ຄະນະພັກ-ພະນັກງານຫລັກແຫລ່ງ ກະຊວງການຕ່າງປະເທດ ໄດ້ຈັດຕັ້ງເຜີຍແຜ່ເອກະສານມູນເຊື້ອ ວັນສ້າງຕັ້ງອົງການກວດກາພັກ-ລັດ ຄົບຮອບ 35 ປີ (16/2/ 1982 -16/2/2017) ແລະ ການຈັດຕັ້ງຜັນຂະຫຍາຍ ເນື້ອໃນກອງປະຊຸມກວດກາທົ່ວປະເທດປະຈໍາປີ 2016.
ໃນວັນທີ 17 ກຸມພາ 2017 ເພື່ອແນ່ໃສ່ເຮັດໃຫ້ສະມາຊິກພັກ-ພະນັກງານ ຂັ້ນນໍາພາແຕ່ລະຂັ້ນທົ່ວກະຊວງການຕ່າງປະເທດ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບຜົນສໍາເລັດກອງປະຊຸມ ວຽກງານກວດກາທົ່ວປະເທດປະຈໍາປີ 2016, ຖອດຖອນໄດ້ບົດຮຽນການເຕີບໃຫຍ່ຂະຫຍາຍຕົວ ໃນວຽກງານກວດກາພັກ-ລັດ, ວຽກງານແນວທາງການຕ່າງປະເທດ ຢ່າງເລິກເຊິ່ງກວ້າງຂວາງ ແລະ ກໍາແໜ້ນແນວທາງ, ມະຕິຄໍາສັ່ງຂອງພັກ, ລະບຽບກົດໝາຍຂອງພັກ-ລັດ, ເພື່ອເປັນພື້ນຖານເຮັດໃຫ້ພະນັກງານ-ສະມາຊິກພັກໄດ້ຝຶກຝົນຫລໍ່ຫລອມຕົນເອງໃຫ້ມີຫລັກໝັ້ນ, ບໍລິສຸດສັດຊື່ຕໍ່ໜ້າທີ່ວຽກງານໃນການປະຕິບັດໜ້າທີ່ການເມືອງຂອງຕົນ, ພ້ອມທັງແນ່ໃສ່ເສີມຂະຫຍາຍດ້ານດີ ແລະປັບປຸງແກ້ໄຂຂໍ້ຄົງຄ້າງ ເພື່ອເປັນບ່ອນອີງ ໃນການວາງທິດທາງແຜນການເຄື່ອນໄຫວທຸກວຽກງານ ໃຫ້ຕິດພັນກັບການ ຕິດຕາມກວດກາ; ຜົນສໍາເລັດກ່ຽວກັບວຽກງານກວດກາ ແລະ ວຽກງານຕ້ານການສໍ້ລາດບັງຫລວງເຊິ່ງລ້ວນແລ້ວແຕ່ເປັນວຽກງານສໍາຄັນ ເຊິ່ງແມ່ນໜຶ່ງ ໃນພາລະບົດບາດ ແລະແບບແຜນການນໍາພາ ທີ່ສໍາຄັນຂອງພັກ “ ບໍ່ມີການກວດກາກໍໝາຍຄວງາມວ່າບໍ່ມີການນໍາພາ” ແລະ ຈໍາເປັນທີ່ຕ້ອງເອົາໃຈໃສ່ໃນການຈັດຕັ້ງຜັນຂະຫຍາຍ ໃຫ້ປະສົບຜົນສໍາເລັດຕາມຄາດໝາຍ ແລະ ມີປະສິດທິຜົນສູງ.
ໃນໂອກາດປາຖະກະຖາຄັ້ງນີ້, ຍັງໄດ້ເປັນກຽດຮັບຟັງການໂອ້ລົມ ຂອງສະຫາຍ ບຸນທອງຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ອົງ ການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງ ຂັ້ນສູນກາງເຊິ່ງທ່ານໄດ້ເນັ້ນໃຫ້ພະນັກງານທຸກຄົນ ເຂົ້າໃຈເລິກເຊິ່ງກ່ຽວກັບພາລະບົດບາດຄວາມສໍາຄັນຂອງວຽກງານກວດກາ, ຜົນສໍາເລັດການເຄື່ອນໄຫວວຽກງານກວດກາ ແລະໃນຕອນທ້າຍທ່ານ ຍັງໄດ້ຮຽກຮ້ອງມາຍັງການນໍາທຸກຂັ້ນ ກໍຄືພະນັກງານກະຊວງການຕ່າງປະເທດ ຈົ່ງພ້ອມກັນບຸກທະລຸ ແລະ ເຮັດໜ້າທີ່ການເມືອງຂອງຕົນໃນໄລຍະໃໝ່.