຍົກລັດຖະມົນຕີ; ບັນດາການນຳ ກະຊວງຕ່າງໆ, ສະມາຊິກລັດຖະສະພາ ແລະ ເຈົ້າແຂວງລັດທັດສະເມເນຍ ຂອງ ອົດສະຕຣາລີ. ໃນການພົບປະ, ທັງສອງຝ່າຍ ໄດ້ແລກປ່ຽນທັດສະນະໃນການພົວພັນ ແລະ ຮ່ວມມື ລະຫວ່າງ ສປປ ລາວ ແລະ ອົດສະຕຣາລີ ຕະຫຼອດໄລຍະ 65 ປີ ທີ່ຜ່ານມາ, ໂດຍສະເພາະແມ່ນການແລກປ່ຽນການຢ້ຽມຢາມຜູ້ແທນຂັ້ນສູງຂອງສອງປະເທດ, ການຊ່ວຍເຫຼືອຂອງອົດສະຕຣາລີໃຫ້ແກ່ ສປປ ລາວ ໃນດ້ານຕ່າງໆເປັນຕົ້ນທາງດ້ານການສຶກສາ, ການ ພັດທະນາຊັບພະຍາກອນມະນຸດ, ການຊ່ວຍເຫຼືອການສະໜັບສະໜູນການເຕີບໂຕທາງດ້ານການຄ້າ ແລະ ການລົງທຶນແບບຍືນຍົງ, ດ້ານການທ່ອງທ່ຽວ ແລະ ການພັດທະນາຊົນນະບົດ ລວມທັງການເກັບກູ້ລະເບີດບໍ່ທັນແຕກ ແລະ ການກໍ່ສ້າງພື້ນຖານໂຄງລ່າງ. ນອກຈາກນັ້ນ, ຍັງໄດ້ປຶກສາຫາລືການຮ່ວມມືໃນຂອບຫຼາຍຝ່າຍເປັນຕົ້ນແມ່ນ ການຮ່ວມມືໃນຂອບອາຊຽນ, ຊຶ່ງໃນປີ 2018 ອົດສະຕຣາລີ ຈະເປັນເຈົ້າພາບຈັດກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ.
ໃນວັນທີ 26 ກຸມພາ 2017, ທີ່ ສະຖານທູດລາວ ທີ່ ແຄນເບີຣາ, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ເຂົ້າຮ່ວມເປັນແຂກກິດຕິມະສັກ ໃນພິທີເປີດງານວາງສະແດງຮູບພາບ ເພື່ອລະນຶກເຖິງວັນສ້າງຕັ້ງສາຍ ພົວພັນການທູດລາວ-ອົດສະຕຣາລີ ຄົບຮອບ 65 ປີ, ໂດຍມີພະນັກງານທີ່ກ່ຽວຂ້ອງຂອງກະຊວງການຕ່າງປະເທດ ອົດສະຕຣາລີ, ເອກອັກຄະລັດຖະທູດປະເທດອາຊຽນ, ພະນັກງານສະຖານທູດລາວ, ນັກສຶກສາລາວ ແລະ ຊຸມຊົນ ຄົນເຊື້ອຊາດລາວ ເຂົ້າຮ່ວມໃນພິທີດັ່ງກ່າວ ດ້ວຍບັນຍາກາດແຫ່ງຄວາມສະໜິດສະໜົມ ແລະ ເບີກບານມ່ວນຊື່ນ.
ນອກຈາກການພົບປະທາງການແລ້ວ, ທ່ານຮອງນາຍົກລັດຖະມົນຕີ ຍັງໄດ້ພົບປະກັບບັນດານັກທຸລະກິດ ອົດສະຕຣາລີ ທີ່ມາລົງທຶນ ຢູ່ ສປປ ລາວ, ຢ້ຽມຢາມໂຮງຈັກໂຮງງານ ແລະ ພື້ນຖານການຜະລິດກະສິກຳ ຢູ່ ເມືອງເມວເບິນ ແລະ ລັດທັດສະມາເນຍ ເພື່ອສຶກສາເບິ່ງສະພາບການພັດທະນາທາງດ້ານເສດຖະກິດ-ສັງຄົມ ຂອງ ອົດສະຕຣາລີ.
ການຢ້ຽມຢາມທັດສະນະເຮັດວຽກຂອງທ່ານຮອງນາຍົກລັດຖະມົນຕີ ໃນຄັ້ງນີ້ ແມ່ນໄດ້ຮັບຜົນສຳເລັດຢ່າງຈົບງາມ ຊຶ່ງຄະນະຜູ້ແທນໄດ້ໄປຢ້ຽມຢາມ ແລະ ຖອດຖອນບົດຮຽນ ຈາກຫລາຍລັດຂອງອົດສະຕຣາລີ. ປະເທດເຈົ້າພາບໄດ້ຈັດຕາຕະລາງການເຄື່ອນໄຫວ, ອຳນວຍຄວາມສະດວກ ແລະ ຕ້ອນຮັບຄະນະຂອງຝ່າຍລາວ ເປັນຢ່າງດີ.